Naviny sportu

Haradzienskim dziaŭčatam roŭnych niama

«Alimpija» (Horadnia) čaćviorty raz zapar vyjhrała žanočy čempijanat Biełarusi pa baskietbole. U finalnaj seryi da troch pieramoh kamanda pieramahła barysaŭskuju «Biarezinu-BDAFK» — 3:0. Niakiepskija šancy na čempijonstva majuć i haradziency-mužčyny. 15 krasavika pačynajucca paŭfinały ŭ nacyjanalnym pieršynstvie. «Horadnia-93» hulaje ź viciebskim «Lakamatyvam-KiS», a mienski «Vitalur» — z asipovickim AZAA. Seryja — taksama da troch pieramoh.

Start čempijanatu

U najbližejšyja vychadnyja startuje čempijanat Biełarusi pa futbole. U subotu buduć zhulanyja čatyry matčy: MTZ-RIPA (Miensk) — «Dynama» (Miensk), «Šachcior» (Salihorsk) — BATE (Barysaŭ), «Słavija» (Mazyr) — «Tarpeda» (Žodzina), «Dniapro-Transmaš» — «Homiel». U niadzielu projduć try astatnija pajadynki: «Dynama» (Bieraście) — «Daryda» (Ždanovičy), «Lakamatyŭ» (Miensk) — «Zorka-VA-BDU» (Miensk), «Nioman» (Horadnia) — «Naftan» (Navapołacak).

Pavodle rašeńnia Biełaruskaj federacyi futbołu, tury biełaruskaha čempijanatu buduć prachodzić u vychodnyja, a telekanał «Ład» abiacaje pakazvać adzin z matčaŭ u žyvym etery.

Kab usie tak łajalisia

Rasiejski futbolny sajuz (RFS) moža nakłaści štraf na paŭabaroncu maskoŭskaha «Dynama» i najlepšaha hulca zbornaj Biełarusi-2004 Maksima Ramaščanku. Za dziesiać chvilin da zakančeńnia matču rasiejskaj premjer-lihi «Dynama» (Maskva) — «Saturn» (Ramienskaje) arbitar sustrečy Siarhiej Fursa vydaliŭ z pola biełarusa, a taksama hulca «Saturnu» Valera Jesipava za toje, što niecenzurna łajalisia adzin na adnaho.

Ramaščanka paśla matču mocna ździviŭsia: «Kali za mat kožnaha vyhaniać z pola, to da kanca sustrečy nichto nie dahulaje». Futbalistam, pavodle dyscyplinarnaha rehlamentu RFS, pahražaje štraf u 100 tys. rasiejskich rubloŭ i dyskvalifikacyja na čatyry hulni.

Mabilnik — najlepšy siabar trenera

Trener londanskaha futbolnaha klubu «Čełsi» Žaze Muryńju byŭ dyskvalifikavany na dva matčy Lihi čempijonaŭ — sustrečy adnoj čaćviertaj finału miž «Čełsi» i «Bavaryjaj» (6 i 12 krasavika). Pieršy matč, što prajšoŭ na minułym tydni, partuhalski specyjalist sumlenna adsiedzieŭ u padtrybunnym pamiaškańni. Ale niamieckija žurnalisty — a «Bavaryja» sastupiła ź likam 2:4 — padazrajuć, što nia ŭsio było čysta. Tak, žurnalisty «Bild» kažuć, što trener hałkiperaŭ londanskaha klubu Silvinu Łoŭru padčas druhoha tajmu trojčy adychodziŭ u padtrybunnyja pamiaškańni, i paśla kožnaha ź jahonych viartańniaŭ «Čełsi» pravodziŭ zamieny. A trener londancaŭ pa fizpadrychtoŭcy Ruj Faryja pravioŭ uvieś matč, niahledziačy na vielmi ciopłaje nadvorje, u šapcy. Žurnalisty namiakajuć na toje, što ŭ partuhalca na hałavie było schavanaje niejkaje prystasavańnie dla suviazi z hałoŭnym treneram. Dla Muryńju heta nie ŭpieršyniu. Dva hady tamu, kali jon byŭ treneram «Portu», padčas paŭfinal-naha matču Kubku UEFA z rymskim «Łacyjo» na jaho taksama była nakładziena dyskvalifikacyja. Ale Muryńju pasłaŭ na łavu treneraŭ bolš za tryccać esemesak. «Portu» tady paśpiachova prajšła paŭfinał i ŭrešcie vyjhrała Kubak UEFA.

Kiepkieter sydzie praz hod

Znakamity dacki čarnaskury biahun Uiłsan Kiepkieter zajaviŭ pra toje, što zavieršyć svaju spartovuju karjeru paśla čempijanatu Eŭropy-2006, što maje prajści ŭ švedzkim Hioteborhu. «U 1995 ja vyjhraŭ u Hioteborhu pieršy tytuł, tam ja maju namier i zaviaršyć vystupleńni».

Uiłsan naradziŭsia ŭ 1973 h. u Kienii, ale kolki hod tamu pryniaŭ hramadzianstva Danii. «Kipkieter šmat daŭ jak lohkaj atletycy naahuł, tak i dackamu sportu ŭ pryvatnaści. Jaho budzie nie chapać na lohkaatletyčnych placoŭkach śvietu», — z sumam zaznačyŭ pradstaŭnik Federacyi lohkaj atletyki Danii.

AR

• 0
• 0
• 0
• 0
• 0
• 0
• 0
• 0