«Газпром»: Мы пакуль не атрымлівалі ад Беларусі афіцыйнага адказу на паведамленьне аб скарачэньні паставак газу
ААТ «Газпром» дагэтуль не атрымаў ад беларускага боку афіцыйнага адказу на сваё паведамленне аб 45‑працэнтным скарачэнні паставак газу з 3 жніўня. Пра гэта БелаПАН паведамілі 2 жніўня ў расійскім газавым канцэрне.
Нагадаем, 1 жніўня «Газпром» накіраваў на адрас выканаўцы абавязкаў генеральнага дырэктара ААТ «Белтрансгаз» Уладзіміра Маёрава афіцыйнае паведамленне аб скарачэнне аб’ёмаў газавых паставак Беларусі ў сувязі з невыкананнем абавязацельстваў па аплаце атрыманага ў першым паўгоддзі 2007 года газу і адсутнасцю гарантый аплаты. Паводле звестак расійскага канцэрна, запазычанасць Беларусі ў студзені‑чэрвені склала 456,16 млн. долараў.
Пасля атрымання афіцыйнага папярэджання памочнік міністра энергетыкі Беларусі Андрэй Жукаў паведаміў, што Мінск рыхтуе «Газпрому» прапановы па ўрэгуляванні пытанняў, якія, паводле яго слоў, абмяркоўваюцца ў беларускім урадзе з удзелам кіраўніцтва ААТ «Белтрансгаз». Аднак ва ўрадзе гэтую інфармацыю не пацвярджаюць.
Між іншым у інтэрв’ю агенцтву Рэйтэр прадстаўнік «Газпрома» паведаміў, што «беларусы нічога не прапанавалі, ніякіх варыянтаў па вырашэнні праблемы доўгу». Цяперашняя сітуацыя, паводле яго слоў, «прынцыпова адрозніваецца ад падзей шасцімесячнай даўніны». «Яны (беларускі ўрад. — БелаПАН.) грошы са спажыўцоў збіралі ў поўным аб’ёме. Апрача таго, мы заплацілі 625 мільёнаў долараў за «Белтрансгаз». Так што ўсе гэтыя іх тлумачэнні нам незразумелыя», — зазначыў прадстаўнік «Газпрома».
Пра сваю гатоўнасць прыцягнуць для «Белтрансгазу» крэдытныя рэсурсы да 500 млн. долараў заявіў 1 жніўня старшыня праўлення «Белгазпрамбанка» Віктар Бабарыка. Паводле яго слоў, магчымасць выдачы крэдыту «існуе і выкладзена ў канкрэтай прапанове», але справа аб выдачы пазыкі «не за банкам, а за атрымальнікам крэдыту».
На думку В.Бабарыкі, у Беларусі ёсць некалькі варыянтаў аплаты доўгу за пастаўлены газ. У прыватнасці, аплата з золатавалютнага рэзерву краіны, прыцягненне замежных рэсурсаў, у тым ліку расійскіх; датэрміновы продаж акцый «Белтрансгазу», размяшчэнне акцый на дэпазіт, а таксама аплата доўгу ў беларускіх рублях, калі «расійскі бок будзе ведаць, куды выкарыстаць гэтыя грошы», напрыклад на аплату пакета акцый «Белтрансгазу».
Цяпер чытаюць
Хто той рэдактар беларускай Вікіпедыі, якога пасадзілі на два гады за «дыскрэдытацыю Беларусі»23
Каментары