Новы Апостальскі Нунцый прыляцеў у Беларусь: Папа Францішак запэўніў, што знойдзе час і магчымасць для візіту сюды
18 жніўня ў Беларусь прыбыў новы Апостальскі Нунцый у Рэспубліцы Беларусь біскуп Габар Пінтэр. Самалёт з іерархам на борце прызямліўся ў Нацыянальным аэрапорце «Мінск» апоўдні.
Прывітаць Апостальскага Нунцыя ў залу чакання прыбылі ўсе члены Канферэнцыі Каталіцкіх Біскупаў у Беларусі на чале з Мітрапалітам Мінска-Магілёўскім арцыбіскупам Тадэвушам Кандрусевічам.
«Я вельмі рады ступіць нарэшце на беларускую зямлю. Было вельмі цікава назіраць з самалёта, якая ж прыгожая краіна Беларусь! У многім яна нагадала мне пра Венгрыю — так шмат палёў таксама і ў маёй краіне, — зазначыў іерарх. — На гэты момант я на 100 працэнтаў гатовы для працы на карысць Касцёла ў Беларусі, для вашай краіны і для людзей у вашай краіне. Але гэта не толькі заданне, гэта яшчэ і радасць для мяне».
Гаворачы пра свой прыезд, біскуп Габар Пінтэр адзначыў, што яго прыезд у Беларусь больш, чым проста візіт:
«Гэта не толькі візіт, я застаюся тут. Цікава атрымалася з фармулярам, які мне трэба было запоўніць у самалёце — да якой даты я тут прабуду. Запаўняючы яго, я нічога не напісаў, таму што застануся тут — спадзяюся, на доўгі час (усміхаецца — заўв. аўт.)»
Іерарх дадаў, што яго першапачатковым заданнем стануць сустрэчы з біскупамі, святарамі, вернікамі і прадстаўнікамі дзяржаўнай улады
«Спачатку я павінен увайсці ў курс спраў па многіх рэчах — становішча вернікаў у Касцёле, дыялог з Праваслаўнай Царквой і інш. — падкрэсліў біскуп. — У першыя чатыры-шэсць месяцаў маім заданнем стане знаёмства з Касцёлам у Беларусі і людзьмі тут — палітыкамі, біскупамі, з вернікамі, святарамі, манахінямі…
Прыблізна ў кастрычніку адбудзецца сустрэча з прэзідэнтам Беларусі. Найперш я павінен пазнаёміцца з той рэальнасцю, якая ёсць у Беларусі. Пазней прыйдуць і іншыя заданні».
Прыгадваючы апошнюю сустрэчу са Святым Айцом Францішкам, Апостальскі Нунцый дадаў, што нядаўна размаўляў з Пантыфікам:
«Я бачыўся з Папам Францішкам 13 дзён назад і практычна першае, аб чым зайшла гаворка, гэта апошні візіт Прэзідэнта Аляксандра Лукашэнкі ў Рым і яго сустрэча з Пантыфікам, а таксама запрашэнне ў Беларусь.
Папа Рымскі сказаў, што мы знойдзем час і магчымасць для гэтага візіта. Я не магу сказаць, калі ці як, але думаю, што сказанае Пантыфікам — штосьці пазітыўнае для Беларусі».
Літва зноў зачыніла мяжу з Беларуссю — ізноў шары з кантрабандай9
Каментары