Embarha ES na ekspart rasijskaj nafty pa mory i stol cen na jaje ŭstupili ŭ siłu. Jak embarha budzie dziejničać?
U paniadziełak, 5 śniežnia, ustupaje ŭ siłu embarha Jeŭrapiejskaha sajuza na ekspart rasijskaj nafty pa mory, a taksama stol cany na rasijskuju naftu, što pieravozicca pa mory, u 60 dalaraŭ za barel. Jano było ŭzhodniena ŭ piatnicu ES, krainami «Vialikaj siamiorki» i Aŭstralijaj, piša RBK.
Rašeńnie pryniata, kab nie dapuścić atrymańnia Rasijaj vyhady ad jaje ahresiŭnaj vajny suprać Ukrainy, ale ŭ toj ža čas nakiravana na padtrymku stabilnaści suśvietnych enierhietyčnych rynkaŭ i minimizacyju niehatyŭnych ekanamičnych nastupstvaŭ rasijskaha ŭvarvańnia.
Kiraŭnik MZS Rasii Siarhiej Łaŭroŭ napiaredadni zajaviŭ, što Maskvu nie cikavić, jakimi buduć abmiežavańni na rasijskuju naftu, bo damaŭlacca z partniorami Rasija budzie naŭprost.
U piatnicu rasijskaja nafta marki Urals tarhavałasia pa 64 dalary za baral. Ministr finansaŭ ZŠA Džaniet Jelen zajaviła, što krainy ź nizkim i siarednim uzroŭniem dachodaŭ, jakija mocna paciarpieli ad vysokich cen na enierhanośbity i pradukty, asabliva vyjhrajuć ad abmiežavańnia. Akramia taho, pa jaje słovach, stol cen na naftu abmiažuje finansavyja mahčymaści Rasii, jakija prezident Uładzimir Pucin vykarystoŭvaje dla finansavańnia «svajho žorstkaha ŭvarvańnia».
«Cenavaja stol nieadkładna skarocić najvažniejšuju krynicu dachodaŭ Pucina», — ličyć Jelen.
Ciapier Rasija pastaŭlaje prykładna 3,5 młn baralaŭ na dzień, i poŭnaje zachodniaje embarha moža skaracić hetyja pastaŭki prykładna na tracinu, pryčym nie tolki ŭ krainy «Vialikaj siamiorki». Tamu što zabarona datyčyć nie tolki i nie stolki zakupki nafty i naftapraduktaŭ u Rasii, kolki transparciroŭki, finansavańnia i strachavańnia lubych pastavak moram u lubyja krainy.
Rasija nie zmoža mamientalna znajści alternatyvu łondanskim strachoŭščykam, šviejcarskim trejdaram i hreckim tankieram, što niepaźbiežna adabjecca na abjomach ekspartu, a ŭ dalejšym — i zdabyčy nafty ŭ krainie.
U vyniku da 2030 hoda dola Rasii na suśvietnym enierhietyčnym rynku skarocicca prykładna da 13 % ź letašnich 20 %. U vyjhryšy akažucca ZŠA i krainy Blizkaha Uschodu, a Kreml niedaličycca kala 1 trłn dalaraŭ ekspartnych dachodaŭ, prahnazuje Mižnarodnaje enierhietyčnaje ahienctva (IEA).
U hetym i jość meta zachodnich sankcyj — pazbavić Rasiju srodkaŭ na ahresiŭnuju vajnu suprać Ukrainy.
Ciapier čytajuć
Kaśpiaroviča pierad hibiellu dapytvali ŭ polskaj kontrraźviedcy — raspytvali pra vizy dla ahientaŭ AAC z pašpartami prykryćcia i pra Bulbu27
Kamientary