Va Ukrainie na 15 hadoŭ turmy asudzili ŭradženca Mahilova, jaki vajavaŭ na baku Rasii i trapiŭ va ŭkrainski pałon
Uradženiec Mahilova mieŭ ukrainskaje hramadzianstva i žyŭ u Krymie. Tam jon zastaŭsia i paśla anieksii paŭvostrava Rasijaj. Jon razryvaŭ kantrakt z rasijskaj armijaj za niavypłatu hrošaj, ale potym znoŭ viartaŭsia na słužbu i vajavaŭ suprać Ukrainy, pavieryŭšy prapahandzie, piša Radyjo Svaboda.
Adzin z sudoŭ Danieckaj vobłaści asudziŭ za złačynstvy suprać asnoŭ nacyjanalnaj biaśpieki Ŭkrainy i dziaržaŭnuju zdradu ŭradženca Mahilova, hramadzianina Ŭkrainy, jaki žyŭ u Krymie da i paśla jaho aneksii Rasiejaj.
Jak adznačajecca ŭ sudovym vyraku, jaki maje ŭ svaim rasparadžeńni Svaboda, jaho asudzili na 15 hadoŭ pazbaŭleńnia voli z kanfiskacyjaj majomaści i z zabaronaj na hety ž čas pracavać na adkaznych pasadach u pradpryjemstvach roznych formaŭ ułasnaści.
Jak vyśvietliła śledztva, u lipieni 2014 hodu ŭradženiec Biełarusi pryjechaŭ ź Sievastopala ŭ Danieck i pastupiŭ na słužbu strałkom u niezakonnaje ŭzbrojenaje farmavańnie «Kalmijus» tak zvanaj «DNR» (paźniej hetuju bryhadu farmalna ŭklučyli ŭ skład Suchaputnych vojskaŭ Rasiei. — RS). Svajo žadańnie vajavać u tak zvanym «apałčeńni DNR» jon patłumačyŭ tym, što pavieryŭ paviedamleńniam, jakija tranślavalisia pa televizii paśla referendumu ŭ Krymie, ab nibyta «źvierstvach Uzbrojenych sił Ukrainy».
Na baku danieckich separatystaŭ jon vajavaŭ niadoŭha: praz try miesiacy viarnuŭsia ŭ Sievastopal, a kali Rasieja ŭ lutym 2022-ha znoŭ uvarvałasia va Ŭkrainu, u tym liku z terytoryi Biełarusi, jon znoŭ pajšoŭ dobraachvotnikam, ale ŭžo ŭ rasiejskaje vojska.
Praz try miesiacy słužby kamandziram adnaho z uzvodaŭ ahniavoj padtrymki ŭ adnoj z krymskich vajskovych častak, u lipieni 2022 hodu, jon padpisaŭ kantrakt na paŭhoda i pačaŭ jak ahniamiotčyk udzielničać u bajavych dziejańniach suprać ukrainskaha vojska. Ale praz try miesiacy, u vieraśni 2022 hodu, razarvaŭ kantrakt, bo jamu nie vypłočvali hrašovaje zabieśpiačeńnie, i znoŭ viarnuŭsia ŭ Krym.
Ale i na hetym jahonaja vajskovaja «karjera» nia skončyłasia: u kancy kastryčnika 2022 hodu jon spačatku dobraachvotna ŭładkavaŭsia na pracu ŭ vajenizavanaje achoŭnaje pradpryjemstva «Kanvoj» (taksama ŭvachodzić u skład rasiejskich vojskaŭ). Paźniej jaho pierakinuli na vajskovy palihon u Jakuck (Rasieja), dzie jon u lipieni 2023-ha znoŭ padpisaŭ kantrakt ab słužbie ŭ rasiejskim vojsku. Jaho ŭ zvańni staršaha siaržanta pryniali kamandziram adnaho z padraździaleńniaŭ motastrałkovaha pałka Ŭzbrojenych sił Rasiei.
Uradženiec Biełarusi vajavaŭ u Danieckaj, Chiersonskaj i Zaparoskaj abłaściach Ukrainy.
U krasaviku 2024 hodu ŭ časie šturmu ŭkrainskich pazycyj na danieckim kirunku jaho ŭziali ŭ pałon i pieravieźli ŭ lahier dla vajennapałonnych «Zachad-1». Va ŭsich pasiadžeńniach sudu jon udzielničaŭ praz specyjalna arhanizavanuju videasuviaź, mieŭ advakata.
Pierad abviaščeńniem vyraku jon pryznaŭ svaju vinu.
Kamientary