Pry jakich umovach Ukraina vyzvalić Krym i što z Danieckam? Mierkavańnie Sachaščyka

Čamu ŭkraincam nie ŭdałosia prarvać front padčas kontrnastupu

Valer Sachaščyk adznačaje, što padčas kontrnastupu atrymałasia prarvać pieršuju liniju abarony. Adnak dla taho, kab dasiahnuć bolšych pośpiechaŭ, «samaha vysokaha bajavoha duchu i patryjatyzmu mała».

«Nieabchodna avijacyja, artyleryja, bojeprypasy da jaje, rakiety. Na žal, va ŭsim hetym Ukraina vielmi abmiežavanaja. U avijacyi mahčymaści Ukrainy nieparaŭnalna sastupajuć rasijanam. Uvieś čas jość deficyt bojeprypasaŭ dla artyleryi. I na ahniavyja zadačy, na jakija pry nastupleńni praduhledžany raschod bojeprypasaŭ, naprykład, 40 snaradaŭ, davodzicca tracić čatyry, a časam i mienš, — tłumačyć Sachaščyk.

— Da taho ž nieabchodna addać daninu vorahu. Rasijanie taksama vučacca. Jany daloka nie słabaki i nie durni. Jany vielmi ŭmieła vajujuć, stvaryli vielmi mahutnuju sistemu abarony ź vielmi mahutnaj sistemaj miniravańnia, jakuju vielmi składana pieraadoleć, — dzielicca svaim bačańniem palityk. — U kompleksie heta vyliłasia voś u taki vynik. Razam z tym nastup praciahvajecca».

Ci zmoža Ukraina vyjści da Azoŭskaha mora i vyzvalić Krym

Adkazvajučy na heta pytańnie, Valer Sachaščyk pryhadaŭ, što naziraŭ bajavyja epizody z udziełam nievialikich taktyčnych padraździaleńniaŭ, kali situacyja mianiałasia na praciahu niekalkich chvilin:

«Naprykład, hrupa «načnych palaŭničych» zrabiła zasadu ŭ tyle pazicyj rasijan i prosta źniščyła padraździaleńnie, jakoje išło pa ratacyi, kab źmianić padraździaleńnie, jakoje znachodziłasia na pazicyi. Apošnija nie dabiehli da akopaŭ litaralna 2-3 mietry i byli zabityja našymi snajpierami. My nazirali paniku, jakaja ŭźnikła ŭ rasijskaha padraździaleńnia, jakoje siadzieła na hetaj pazicyi. Jany ŭsio kinuli i ŭciakli».

Pavialičyć

Druhi važny faktar, jaki mocna ŭpłyvaje na chod vajennych dziejańniaŭ, — bajavy duch.

«U luboj vajnie pieramoha vyznačajecca stanam duchu tych mas, jakija na poli boju pralivajuć svaju kroŭ, — cytuje Sachaščyk Lenina i tłumačyć:

— Stanam duchu ŭkraincy nieparaŭnalna vyšejšyja. Ja sam asabista nie adzin raz bačyŭ vielmi nizki stan bajavoha duchu rasijskich padraździaleńniaŭ. Ja sam bačyŭ, jak rasijskaje padraździaleńnie zachapiła niejki abjekt. Skažam tak, šachtu. I častka ludziej zastałasia cełaju i schavałasia ŭ bietonnych zbudavańniach, a častka ludziej zastałasia zabitymi i paranienymi na prastory pierad imi, jakaja prastrelvajecca.

Adlehłaść pamiž imi — 10 mietraŭ. Da čałavieka, jaki ciažka paranieny, sam sabie dapamahčy nie moža, kryčyć, prosić ab dapamozie. Za 10 mietraŭ znachodziacca jaho pabracimy. I jany nie dapamahajuć jamu.

Ja dumaŭ, što ciapier dzień i chiba što jany nočču pryjduć i evakujujuć jaho. Rankam z dronaŭ my pabačyli pamierłych chłopcaŭ. Bačyli i tych, chto sprabuje ruchacca i poŭzać. Ich tak nichto i nie evakujavaŭ. Ab čym heta havoryć? Ab tym, što ludzi prosta znachodziacca ŭ panicy. Što stan duchu vielmi nizki. Što jany dumajuć tolki pra siabie i ni pra što bolej. Jak vyžyć samomu. I ŭ pryncypie, hety stan možna acharaktaryzavać jak stratu čałaviečaha abličča.

Tamu ja liču, što moža być adna paśpiachovaja apieracyja ŭkrainskaj armii, jakaja moža prosta abrynuć front i prymusić usio sypacca. Ja dapuskaju taki varyjant, što ŭ hetym hodzie Ukraina vyjdzie da Azoŭskaha mora. Ale dla hetaha pavinna niešta padobnaje adbycca».

Čamu niemahčyma vyzvalić Danieck

«Mienavita na Danieckim napramku navat peŭnaja techničnaja pieravaha jość u rasijan. Asabliva pa kolkaści braniatechniki. Pa kolkaści artyleryi, bojeprypasaŭ dla jaje, patronaŭ, — tłumačyć Sachaščyk situacyju z Danieckam.

— My tam vajujem u składanych umovach. Ja razumieju, što ŭkraincy skancentravali svaje namahańni na inšych učastkach frontu. Naša zadača inšaja — ściahnuć na siabie maksimalnuju kolkaść voraha. I my hetuju zadaču vykonvajem. Ale nastupać i vyzvalać Danieck nam u hetaj situacyi nie ŭjaŭlajecca mahčymym na siońnia».

Valeryj Sachaščyk adznačyŭ, što sam jon imknuŭsia b takija harady, jak Danieck, abychodzić i stvarać umovy, pry jakich praciŭnik pakinie ich sam, kab paźbiehnuć akružeńnia.

«Tamu što bai dziela vyzvaleńnia bujnoha horada — heta vializnyja achviary siarod cyvilnaha nasielnictva, vializnyja razbureńni infrastruktury. Paŭtarać toje, što zrabili rasijanie ŭ Maryupali, mnie zdajecca, Ukraina nie budzie», — tłumačyć Sachaščyk.

Hladzicie całkam:

• 38
• 0
• 1
• 2
• 0
• 10
• 10
• 0