Сайлент Хіл (Silent Hill)
ЗША–Японія–Францыя, 2006, каляровы, 127 хв.
Жанр: Фільм жахаў паводле аднайменнай кампутарнай гульні.
Адзнака: 6,5 (з 10).
Каб выбавіць прыёмную дачку ад кашмараў, гераіня едзе ў гарадок Сайлент Хіл. У мястэчку, якое калісьці згарэла дашчэнту, дзіця зьнікае…
Замест сьнегу ў горадзе сыплецца попел, набрыняюць крываваю цьвільлю муры, а ў сутарэньнях курчацца самапальныя монстры. З скавытаньнем сырэнаў прыходзіць цемра – а разам зь ёю легіёны інсэктаў з чалавечымі тварамі і пірамідагаловы кат зь вялізарным нажом.
Для фанаў гульні – падказкі ў зяпах трупаў; для ўсіх астатніх – дэкарацыі й гукавая атмасфэра. Хаця сюжэт то кампутарна-нудны, то ліхаманкава-блытаны, каштоўнасьць фільму – у архаічных вобразах, стоеных у глыбінях калектыўнае псыхікі.
Рэжысэр Крыстаф Ганс («Брацтва ваўка») і сцэнарыст Роджэр Эйвары («Крымінальнае чытво») радыкальна дэманізуюць жанчыну.
Першапачатковы сцэнар не прадугледжваў пэрсанажаў-мужчынаў. Маці, дачка, фанатычка, старая… І хаця Сайлент Хіл – горад нячутнага жаночага крыку, ягоныя страхі – мужчынскія.
У горадзе бог – жанчыны.
І гэтыя жанчыны – дэманы.
Андрэй Расінскі
Каментары