У кастрычніку спажывецкія цэны на тавары і паслугі ў Беларусі выраслі ў параўнанні з вераснем на 0,8%, са снежнем 2014 года — на 10,1%. Такія звесткі апублікаваў сёння Нацыянальны статыстычны камітэт.
Цэны на харчовыя тавары за месяц выраслі на 1,5%. Больш за ўсё падаражэлі: агародніна — на 51,5%, цукар — на 4,8%, алей (акрамя аліўкавага) — на 4,4%, яйкі — на 4,1%, хлеб і хлебабулачныя вырабы — на 2,6%.
Знізіліся цэны на малако і малочныя прадукты — на 0,1%, муку пшанічную — на 0,1%, сыры — на 0,9%, фрукты — на 1,4%, бульбу — на 7,1%.
Цэны на нехарчовыя тавары за месяц выраслі на 0,8%. Больш з ўсё падаражэлі: парфумерна-касметычныя тавары — на 1,8%, тканіны — на 1,8%, пісьмовыя прылады — на 1,7%, абутак — на 1,6%. Зніжэння цэн на нехарчовыя тавары ў кастрычніку не зафіксавана.
Цэны і тарыфы на платныя паслугі на працягу месяца знізіліся на 0,8%. У прыватнасці, тарыфы ЖКГ, паводле звестак Белстата, знізіліся на 2,1% за кошт зніжэння тарыфаў на водазабеспячэнне (на 10,9%). Паслугі пасажырскага транспарту паменшыліся на 3,9%: паслугі паветранага транспарту сталі танней на 3,1%, аўтамабільных міжгародніх зносінаў — на 0,2%, чыгуначных міжнародных зносінаў — на 12,2%.
Таксама на 1,5% патаннелі санаторна-аздараўленчыя паслугі, на 0,5% — турыстычныя.
Падаражэлі бытавыя паслугі — на 0,6%, паслугі сувязі — на 0,1%, вышэйшай адукацыі — на 0,4%, медыцынскія паслугі — на 0,7%. Паслугі ў сферы культуры выраслі ў цане на 1,7%: наведванне тэатраў падаражэла на 2,5%, кінатэатраў — на 1%, мерапрыемстваў канцэртных арганізацый — на 3,5%.
***
Нагадаем, прымаючы 9 лістапада з дакладам міністра фінансаў Уладзіміра Амарына, Аляксандр Лукашэнка запатрабаваў скараціць інфляцыю да адназначнага паказчыка. «Беларусі аб'ектыўна нельга мець вялікую інфляцыю, — заявіў ён. — Лепш няхай яна будзе адназначнай. Тады ўжо людзі зразумеюць, што і ў наступным годзе ў нас інфляцыя будзе зніжана. Нават калі цяжка будзе з бюджэтам. Прыярытэт — скарачэнне інфляцыі».
Каментары