Вольгу Мікалайчык за акцыю ва ўгодкі Плошчы-2010 аштрафавалі на 2 мільёны
Суд над рэжысёрам Вольгай Мікалайчык 20 снежня ўсё ж такі адбыўся.
Калі Вольгу раніцай прывезьлі з Маскоўскага РУУСа ў суд, высьветлілася, што згубіўся пратакол. Паседжаньне перанесьлі на 14-ю гадзіну. Пратакол так і не знайшлі, таму склалі новы. Вольга яго не падпісала, таму што, на яе думку, там было шмат нестыковак: сьцяг быў названы бела-чырвоным, паводле дакумэнта, у 21:03 паступіў сыгнал у міліцыю пра несанкцыянаваны пікет, а ў пратаколе напісана, што затрымалі Вольгу ў 20:30. Сьведкі з боку міліцыянтаў у Маскоўскі суд так і не зьявіліся.
Тым ня менш, а 17-й гадзіне судзьдзя Тацяна Мотыль пачала разгляд справы. Дзякуючы адвакату, некаторыя нестыкоўкі ўдалося зьняць. Прыкладна паўгадзіны доўжылася паседжаньне. У выніку судзьдзя аштрафавала Вольгу Мікалайчык на 2 мільёны рублёў.
Вольга Мікалайчык была затрыманая ўвечары 19 сьнежня каля Чырвонага касьцёлу, дзе ладзілася акцыя памяці падзей 19 сьнежня 2010 году.
Каментары