На ўправе Партыі БНФ 29 траўня прайшла прэзэнтацыя выдадзенага незарэгістраваным праваабарончым цэнтрам «Вясна» зборніку «Прага вясны»
Кніга расказвае пра крымінальныя справы супраць актывістаў апазыцыі, што дайшлі да суду цягам мінулага году. Дзень прэзэнтацыі быў абраны невыпадкова — менавіта 29 траўня год таму быў вынесены прысуд па справы пяцёх «маладафронтаўцаў».
Ідэя стварэньня такога зборніка належыць Алесю Бяляцкага, усю рэдактарскую і арганізацыйную працу выканала Алена Лапцёнак.
Віцэ‑прэзыдэнт Міжнароднай фэдэрацыі правоў чалавека Алесь Бяляцкі ва ўступным слове сказаў, што заўсёды цікава ведаць пра пэўнага актывіста ня толькі з сухой хронікі супраціву, але таксама, што гэта за чалавек, чым ён жыве, пра што думае, чым цікавіцца.
«Гэта, як чытаць лёс франтавікоў. У кожнага свая гісторыя, трагедыя, змаганьне. Мне здаецца, што кніга змагла адлюстраваць дух эпохі», — кажа Алесь Бяляцкі.
Праваабаронца з сумам адзначыў, што ў наступным годзе падобная кніга будзе больш тоўстая. Адзін «Працэс чатырнаццаці» па ўдзельніках амаль цалкам перабівае леташніх фігурантаў крымінальных справаў.
Агулам кніга расказвае пра пятнаццаць чалавек, які прайшлі праз крымінальныя суды за палітычную дзейнасьць — Кастуся Лукашова, Зьмітра Хведарука, Барыса Гарэцкага, Алега Корбана, Аляксея Янушэўскага, Насту Палажанку, Валера Шчукіна, Андрэя Клімава, Насту Азарку, Івана Шылу, Яраслава Грышчэню, Зьмітра Дашкевіча, Натальлю Ільініч, Артура Фінькевіча. Напрыканцы зборніка таксама пералічаюць тыя справы, якія не пасьпелі скончыць у 2007 годзе ці спынілі.
На прэзэнтацыі прысутнічалі многія з герояў кнігі. Андрэй Клімаў, які ўжо тройчы адбываў турэмнае пакараньне за сваю палітычную дзейнасьць, сказаў: «Я не хачу казаць патасных словаў, але людзі зь «Вясны» літаральна выратавалі мне жыцьцё».
Прысутныя таксама павіншавалі з днём нараджэньня яшчэ аднаго героя зборніка Аляксея Янушэўскага, якому споўніўся дваццаць адзін год.
Аўтарамі кнігі сталі беларускія незалежныя журналісты, сярод якіх і аўтары «Нашай Нівы».
Цяпер чытаюць
Фіналістак конкурсу «Міс Беларусь — 2025» вывелі на сцэну ў касцюмах з цытатамі Лукашэнкі11
Каментары