U Armienii zatrymanyja siem čałaviek pa padazreńni ŭ padrychtoŭcy teraktu
Palicyja Armienii zatrymała pa padazreńni ŭ padrychtoŭcy teraktu siamioch čałaviek, źviazanych z prarasijskaj apazicyjnaj partyjaj. U ich damach praviedzieny vobšuki, paviedamlaje Rasijskaja słužba Radyjo Svaboda.
Zatrymanyja źjaŭlajucca členami partyi Armianskaja revalucyjnaja fiederacyja (ARF), taksama viadomaj jak Dašnakcuciun. Hetaja partyja ŭvachodzić u prarasijskuju parłamienckuju kaalicyju «Aljans Armienija» pad kiraŭnictvam byłoha prezidenta Armienii Robierta Kačarana.
Śledčy kamitet Armienii paviedamiŭ, što zatrymanyja siem čałaviek, adnamu ź ich užo vystaŭlena abvinavačańnie ŭ padrychtoŭcy terarystyčnaha aktu. Imiony zatrymanych nie raskryvajucca. Pavodle infarmacyi ARF, vobšuki praciahvajucca ŭ damach šerahu deputataŭ, adzin parłamientaryj i syn inšaha aryštavanyja.
Apazicyja nazvała toje, što adbyvajecca, palityčna matyvavanym pieraśledam i asudziła dziejańni ŭładaŭ. Aryšt supaŭ z sustrečaj u Abu-Dabi pamiž premjer-ministram Armienii Nikołam Pašynianam i prezidentam Azierbajdžana Ilchamam Alijevym, pryśviečanaj abmierkavańniu detalaŭ mirnaha pahadnieńnia, jakoje pavinna pakłaści kaniec kanfliktu pamiž dźviuma krainami.
Z momantu prychodu da ŭłady ŭ Armienii paśla masavych pratestaŭ u 2018 hodzie Pašynian uziaŭ kurs na zbližeńnie z Zachadam, addaliŭšysia ad tradycyjnaha sajuźnika — Rasii.
U apošnija tydni ŭ Armienii ŭzmacniŭsia cisk na palityčnych apanientaŭ i krytykaŭ ciapierašniaha palityčnaha kiraŭnictva. Pad udar trapili jak pradstaŭniki apazicyi, tak i viadomyja hramadskija dziejačy, u tym liku archijepiskap Armianskaj apostalskaj carkvy Bahrat (u mirskim žyćci — Vazhien Hałstanian). Ich abvinavačvajuć u padrychtoŭcy dziaržaŭnaha pieravarotu, što jany kateharyčna admaŭlajuć.
Kamientary