Biełarusy pabiehli rabić vizy na žnivień — usio praz kancert Maksa Karža
Biełarusy źbirajucca na žnivieński kancert Maksa Karža ŭ Varšavie — dy tak aktyŭna, što ŭ vizavych ahienctvach kažuć pra napłyŭ klijentaŭ.
Supracoŭnica adnaho vizavaha ahienctva raskazała ŭ tyktoku, što atrymlivaje bahata zapytaŭ na adkryćcio šenhiena da žniŭnia.
«Tyja, chto ŭžo nabyŭ kvitok i choča źjeździć na kancert, — nie rabicie pamyłak minułaha hoda. U minułym hodzie ŭsie pahałoŭna padavalisia prosta pierad samim kancertam na hrečaskuju vizu. Šmat chto, naturalna, atrymaŭ admovy, bo ŭ Hrecyi davoli vialiki pracent admovaŭ», — rajać u ahienctvie.
Niekatoryja ź biełarusaŭ, chto paśpieŭ urvać kvitki na kancert, skardziacca ŭ tyktoku, jak składana atrymać vizu. U kamientarach im prapanujuć roznyja varyjanty, časam i zusim niečakanyja:
«Pasprabujcie ispanskuju turystyčnuju vizu zrabić».
«Čytaŭ, što praściej za ŭsio praz Francyju trapić — jana i bližej za ŭsio, i šenhien afarmlaje biez prablem».
«My tak letam pierajechali ŭ inšuju krainu dziela taho, kab naviedać kancert».
Niekatoryja kamientatary dzielacca, jak u papiarednija hady spačatku kupili kvitki na kancert, a vizu tak i nie atrymali.
«My z maładym čałaviekam taksama tak zrabili ŭ hetym hodzie. Źviarnulisia ŭ vizavy centr, vynik — dźvie admovy».
«Ja tak u minułym hodzie zrabiła. Zdahadajciesia, chto nie byŭ na kancercie?»
Što pa cenach? Naprykład, ahienctva Premium Visa (jano supracoŭničaje ź inicyjatyvaj «Dviž Minsk», jakaja rychtuje tur admysłova na kancert u Varšavie) nazyvaje samym dastupnym hrečaski šenhien. Za jaho na siońnia treba budzie zapłacić 580 rubloŭ: 280 ź ich pojdzie na konsulski i servisny zbory ŭ vizavym centry i jašče 300 — na padrychtoŭku ankiety, zapis na vizu, braniravańnie hatela i aviapieralotu, padrychtoŭku maršrutnaha lista.
Za ispanski šenhien prosiać ahułam 880 rubloŭ, za italjanski — bolš za 2500 rubloŭ. U vypadku z daražeznym italjanskim šenhienam ahienctva abiacaje, što nie treba budzie chvalavacca nakont mahčymych admovaŭ u vizie.
«Naša Niva» — bastyjon biełaruščyny
PADTRYMAĆCiapier čytajuć
Stryžak: Ja prosta haŭno, ja lažu na dnie samaj brudnaj kanavy i adtul sprabuju niešta skazać u svaju abaronu65
Kamientary
Ryhoryč, napeŭna, i sam by im vizy apłaciŭ, kab par vypuścić u vybarny čas!
Stan biełaruščyny, 2024 hod.