Lego raspracavała drukarskuju mašynku z 2 tysiač detalaŭ. Tam navat ruchajucca kłavišy
Zaraz mała dzie možna znajści sapraŭdnuju drukarskuju mašynku. Ale kampanija Lego vyrašyła akunucca ŭ nastalhiju i stvaryła madel hetaha aparata z 2079 detalaŭ. Mašynka atrymałasia nastolki praŭdapadobnaj, što ŭ joj ruchajucca karetka i kłavišy.
Metavaja aŭdytoryja novaha naboru kanstruktara — darosłyja, a stvorany jon pa zadumcy brytanskaha fanata Lego Styva Hinesa. Hines pradstaviŭ svaju ideju na śpiecyjalnaj płatformie kampanii i atrymaŭ bolš za dziesiać tysiač hałasoŭ u svaju padtrymku. Pieramoha ŭ spabornictvie ź inšymi aŭtarami kancepcyj dla naboraŭ dazvolić Hinesu taksama atrymać pracent prybytku ad prodažu novaha kanstruktara, piša CNN.
Nabor LEGO kapiruje styl i funkcyjanał kłasičnaj drukarskaj mašynki. Jon uklučaje ŭ siabie litarny ryčah, jaki ŭzdymajecca kožny raz, kali karystalnik naciskaje kłavišu. Ryčah, u svaju čarhu, źviazany z karetkaj, jakaja ruchajecca padčas pracesu druku. U nabor taksama ŭvachodzić aporny valik, u jaki možna źmiaścić sapraŭdnuju papieru.
Aŭtar naboru śćviardžaje, što śpiecyjalna nabyŭ vintažnuju drukarskuju mašynku, kab vyvučyć jaje budovu i damahčysia najlepšaha dyzajnu dla kanstruktara. Metaj Hinesa było stvaryć niešta maksimalna niepadobnaje da taho, što raniej vypuskała Lego, kab pakazać, što z hetaha kanstruktara možna zrabić usio što chočaš.
Drukarskaja mašynka ad Lego budzie kaštavać 199.99 dalaraŭ. Jana stanie dastupnaja dla ŭsich katehoryj pakupnikoŭ u lipieni.
Kamientary