Прэзентацыя мела адбыцца ў гарадской бібліятэцы імя Карла Маркса 16 траўня.
Як сцвярджае Сяргей Антонаў, 7 траўня яму патэлефанавалі з бібліятэкі й паведамілі, што сустрэчы не будзе.
«З аб’ектыўных прычынаў, пра якія вы самі ведаеце», — пераказаў тэлефонную гутарку з бібліятэкаркай пісьменнік.
Паводле Антонава, ініцыятарам сустрэчы выступала сама бібліятэка.
«Відаць, даведаліся, што я ў партыі БНФ і што я запрашу на сустрэчу сваіх сяброў з партыі БНФ. Мае кнігі — фантастыка, і яны не маюць нічога агульнага з палітыкай. І тут высвятляецца, што я забаронены аўтар у Беларусі. У Маскве ў мяне праходзіць на год не меней за тры прэзентацыі. Наклад маіх кніг — 260 тысяч асобнікаў. Кнігі пакуль прадаюцца і ў Беларусі. Толькі аднойчы ў Магілёве мне ўдалося пагаварыць са студэнтамі педагагічнага ўніверсітэта, але, відаць, пасля забароны ў бібліятэцы такіх сустрэч наогул не будзе».
У бібліятэцы пацвердзілі, што сустрэча адмененая.
«Так атрымалася, што накладаюцца два мерапрыемствы ў адзін дзень. Там пенсіянеры, і дамоўленасць ёсць. Мы ж, выбачайце, не можам адмяніць гэтую сустрэчу. У нас дужа загружаны травень і чэрвень. А там жа пачнецца адпускная пара, і студэнты паз’язджаюць», — заявіла прадстаўніца адміністрацыі чытальні.
Суразмоўніца не выключыла, што прэзентацыя кніг Сяргея Антонава можа адбыцца ў іншы час.
Сяргей Антонаў — адзіны беларускі аўтар, які піша для расійскай кніжнай серыі «Сусвет метро — 2033». У адной са сваіх кніг Антонаў апісвае станцыю «Беларуская» Маскоўскага метрапалітэна пасля ядзернай вайны. Метро ён апісвае як свет у мініяцюры. Тыя, хто жыве на станцыі «Беларуская», увесь час пазычаюць і нікому не аддаюць пазычанае. Галоўны герой кнігі Антонава — анархіст.
Каментары