У Слуцку 77-гадовая бабуля прыйшла па пенсію, а ёй сказалі, што яна памерла. І так было два разы
77-гадовая жыхарка вёскі Амговічы прыехала ў банк, што знаходзіцца ў Слуцку, каб атрымаць пенсію са свайго рахунку. А аператар банка паведаміла ёй, што «рахунак заблакаваны з прычыны смерці ўкладчыка» — гэта значыць яе.
Святлана Аляксееўна (імя змененае — Рэд.) з цяжкасцю апамяталася і стала тлумачыць, што раней памёр яе муж. А сама яна, вось, жывая. Паказала і свой пашпарт. Яна патлумачыла супрацоўніку банка, што пасля смерці мужа была ў натарыуса па справах спадчыны. Супрацоўнікі банка раіліся і пенсію жанчыне выдалі. Гэта здарылася ў снежні.
Учора, 28 студзеня, пенсіянерка са сваёй сваячкай зноў прыехала ў банк, але калі хацела атрымаць грошы са свайго ўкладу, ёй зноў адмовілі. Супрацоўніца банка сказала: «Рахунак заблакаваны па прычыне смерці ўкладчыка» і сама здзівілася: як такое можа быць? Стаіць жывы чалавек, а рахункі заблакаваныя па прычыне смерці.
Жанчына перажыла шок. Супрацоўнікі банка не выдалі грошы, нягледзячы на тое, што бачылі сваю кліентку жывой, і яна падала ўсе неабходныя дакументы. Святлана Аляксееўна сказала супрацоўніцы банка, што месяц таму ўжо была падобная сітуацыя, і тады грошы ўсё ж яна атрымала.
Наведвальніц прасілі пачакаць. Па словах сваячкі, бабуля адчула сябе дрэнна: падняўся ціск і балела галава. Жанчыны спрабавалі атрымаць тлумачэнне ад прадстаўнікоў банка і даведацца, як стала магчымай такая сітуацыя і хто ў гэтым вінаваты.
Адназначнага адказу яны так і не атрымалі, а пачулі здагадку, што пасля запыту натарыуса супрацоўнікі банка, імаверна, вырашылі, што памёр не толькі муж, але і жонка. Пенсіянерка здзіўляецца, калі рахунак заблакаваны з прычыны смерці ўкладчыка, то як банк працягваў некалькі месяцаў залічваць на яго пенсію.
Разбор працягваўся дзве гадзіны. Пасля чаго пенсіянерцы выдалі ўклад і папрасілі прабачэння. Па словах нявесткі Святланы Аляксееўны, добра, што гэтая сітуацыя скончылася паспяхова, хоць бабуля перажыла моцны стрэс.
Цяпер чытаюць
Галоўны ідэолаг Беларусі знайшоў у краіне «псеўдапатрыятычныя ячэйкі» і заклікаў да змагання з імі «адзіным баявым кулаком»23
Каментары