U Mahilovie admianili prezientacyju knih fantasta Siarhieja Antonava
Prezientacyja mieła adbycca ŭ haradskoj biblijatecy imia Karła Marksa 16 traŭnia.
Jak śćviardžaje Siarhiej Antonaŭ, 7 traŭnia jamu patelefanavali ź biblijateki j paviedamili, što sustrečy nie budzie.
«Z abjektyŭnych pryčynaŭ, pra jakija vy sami viedajecie», — pierakazaŭ telefonnuju hutarku ź biblijatekarkaj piśmieńnik.
Pavodle Antonava, inicyjataram sustrečy vystupała sama biblijateka.
«Vidać, daviedalisia, što ja ŭ partyi BNF i što ja zaprašu na sustreču svaich siabroŭ z partyi BNF. Maje knihi — fantastyka, i jany nie majuć ničoha ahulnaha z palitykaj. I tut vyśviatlajecca, što ja zabaronieny aŭtar u Biełarusi. U Maskvie ŭ mianie prachodzić na hod nie mieniej za try prezientacyi. Nakład maich knih — 260 tysiač asobnikaŭ. Knihi pakul pradajucca i ŭ Biełarusi. Tolki adnojčy ŭ Mahilovie mnie ŭdałosia pahavaryć sa studentami piedahahičnaha ŭniviersiteta, ale, vidać, paśla zabarony ŭ biblijatecy takich sustreč naohuł nie budzie».
U biblijatecy paćvierdzili, što sustreča admienienaja.
«Tak atrymałasia, što nakładajucca dva mierapryjemstvy ŭ adzin dzień. Tam piensijaniery, i damoŭlenaść jość. My ž, vybačajcie, nie možam admianić hetuju sustreču. U nas duža zahružany travień i červień. A tam ža pačniecca adpusknaja para, i studenty paźjazdžajuć», — zajaviła pradstaŭnica administracyi čytalni.
Surazmoŭnica nie vyklučyła, što prezientacyja knih Siarhieja Antonava moža adbycca ŭ inšy čas.
Siarhiej Antonaŭ — adziny biełaruski aŭtar, jaki piša dla rasijskaj knižnaj sieryi «Suśviet mietro — 2033». U adnoj sa svaich knih Antonaŭ apisvaje stancyju «Biełaruskaja» Maskoŭskaha mietrapalitena paśla jadziernaj vajny. Mietro jon apisvaje jak śviet u minijaciury. Tyja, chto žyvie na stancyi «Biełaruskaja», uvieś čas pazyčajuć i nikomu nie addajuć pazyčanaje. Hałoŭny hieroj knihi Antonava — anarchist.
Kamientary