Spravu dvarovych čataŭ mahli prydumać sami siłaviki ŭ ramkach «śpiecyjalnaj vybarčaj apieracyi»

«Kali ŭsio začyściać, pačnuć prydumlać»

Masavyja začystki ŭ Biełarusi iduć z pačatku vieraśnia pa niekalkich kirunkach, raspaviadaje suzasnavalnik fondu salidarnaści BYSOL Andrej Stryžak.

«Jość niekalki «metavych aŭdytoryjaŭ», i adna ź ich — ludzi, jakija tak ci inakš byli zadziejničanyja ci padazrajucca ŭ tym, što jany zadziejničanyja ŭ tak zvanych dvarovych inicyjatyvach. Nahadaju, što heta za fienomien. U 2020 hodzie šmat ludziej abjadnalisia ŭ tym liku ŭ susiedskich čatach pavodle taho, što chacieli pratestavać suprać skradzienych na vybarach hałasoŭ. Šmat chto prosta daviedaŭsia pra isnavańnie adzin adnaho», — kaža Andrej Stryžak.

Ciapierašniaja situacyja — heta čarhovy prykład taho, što siłaviki navažanyja całkam začyščać pole absalutna ad usich inicyjatyŭ, jakija mohuć być, ličyć surazmoŭca.

Pradstaŭnik Hienprakuratury Valeryj Šulak paviedamiŭ tolki, što artykuły ludziam pahražajuć «surjoznyja» — da 15 hadoŭ pazbaŭleńnia voli. Adnak nie staŭ raskryvać padrabiaznaści nibyta praz tajamnicu śledstva. BYSOL nie viedaje dakładna, pa jakich artykułach karajuć ludziej.

«Moža być štości źviazanaje z tak zvanaj zdradaj dziaržavie ci niešta takoje. Bo jaki sens chavać 342 artykuł («arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich». — Zaŭv. red.), jaki ŭžo staŭ narodnym?

Dumaju, jany chutka anansujuć svaje namiery i pakažuć dla nas niejkuju novuju karcinku, što, naprykład, hetyja dvarovyja supolnaści źbiralisia Łukašenku zabić», — praciahvaje Andrej Stryžak.

Takaja karcinka ciapier patrebnaja biełaruskim uładam dla paplečnikaŭ i prychilnikaŭ, bo ŭ krainie idzie «śpiecyjalnaja vybarčaja apieracyja», adznačaje jon.

Chto prydumaŭ «jačejki», jakija pakul śpiać

Krynica «Biełsata», znajomaja ź situacyjaj, miarkuje, što masavyja aryšty — heta vynik pravakacyi siłavikoŭ, i nasamreč nichto z zatrymanych uvohule nie rabiŭ ničoha supraćzakonnaha navat u siońniašnim razumieńni zakonaŭ biełaruskimi ŭładami. Met u hetaj pravakacyi moža być dźvie, ličyć surazmoŭca. Pieršaja — zapužać ludziej pierad vybarami, druhaja — pramacać nastroi siarod tych, chto adznačyŭsia aktyvizmam u 2020 hodzie, bo siłaviki nie ŭpeŭnienyja, što całkam kantralujuć situacyju.

Jeść padstavy mierkavać, što achviarami hetaj pravakacyi stali aktyvisty pratestaŭ 2020-ha hoda, jakija na ich pačatku byli pakaranyja adnosna nievialikimi terminami źniavoleńnia ci navat administracyjna. Jany sapraŭdy mahli być źviazanyja dvarovymi čatami, dzie paznajomilisia ŭ 2020 hodzie, ale kali i padtrymlivali niejkuju suviaź u apošnija hady, to jana nie mieła ŭžo palityčnaj padaploki.

Pry hetym krynica śćviardžaje, što byli sproby z boku niekatorych asobaŭ, jakija pierastali vyklikać davier, prapanavać niejkuju «ekstremisckuju» dziejnaść. Na dumku surazmoŭcy, z takimi prapanovami mahli prychodzić padasłanyja siłavikami pravakatary.

Pra vypadki, kab ludzi ŭ ciapierašnich umovach i pry tym uzroŭni represijaŭ, jaki skłaŭsia ŭ Biełarusi, pahadžalisia na takija dziejańni, jamu nieviadoma.

Jašče adna krynica paviedamiła «Biełsatu», što byłyja ŭdzielniki dvarovych čataŭ pieryjadu 2020-ha hoda, jakija ŭžo daŭno žyvuć za miažoj, pačali apošnim časam atrymlivać prośby ad roznych padazronych asob ź Biełarusi dać kantakty pradstaŭnikoŭ słužby BYSOL, kab tyja dapamahli im evakuiravacca z krainy. Takija pytańni vyhladajuć dziŭna, bo daloka nie ŭsie biełarusy za miažoj majuć takija kantakty, a pa druhoje, jość mahčymaść naŭprost źviartacca ŭ BYSOL, tłumačyć naš surazmoŭca.

Andrej Stryžak adznačyŭ «Biełsatu», što słužby fondu čas ad času sutykajucca sa sprobami siłavikoŭ daviedacca bolš pra pracu fondu. Krynica «Biełsatu» miarkuje, što «klučom» da zadumak siłavikoŭ moža być prapahadyscki film «Biesy: kak chotiat zachvatiť Biełaruś», u jakim siarod inšaha pakazali departavanaha ŭ Biełaruś byłoho bajca pałka Kalinoŭskaha Vasila Vieramiejčyka.

• 0
• 0
• 0
• 4
• 0
• 0
• 2
• 0