DarkMarket: ключавы аператар гэтай таемнай інтэрнэт-пляцоўкі затрыманы нямецкай паліцыяй
Паліцыя Ольдэнбурга затрымала 34-гадовага аўстралійца на нямецка-дацкай мяжы. Ён, імаверна, з’яўляецца аператарам гандлёвай пляцоўкі DarkMarket — найбуйнейшага інтэрнэт-рынку ў таемнай сетцы DarkNet, паведамляюць нямецкія СМІ.
DarkNet уключае ў сябе вэб-сайты, доступ да якіх магчымы толькі з дапамогай праграмнага забеспячэння, што гарантуе ананімнасць карыстальнікаў. Пасля арышту паліцыя адразу ж заблакавала сайт DarkMarket.
На DarkMarket прадавалі наркотыкі, фальшывыя грошы, крадзеныя плацежныя карткі, праграмнае забеспячэнне для ўзлому камп’ютарных сетак і іншыя нелегальныя тавары.
Сайт заблакавалі ў выніку шматмесячных расследаванняў з удзелам ФБР і іншых замежных праваахоўных органаў. На сайце налічвалася каля 500 000 карыстальнікаў і было праведзена як мінімум 320 000 транзакцый. Следчыя плануюць выявіць мадэратараў, купцоў і гандляроў DarkMarket з дапамогай захаваных на сайце звестак.
Галоўны падазраваны адмовіўся даваць паказанні. Яго памясцілі ў следчы ізалятар.
Каментары