«U +35 ni pamycca, ni ŭ prybiralniu schadzić». Čaćviortyja sutki surjoznyja pieraboi z vadoj u Lachavičach

«Dobry viečar! Turbuju vas z horada Lachavičy! Prašu ab dapamozie, apublikujcie heta, i niachaj usie bačać i viedajuć! U nas u horadzie niama vady, jak haračaj, tak i chałodnaj. Heta praciahvajecca ŭžo trecija sutki. Telefanuju ŭ ŽKH, kažuć: to pompy złamanyja, to reziervuary pustyja. Ździek niejki: u +35 ni pamycca, ni pamyć, ni pajeści pryhatavać, ni, prabačcie, u tualet schadzić», — napisała ŭ sacyjalnych sietkach Julija pozna ŭviečary 23 červienia.

«Amal zabyłasia, što takoje vada»

Žurnalisty źviazalisia ź Julijaj ranicaj 24 červienia. Jana raspaviała, što prablemy z vadoj u horadzie pačalisia 21 červienia. Pryčym zusim niečakana.

— U paniadziełak ja pryjšła z pracy, pryniała duš (heta było prykładna a piataj viečara), a niedzie a vośmaj adklučyli vadu — i chałodnuju, i haračuju. Ja patelefanavała ŭ ŽKH, ale vyraznaha adkazu mnie nie dali. Skazali, što ŭ reziervuarach skončyłasia vada. Patelefanavała ŭ 115, tam ja pačuła toje ž samaje, — raspaviała dziaŭčyna. — U aŭtorak paviesili abjavu, maŭlaŭ, u suviazi z umovami nadvorja pompy nie paśpiavajuć pampavać vadu, ekanomcie.

Kali vada źjaŭlajecca, žycharka Lachavič Julija imkniecca nabrać jaje pa maksimumie. Fota: čytač Intex-press

Pa stanie na ranicu 24 červienia vada ŭ kranach tak i nie źjaviłasia. Pa słovach Julii, časam «ranicaj vada moža źjavicca z chałodnaha krana, ale naporu niama, a sama vada ź piaskom i koleru koły».

Čaściej za ŭsio vada z krana ciače kałamutnaja i z asadkam, jak na hetym fota, jakoje Julija dasłała ŭ redakcyju. Fota: čytač Intex-press

Intex-press udałosia pahavaryć i ź inšymi žycharami Lachavič, i ŭsie jany paćvierdzili, što pieraboi z vadoj jość pa ŭsim horadzie. Praŭda, u roznych rajonach jany roznyja: u kahości vady naohuł praktyčna niama, u kahości jaje dajuć na niekalki hadzin u dzień, ale napor maleńki.

— Tak, sapraŭdy, vady niama, i heta biada! Čaćviorty dzień pajšoŭ, a pytańni tak i nie vyrašajucca. Dzicia ŭsio potnaje ad śpioki, samoj nie abmycca. Prosta chadžu ŭ kramu i kuplaju minieralnuju, — raspaviała haradžanka Śviatłana.

— Ja žyvu na piatym paviersie i ŭžo amal zabyłasia, što takoje vada. Sutki jaje niama naohuł, u tyja dni pa ranicach trochi ciakła, iržavaja, — paćvierdziła jašče adna žycharka Lachavič Natalla. — Telefanujem, prosim ab dapamozie, ale adkazu niama. Tłumačać, što pryvatny siektar zabiraje vadu na palivy i pompa nie paśpiavaje jaje napampoŭvać.

A tak vyhladajuć palicy z vadoj u kramach Lachavič. Pitnoj butylavanaj vady amal niama. Fota: Čytač Intex-press

Pry hetym ludzi adznačajuć, što z adsutnaściu vady ŭsie hetyja dni jany vymušanyja byli «spraŭlacca svaimi siłami»: chtości kuplaje butylavanuju vadu ŭ kramach, chtości pryvozić jaje z rajonaŭ, dzie vada jość. Ale rabić heta ŭsio składaniej.

— Siońnia była ŭ dźviuch kramach, butylavanaj vady niama naohuł, adna minierałka. Skazali, učora ŭsiu razabrali, ale paabiacali, što budzie pryvoz, — raspaviała adna z haradžanak.

«Nie chapaje vady na vodazabory»

U Lachavickim ŽKH Intex-press paviedamili, što pieraboi z vadoj u horadzie źviazanyja sa śpiakotaj.

— Nie chapaje vady na vodazabory. A bolš padrabiazna vam lepš spytać u vodakanale, — adznačyli ŭ kamunalnaj słužbie i dali telefonny numar.

Tam rastłumačyli, što z-za niebyvałaj śpiakoty ŭ horadzie rezka pavialičyłasia spažyvańnie vady (pierš za ŭsio, na paliŭ aharodaŭ) i śvidraviny prosta nie paśpiavajuć napaŭniacca.

— Abjom vady, jaki ludzi ŭžyvajuć, pieravyšaje toj, jaki my padymajem z artezijanskich śvidravin, — rastłumačyli Intex-press u słužbie, jakaja adkazvaje za pytańni vodazabieśpiačeńnia i vodaadviadzieńnia ŭ horadzie. — My nie paśpiavajem svoječasova napoŭnić čystaj vadoj reziervuar na stancyi abiezžalezvańnia, u suviazi z hetym my ŭstanavili hrafik, pa jakim budziem uklučać vadu.

Zhodna z hetym hrafikam, jaki 24 červienia apublikavali na sajcie Lachavickaha ŽKH, vadu buduć uklučać trojčy ŭ dzień: z 6 da 8 ranicy, z 12 da 14 dnia i ŭviečary — z 17.30 da 23.00.

Taksama ŭsie achvotnyja haradžanie zmohuć dadatkova pakinuć zajaŭku na padvoz vady.

Papiarednie, vadu pavodle hrafiku ŭ Lachavičach buduć davać da 27 červienia.

Surazmoŭca Intex-press adznačyŭ, što adziny sposab nie dapuścić padobnyja pieraboi z vadoj u budučyni — pavialičyć kolkaść śvidravin. Ale heta i doŭha, i doraha. Tamu pakul haradžan prosiać ekanomić vadu i, jak minimum, nie palivać aharody sa šłanhaŭ.

• 0
• 0
• 0
• 0
• 0
• 0
• 0
• 0