Серыялы сталі неад’емнай часткай сучаснага жыцця. Людзі нярэдка ў сацыяльных сетках задаюцца пытаннем, што б паглядзець новага, калі сканчваецца іх любімы серыял. «Наша Ніва» зрабіла сваю суб’ектыўную падборку найлепшых серыялаў гэтага лета.
«Вельмі дзіўныя рэчы» (Stranger Things)
Навуковая фантастыка, трылер, ЗША. 1-ы сезон
Адзнака на IMDB: 9,1 з 10
Безумоўна, найлепшая прэм’ера гэтага лета. У глухой амерыканскай правінцыі, штаце Індыяна, робяцца зусім невытлумачальныя рэчы. Раптоўна знікае 12-гадовы хлопчык Уіл Баерс. Расследаванні кожны сам па сабе пачынаюць сям’я Уіла, сябры, паліцыя. Кожны з іх выходзіць на вельмі значныя сляды ў гэтай справе…
Галоўную ролю ў фільме выканала славутая Вайнона Райдэр, але асабліва варта звярнуць увагу на ігру выканаўцаў дзіцячых роляў. Асабліва 12-гадовай брытанкі Мілі Бобі Браўн, якая сыграла дзяўчынку па імені Адзінаццаць. Вы сапраўды будзеце ўражаныя.
Чаму «Вельмі дзіўныя рэчы» выклікалі такі энтузіязм гледачоў? Па-першае, бо гэта вельмі пранізлівы фільм. Па-другое, гэты фільм поўны ўсялякіх цытат і перайманняў. Ён адначасова нагадвае вельмі многія фільмы і кнігі і разам з тым не падобны ні на што іншае.
Калі пачнеце глядзець, то памятайце, што серыял зацягвае, і што можаце не заўважыць, як праглядзелі ўсе 8 серый сезона.
«Містэр Робат» (Mr. Robot)
Тэхнатрылер, ЗША. 2-і сезон
Адзнака на IMDB: 8,8 з 10
Эліят Алдэрсан — малады кібер-інжынер, які працуе на кампанію па інфармацыйнай бяспецы днём, а ўначы займаецца хакерствам, забяспечваючы ахову сваіх блізкіх і простых жыхароў. Эліят пакутуе ад дэпрэсіі, параноі і нарказалежнасці, што ўвесь час ускладняе ягонае жыццё. Псіхааналітык маладога хакера спрабуе даведацца, якой мэты хоча дасягнуць падлетак, не здагадваючыся пра ягоныя праграмісцкія здольнасці.
Галоўны герой верыць у тэорыю змовы. Аднойчы, патрапіўшы ў хакерскую суполку, ён разам з камандай спрабуе ўзламаць усю сістэму самай буйной карпарацыі, дзеля вызвалення ўсіх жыхароў ад крэдытаў і пазык…
«Містэр Робат» уражвае непрадказальным і заблытаным сюжэтам. Кожная серыя ўяўляе з сябе асобную гісторыю. Серыял спадабаецца праграмістам і анархістам — імкненне людзей да змагання супраць падману карпарацый і ўлады ярка падкрэсліваецца ў сюжэце.
«Прапаведнік» (Preacher)
Чорны гумар, драма, ЗША. 1-ы сезон
Адзнака на IMDB: 8,3 з 10
Адразу адзначым, што пачынаць глядзець серыял варта чалавеку падрыхтаванаму ў чорным гумары. Напрыклад, вы глядзелі фільм «Догма»? Калі не лічыце яго блюзнерскім, то бярыцеся смела за «Прапаведніка».
Джэсі Кастэр з’яўляецца прапаведнікам у невялічкай тэхаскай царкве. Ягоны прыход у заняпадзе, сам Кастэр жлукціць віскі і сябруе з вампірам. Ён у кроку ад таго, каб усё гэта кінуць і з’ехаць куды-небудзь далёка-далёка, але яго стрымлівае абяцанне бацьку, а таксама вера ў Бога. І, як тое бывае ў серыялах, у адзін цудоўны дзень усё мяняецца…
«Прапаведнік» з’яўляецца адаптацыяй аднайменнага комікса. Гэта ўжо не першая спроба яго экранізацыі, але дакладна самая ўдалая.
«Тыран» (Tyrant)
Драма, ЗША. 3-і сезон
Адзнака на IMDB: 7,9 з 10
У выдуманай мусульманскай дзяржаве Абудзін нечакана памірае стары дыктатар. Прэзідэнтам становіцца ягоны сын Джамаль аль-Фаед. Ягонаму брату Басаму, які адарваўся ад Абуддзіна, працаваў лекарам у ЗША, не падабаюцца метады кіраўніцтва Джамаля. Ён марыць пра дэмакратычную будучыню сваёй радзімы.
У гэтым фільме мноства адсылак да падзей нашага часу: арабская вясна, Ісламская дзяржава і г.д. Фільм дазваляе крыху зразумець механізмы дыктарскіх дзяржаваў і які цяжкі пераход ад аўтарытарызму да дэмакратыі.
«Завучы» (Vice Principals)
Камедыя, ЗША. 1-ы сезон
Адзнака на IMDB: 7,8 з 10
Суворыя школьныя будні ва ўсёй красе. У дырэктара адной з школ Алабамы смяротна хворая жонка, ён вырашае сысці з працы, каб прысвяціць ёй час. Двое ягоных намеснікаў — Ніл Гэмбі і Лі Расэл — не без падставаў мяркуюць, што зоймуць крэсла дырэктара. Аднак у апошні момант у школу запрашаюць спецыяліста звонку.
Гэмбі і Расэл, якія ненавідзяць адзін аднаго, заключаюць часовы саюз, каб звергнуць новага дырэктара. Яны часта трапляюць у зусім анекдатычныя сітуацыі.
Варта адзначыць, што «Завучы» — гэта бескампрамісны і жорсткі гумар. Магчыма, не кожнаму ён прыдзецца да спадобы.
«Уэйвард Пайнс» (Wayward Pines)
Трылер, ЗША. 2-і сезон.
Адзнака на IMDB: 7,6 з 10
Аматарам культавага «Твін Пікса» гэты фільм павінен спадабацца. Агент спецслужб Ітан Бёрк прыязджае ў гарадок Уэйвард Пайнс, штат Айдаха. Гэта вам не зразумелыя Нью-Ёрк і Лос-Анжэлес, гэта загадкавая амерыканская глыбінка, дзе можа адбыцца ўсё, што заўгодна.
Бёрк вельмі хутка разумее, што ў гарадку адбываюцца страшныя рэчы. Агент спрабуе збегчы, каб не загінуць у Айдаха. Нічога не атрымліваецца — горад з усіх бакоў акружаны сцяной. Толькі бліжэй да канцоўкі першага сезона вы зразумееце, у чым тайна гэтага гарадка ў соснах.
Сезоны атрымаліся вельмі розныя ў сваёй танальнасці. Першы сезон «Уэйвард Пайнса» атрымаўся містычным, другі — жорсткая антыўтопія. Працяг будзе.
«Паміж» (Between)
Навуковая фантастыка, драма, Канада. 2-і сезон
Адзнака на IMDB: 5,9 з 10
У малым гарадку нечакана пачынаюць паміраць усе, хто старэйшы за 21 год. Жыхарамі застаюцца толькі дзеці і падлеткі. Горад узяты ў аблогу людзьмі з аўтаматамі, улады палохаюцца, што загадкавы вірус можа перапаўзці на астатнюю частку краіны.
Сюжэт амаль як у нобелеўскага лаўрэата Жазэ Сарамагу. У ягоных «Слепаце» і «Перабоях у смерці» людзі таксама пастаўленыя ў экстрэмальныя ўмовы. У такія моманты з кожнага персанажа пачынае лезці ягоная сутнасці: хтосьці становіцца героем, хтосьці — нягоднікам.
Як выжываць у свеце, калі ты ведаеш, што дзень 22-годдзя стане апошнім?
Каментары