Vykładčyca historyi paskardziłasia ŭ administracyju Łukašenki na adnaŭleńnie «architektury Zachadu» i nacyjanalizm u Minkulcie
Sajt Reform.by atrymaŭ ad svaich čytačoŭ kopiju danosa ŭ administracyju Łukašenki na pracu Ministerstva kultury ŭ kirunku adnaŭleńnia architekturnych pomnikaŭ i ŭ cełym na viedamstva, u jakim «vialikaja kolkaść nacyjanalistaŭ». Aŭtarkaj danosa źjaŭlacca «vykładčyca historyi na piensii» spadarynia Neła H.
Žančyna piša, što daŭno vyvučaje «pytańnie adnaŭleńnia pomnikaŭ architektury ŭ našaj krainie». Jana zaŭvažyła, što Ministerstva kultury Respubliki Biełaruś na praciahu ŭžo mnohich hadoŭ adnaŭlaje architekturu zachodnich rehijonaŭ krainy, «dzie byŭ mocny ŭpłyŭ Zachodniaj Jeŭropy». A voś pravasłaŭnyja chramy, pomniki architektury XIX-XX stahodździaŭ nibyta zastajucca pa-za ŭvahaj viedamstva, «i vielmi mała [Ministerstva kultury] piša, havoryć i dumaje pra pomniki [XIX-XX stahodździa], kali Biełaruś uvachodziła ŭ skład Rasijskaj impieryi».
Dalej žančyna pierachodzić, ułasna, na samu strukturu, u jakoj, na jaje pohlad, «zaŭždy było šmat supracoŭnikaŭ z zachodnich abłaściej». «U čas padziej 2020 hoda, paśla vybaraŭ, heta ministerstva dało vialikuju kolkaść nacyjanalistaŭ, prychilnikaŭ Polščy», — piša vykładčyca historyi.
Z hetaj pryčyny spadarynia Neła akurat i prapanuje kantrolnym orhanam pravieryć kolkaść pomnikaŭ architektury, jakija buduć restaŭravacca, adnaŭlajucca, na pradmiet ich prynaležnaści «da architektury Zachadu i katalictva».
Pryčym pravieryć žančyna prapanuje nie tolki budučuju pracu viedamstva, a i ŭžo zroblenuju — za apošnija piać hadoŭ. «Kudy sychodzili finansavyja srodki na restaŭracyju? na jakija pomniki? — cikavicca spadarynia Neła H. —
A to ja adkryvaju internet, a tam na kožnym kroku 10 najviadomych pomnikaŭ Biełarusi. 9 z 10 źviazanyja z zachodniaj kulturaj i katalictvam», — niepakoicca piensijanierka.
Administracyja Łukašenki ŭ adkaz na danos žančyny nakiravała zapyt u Ministerstva kultury pa ahučanych u liście pytańniach. Paśla taho jano pačało zbor infarmacyi ŭ abłasnych i haradskich vykankamach i padparadkavanych instancyjach.
U pryvatnaści, nakiravała listy ŭ vykankamy z prośbaj dać śpis abjektaŭ, «ramontna-restaŭracyjnyja pracy na jakich vykonvalisia za košt srodkaŭ z respublikanskaha biudžetu i fonda prezidenta pa padtrymcy kultury i mastactva».
Ci buduć z hetaha niejkija praktyčnyja vyniki — pakaža najbližejšy čas.
Ciapier čytajuć
«Ab biełaruskich aŭtaraŭ vycierli nohi». Kurejčyk i Marynič sudziacca za sieryjał «Akreścina»9
«Ab biełaruskich aŭtaraŭ vycierli nohi». Kurejčyk i Marynič sudziacca za sieryjał «Akreścina»
Navukoviec raspavioŭ pra hieałahičnyja zahadki Biełarusi: irtuć ź ziamli i kratar ad padzieńnia mietearyta, jaki źniščyŭ usio žyvoje ŭ radyusie tysiač kiłamietraŭ99
Kamientary