Jak minčanka ŭ 55 hadoŭ schudnieła na 70 kiłahramaŭ, pierapłyła Basfor i stała madellu
«Navat kali ja važyła 130 kiłahramaŭ, lubiła chadzić u trenažornuju zału. Mnie vielmi padabalisia fotazdymki na ścienach: pryhožyja padciahnutyja atlety ŭ pyrskach vady… Ščaście, zdaroŭje, pieramoha. Vielmi im zajzrościła».
Ciapier Śviatłana Karaścialova važyć 67 kiłahramaŭ, i pyrski ščaścia dla jaje — heta nie karcinka na ścianie, a mara, što zbyłasia sioleta na dalokim Basfory, jaki jana pierapłyła ŭ lipieni.
Dla dasiahnieńnia žadanaj mety spatrebiłasia ŭsiaho 2 hady, kansultacyi dziasiatkaŭ śpiecyjalistaŭ, šmat hrošaj i vializnaja siła voli.
«Spačatku nastupiŭ kryzis — i ŭ biznesie, i ŭ asabistym žyćci. Treba było niejak vychodzić ź jaho. Vyrašyła pačać ź siabie. Vahi na toj momant pakazvali 130 kiłahramaŭ», — raspaviadaje Śviatłana.
«Ščyra kažučy, mnie nadakučyła ŭsio svajo śviadomaje žyćcio zmahacca ź lišniaj vahoj. Skidała 30 kiłahramaŭ — nabirała 40. A ŭzrost nabližaŭsia da 55 hadoŭ. Dalej adkładać nie było kudy. Uzhadała, jak 12 hadoŭ tamu była ŭ endakrynołaha z hetaj ža prablemaj. Jašče tady doktar pisaŭ: u dzień nie bolš za 1200 kkał, 30 hramaŭ tłušču, 120 hramaŭ białkoŭ, astatniaje vuhlavody. Ale pierad tym, jak pierabudavać svoj režym dnia, ja prajšła bieźlič miedycynskich abśledavańniaŭ. Zdała ŭsie mahčymyja analizy».
A paśla Śviatłana pačała ruchacca da mety.
«Ja nie mahu davać niejkija ŭniviersalnyja parady, nie mahu raić adnaznačna: ješcie adno i nie ješcie druhoje. Adnak ja zrazumieła voś što: tvaja fihura na 80 adsotkaŭ zaležyć ad taho, što ty jasi, i na 20 adsotkaŭ — ad fizičnaj nahruzki i trenirovak».
Jość i jašče adna prostaja, ale važnaja reč.
«My ŭsio žyćcio ŭkładajem bieźlič sił na roznyja prajekty, źviazanyja z pracaj, karjeraj, materyjalnaj stabilnaściu. I za ŭsim hetym zabyvajemsia, što naša cieła — heta naš samy hałoŭny i važny prajekt».
Śviatłana vyrašyła ŭkłaści maksimum vysiłkaŭ u hety prajekt. Kupiła razumnyja vahi, fitnes-branzalet, kuchonnyja vahi, kab ličyć kožnuju kałoryju. I dźvie plisirovanyja spadnički.
«Mnie pašancavała ŭ tym płanie, što ja abažaju fizičnuju nahruzku. Ja chadziła ŭ trenažornuju zału, zajmałasia tancami, sprabavała siabie ŭ siorfinhu. Paśla palubiła vialiki tenis, šmat chadziła pieššu i płavała. Adnojčy daviedałasia pra mahčymaść pierapłyści Basfor i zaharełasia. Ja pastaviła sabie metu: važyć 65 kiłahramaŭ i prapłyć 6,5 kiłamietra».
Śviatłana stała adnoj z tych, kamu ŭdałosia kupić słot na prestyžny zapłyŭ.
«Hod tamu, 4 studzienia, ja dziažuryła ŭsiu noč la kampjutara. Treba było sačyć, kali pačnuć pradavać słoty. Tam jość svaje chitryki. Treba pryviazvać niekalki bankaŭskich kartak, bo sistema, byvaje, vybivaje ich. Słot na zapłyŭ kaštavaŭ 100 dołaraŭ. Pašancavała tolki 20% achvotnym. Kali heta zdaryłasia, ja zrazumieła: nazad darohi niama. Zapłyŭ byŭ pryznačny na 22 lipienia. Patelefanavała va ŭniviersitet fizkultury, skazała im: «Ja nienarmalnaja: mnie 54 hady i ja chaču pierapłyści Basfor. Dajcie mnie takoha ž nienarmalnaha treniera». Padčas padrychtoŭki ŭ mianie było pravilnaje charčavańnie i 8 trenirovak na tydzień, ź ich niekalki pa 2—3 hadziny ŭ basiejnie. Paralelna — trenažornaja zała, vialiki tenis i tancy».
«Byŭ momant, kali ja chacieła plunuć na ŭsio»
Dzień 22 lipienia zapomniŭsia Śviatłanie, badaj, na ŭsio žyćcio.
«Nam vielmi nie pašancavała z nadvorjem. Sonca nad moram raptoŭna źmianiłasia navalnicaj. A płyści treba było ŭsio adno. Pieršyja šeść kiłamietraŭ prapłyli lohka i z zadavalnieńniem, a potym trapili ŭ zvarotnuju płyń. Jak ty nie imknuŭsia prapłyć chutčej, ciabie prosta adnosiła nazad. Ty bačyš pierad saboj bierah: płyvieš 15 chvilin, 20 chvilin. A jon usio na toj ža adlehłaści».
«Šmat chto zdaŭsia za paŭkiłamietra da finišu. Ja viedaju, što sioleta adzin małady płyviec zahinuŭ u čas zapłyvu. Pa praviłach, kali chtości nie moža płyć, jon zdymaje šapačku, machaje joju, i jaho zabirajuć u łodku. Było šmat ludziej, jakija zdalisia, raskazvali, jak im było błaha, jak ich vanitavała. Byŭ momant, kali ja taksama chacieła plunuć na ŭsio, navat užo padpłyła da łodki, ale mianie prosta nie ŭziali na bort. Pakazali, kudy płyści. Liŭ doždž, vada była ciomnaja i chałodnaja, u mianie źviało abiedźvie nahi. I ja adzinaja z amal 2000 udzielnikaŭ, chto finišavaŭ na śpinie. A kali atrymała siertyfikat, što ja heta zrabiła, zrazumieła, što ŭsio nie darma. Ja b paŭtaryła hety zapłyŭ z zadavalnieńniem».
Ale siońnia ŭ Śviatłany inšyja kłopaty.
«Amal za dva hady ja schudnieła na 70 kiłahramaŭ. Heta mocna adbiłasia na skury. Złaviła siabie na dumcy, što ja idealna vyhladaju tolki ŭ hidrakaściumie. Dyk voś chaču heta papravić».
Padciahnutaje cieła dla Śviatłany Karaścialovaj važnaje, bo adno ź jaje novych zachapleńniaŭ — škoła ŭzrostavych madelaŭ.
«Vučusia majsterstvu defile, płastycy, jak pavodzić siabie ŭ kadry. Heta nadzvyčaj cikava. I ja ciešusia, što mnie prydaŭsia pa žyćci voś hety vyraz: «U luboj niezrazumiełaj situacyi rabi pryhožy azadak. Kryzis minie, a pryhožy azadak zastaniecca».
Ciapier čytajuć
«Anlifanščyca ź Pinska» kaža, što jana nie anlifanščyca i nie ŭ rabstvie ŭ Mjanmie6
Kamientary