Madel ź Biełarusi raskazała pra «jachtu kachańnia» z šejchami i zdymki ŭ kino
«Kali ja pracavała ŭ Dubai, niekatoryja dziaŭčaty, jakija mieli kantrakty z ahienctvami, pavinny byli ŭdzielničać u «love boats». Jak mnie raskazvali, kali heta tyčycca šejcha, to, kali ty jamu spadabałasia, skazać «nie» ty nie možaš».
Hościem novaha vypusku jutub-šou «Pieratrem z Chalezinym» stała biełaruskaja madel i aktrysa Eli Nova.
U madelny biznes jana trapiła, kali joj było 12 hadoŭ. U toj čas jana žyła ŭ Minsku.
«Ja paśla škoły vyrašyła pačytać hazietu i znajšła tam abviestku ab nabory ŭ škołu madelaŭ adnaho biełaruskaha madelnaha ahienctva. Ja padumała, što heta chiba što toje, čaho ja b chacieła ŭ žyćci».
Hrošy na navučańnie (200 dalaraŭ) joj dała babula. Pra samo navučańnie Eli zhadvaje:
«Ja była dziciem, dyłdaj, jakaja ničoha nie razumieje. Samaja vysokaja ŭ kłasie. U [madelnaj] škole ja niešta rypałasia, nie razumieła kastynhi, što adbyvajucca. Mianie zaprašali na ich, kali pryjazdžali jeŭrapiejskija ahienctvy. Mianie pytalisia, ci havaru ja pa-anhlijsku, a ja vyvučyła tolki adno słova — so-so. Zrazumieła, što takoje dzicia nichto nikudy nie adabraŭ».
Adnak paźniej dziaŭčyna padpisała pieršy kantrakt z ahienctvam «Tamara». Ale praź niekatory čas źjechała — chaciełasia bolšaha, čym moža dać industryja ŭ Biełarusi.
Pra pracu ŭ Dubai
Jak madel Eli pracavała dla niekalkich vialikich francuzskich damoŭ mody ŭ Dubai. Adnym ź ich byŭ Louis Vuitton.
«Kali kampanii vypuskajuć kalekcyi, vielmi časta da taho, jak jany dachodziać navat da samych krutych spažyŭcoŭ u Jeŭropie, hetyja kalekcyi laciać u Arabskija Emiraty, kab žonki šejchaŭ mahli kupić ekskluziŭnyja kalekcyi. Najmajucca madeli i arhanizoŭvajecca šou dla troch, piaci, dziesiaci čałaviek», — raskazvaje žančyna.
Eli zaŭvažaje, što sama jana jak madel nikoli nie sutykałasia ź niejkimi niepryjemnymi prapanovami, ale ŭpeŭniena, što jany jość.
«Kali ja pracavała ŭ Dubai, niekatoryja dziaŭčaty, jakija mieli kantrakty z ahienctvami, pavinny byli ŭdzielničać u «love boats». Heta kali šejchi ci inšyja bahaciei zaprašajuć da siabie na łodku ŭ anturaž madelaŭ. Jak mnie raskazvali, kali heta tyčycca šejcha, to, kali ty jamu spadabałasia, skazać «nie» ty nie možaš.
Byli sumnyja historyi ŭ Dubai, kali ź dziaŭčatami adbyvalisia niepryjemnyja situacyi prosta z-za taho, što heta zastavałasia zusim biespakarana», — raskazvaje žančyna.
Pra zdymki ŭ kino
Eli pryznajecca, što, pracujučy madellu, jana maryła pra karjeru aktrysy. Ale ŭ Dubai dla realizacyi mary nie było mahčymaści. Svoj vybar jana spyniła na Łondanie.
«Łos-Andžales dla mianie daloka, bo ja chacieła być pobač ź Biełaruśsiu. Maskva — zusim nie maja tema. Voś ja i prydumała, što Łondan heta vielmi kruta. U toj momant chiba što Suśviet mianie pačuŭ i padaryŭ čałavieka, u jakoha ja vielmi mocna zakachałasia. Akazałasia, što jon žyvie ŭ Łondanie».
Adpracavaŭšy dzieviać hadoŭ u Dubai, Eli pierabrałasia ŭ Łondan i zaklučyła tam kantrakt z madelnym ahienctvam. Paźniej jana skončyła akciorskuju škołu, dzie navučałasia try hady. Ahienctva, jakoje isnavała pry škole, prapanavała joj padpisać kantrakt.
Jak zhadvaje Eli, pieršaja jaje rola była ŭ sieryjale pra dziaŭčynu, u jakoj jość seksualny razład. Jana hrała barmienšu ŭ hiej-bary.
Siarod apošnich jaje rabot — zdymki ŭ amierykanskim spartyŭnym kamiedyjna-dramatyčnym sieryjale «Ted Łasa» (Ted Lasso).
«U «Ted Łasa» historyja była cikavaja tym, što ja zusim nie viedała, što heta za prajekt. Niešta pra futboł. Ja i futboł… Ja atrymała hetu rabotu. Sama dla siabie prydumała, što nie budu hladzieć sieryjał da zdymak, kab jon na mianie nijak nie paŭpłyvaŭ, kab pakinuć svajo ŭnutranaje adčuvańnie ad taho, jak ja chaču, kab było, a nie ad taho, jak heta mahło być čakanym. Paśla zdymak ja vyrašyła pahladzieć i była vielmi ździŭlena, nakolki heta vialiki suśvietny sieryjał».
Niadaŭna Eli źniałasia ŭ sieryjale «Undeclared war» («Nieabvieščanaja vajna») režysiora Pitera Kaśminski. Pa słovach žančyny, sieryjał ab tym, jak rasijskija internet-boty i troli šturmujuć internet-prastoru inšych krain. Tam jana ihrała supracoŭnicu FSB.
U čas razmovy Eli adznačyła, što jana hanarycca tym, što biełaruska. Pa jaje słovach, pačućcio ŭłasnaj hodnaści ŭ jaje vielmi vyrasła paśla 2020 hoda. Žančyna spadziajecca, što ŭ novaj Biełarusi budzie mahčymaść źmianić situacyju ŭ biełaruskim kiniematohrafie, kab jon pierastaŭ być «absłuhoŭvajučym aparatam» dla rasijskaj kinaindustryi.
Pamiatajecie biełaruskuju aficyjantku, jakaja stała žonkaj šejcha z Dubaja? Voś jak skłałasia žyćcio hierojaŭ hetaj kazki
Ad pakazaŭ Victoria's Secret i vokładak Vogue da zdymak u Safii Kopały. Biełaruskija madeli, jakija skaryli suśvietnyja podyumy
Draniki taksama jość: biełaruska raskazała, jak žyvie ŭ Šviecyi
Ciapier čytajuć
Ciemnaskury student u Minsku paskardziŭsia Łukašenku na darahuju koka-kołu. Užo vybačaŭsia, ale milicyja im zacikaviłasia6
Kamientary