«Ja nie viedaju, jakoje ŭ Biełarusi hramadzianstva pravilnaje». Rasijski bramnik hulaŭ za zbornuju Biełarusi biez pašparta

Siarhiej Balšakoŭ naradziŭsia ŭ Maskvie. U maładości jon paśpieŭ trochi zhulać u Kanadzie, a potym viarnuŭsia na radzimu. Prabracca ŭ hałoŭnuju rasijskuju lihu KCHŁ jamu nie ŭdałosia, jon badziaŭsia pa druhim pa mocy čempijanacie VCHŁ, pakul piać hadoŭ tamu nie apynuŭsia ŭ Biełarusi.

U minskim «Junactvie» jon staŭ adnym z najlepšych bramnikaŭ čempijanatu krainy, navat atrymaŭ nievialiki šaniec u «Dynama» ŭ KCHŁ. Potym na paŭtara hoda iznoŭ źjeździŭ u Rasiju i viarnuŭsia — užo ŭ žłobinski «Mietałurh». Zaŭvažyli bramnika i treniery zbornaj Biełarusi: da apošniaha času FCHB lubiła naturalizavać rasijan. Jaho vyklikali na paru tavaryskich turniraŭ i dali pravieści ŭ formie zbornaj try matčy, u jakich prapuściŭ 10 šajbaŭ.

Ale, jak akazałasia, biełaruskaje hramadzianstva Balšakoŭ nie atrymaŭ. Jon uvohule nie viedaje, «jakoje hramadzianstva ŭ Biełarusi pravilnaje», piša Betnews.

«U mianie pašparta niama biełaruskaha. Ja navat nie viedaju, jak jano pravilna. Ja ŭžo kolki hadoŭ u Biełarusi i nie razumieju, jakoje tut pravilnaje hramadzianstva, jakoje niapravilnaje i jak tut uvohule ŭ mianie heta atrymałasia.

Ja chacieŭ atrymać biełaruski pašpart, kab vystupać za zbornuju. Ale my nie ŭdzielničajem ni na čempijanacie śvietu, ni na Alimpijadzie, ni na inšych mižnarodnych bujnych turnirach. A na, tak by mović, maleńkich, jak mnie skazali, dastatkova dazvołu na žycharstva. Naprykład, kali ŭ Słavieniju my jedziem, možna było jechać biez [biełaruskaha] pašparta. Ci na tur [u mai 2024-ha] taksama možna było jechać biez hramadzianstva», — raspavioŭ Balšakoŭ.

Bramnik žyvie ŭ Biełarusi pa DNŽ, jaki niadaŭna padaŭžaŭ na dziesiać hadoŭ. 

«Nie viedaju, ci jość mnie sens atrymlivać pašpart. Kali ja zastanusia ŭ ekstralizie, to, viadoma, kamandzie było b vyhadna, kab ja staŭ biełarusam, kab nie płacić lehijanierski ŭznos. Ale kali nichto hetaha nie robić — značyć, nikomu heta nie cikava», — razvažaje Balšakoŭ.

Pry hetym rasijanin hatovy hulać za zbornuju Biełarusi. Ale nie viedaje, jak być.

«Za zbornuju zaŭsiody kłasna zhulać. Ty pradstaŭlaješ honar krainy. Što možna jašče skazać? Tolki ja nie hramadzianin Biełarusi. Ja rezident, ale hramadzianstva ŭ mianie niama biełaruskaha. Tamu ja nie razumieju, što z hetym rabić», — adznačyŭ Balšakoŭ.

Na nieaficyjnych turnirach časta nie patrabujecca, kab va ŭsich hulcoŭ było hramadzianstva krainy, jakuju jany pradstaŭlajuć. A ad čempijanataŭ pad ehidaj Mižnarodnaj fiederacyi chakieja ŭsie biełaruskija zbornyja adchileny z-za padtrymki, jakuju akazvajuć ułady krainy Rasii ŭ vajnie suprać Ukrainy.

• 0
• 1
• 5
• 6
• 0
• 0
• 3
• 0