Mašyna źnikła ź nieachoŭnaj stajanki pobač z adnoj z šmatpaviarchovak rajcentra. Vyjavili jaje kala kramy niepadalok.
Śledča-apieratyŭnaja hrupa nie zafiksavała jakich-niebudź paškodžańniaŭ aŭtamabila. Nie zakranutymi zastalisia i ŭsie rečy, što znachodzilisia ŭ im. Tym nie mienš, staranny ahlad transpartnaha srodku dazvoliŭ ekśpiertam vyjavić ślady i pradmiety, jakija mahli b mieć važnaje značeńnie dla spravy, paviedamlaje Dziaržkamitet sudovych ekśpiertyz.
Paźniej stała viadoma, što aŭtamabil uziaŭ miascovy žychar. Mužčyna ŭ stanie ałkaholnaha apjanieńnia viartaŭsia dadomu. Šlach pralahaŭ mima parkoŭki, na jakoj stajaŭ aŭtamabil paciarpiełaha. Mašyna akazałasia nie zamknionaj. Bolš za toje, klučy ad zamka zapalvańnia znachodzilisia ŭ sałonie.
Vietkaŭčanin doŭha nie razvažaŭ — sieŭ za rul i pajechaŭ u bližejšuju kramu pa novuju porcyju ałkaholu. Transpart kinuŭ na parkoŭcy pobač. Bolš jon jamu nie spatrebiŭsia. Dadomu «aŭtaamatar» adpraviŭsia pieššu.
Kali siłaviki vyjšli na śled uhonščyka, mužčyna svaju datyčnaść da spravy admaŭlaŭ. Adnak vysnovy adarałahičnaj ekśpiertyzy, jakaja ŭstanaviła supadzieńnie pachavaha śledu z uhnanaha aŭtamabila, z uzorami pachu, atrymanymi ŭ padazravanaha, kazali pra advarotnaje. Admaŭlacca stała biessensoŭna. Zaviedziena kryminalnaja sprava.
Siońnia sučasnaja kryminalistyka ŭsio čaściej źviartajecca da mietadu analizu pachavych śladoŭ. Jak patłumačyli ŭ Homielskim mižrajonnym adździele Dziaržaŭnaha kamiteta sudovych ekśpiertyz, jon abapirajecca na ŭnikalnaść pachu kožnaha čałavieka, jaki zachoŭvajecca navat paśla jaho sychodu ź miesca złačynstva. I śpiecyjalna navučanyja sabaki-detektary padčas praviadzieńnia ekśpiertyzy zdolnyja ŭłoŭlivać i identyfikavać hetyja mikračaścicy, pakinutyja čałaviekam na pradmietach abo ŭ pavietry.
Ciapier čytajuć
«Pra sustreču Łuku zaŭsiody prasili pieradać Pucinu». Šuster raskazaŭ, jak Łukašenka prapanoŭvaŭ svaje pasłuhi amierykancam9
Kamientary