Дарэвалюцыйны, савецкі, нестандартны і незвычайны «Аліўе». Праверце, ці ёсць у спісе ваш хатні рэцэпт
Мала хто ведае, але салат «Аліўе» раней зваўся «Маянэз з дзічыны», прыдумалі яго ў Маскве ў 1860-е гады. Аўтар рэцэпта — расійскі кухар французскага паходжання Люсьен Аліўе. Але з прыходам савецкай улады салат у 1920-я гады пераназываюць у «Сталічны», з яго знікаюць усе дарагія інгрэдыенты, што зразумела для таго перыяду. А вось сучасны салат «Аліўе» гісторыяй паходжання, па адной з версій, абавязан Айчыннай вайне. З-за дэфіцыту прадуктаў курыцу ў салаце замяніла танная вараная каўбаса. Так бліжэй да 1970-х гадоў гэтая страва стала звыклай часткай любых свят і дайшла да нашых дзён. «Наша Ніва» падабрала для вас самыя розныя рэцэпты салаты «Аліўе».
Дарэвалюцыйны рэцэпт
Інгрэдыенты (неабходныя прадукты на адну порцыю):
- Рабчык — палова тушкі,
- Бульба — 2 штукі,
- Агуркі — 1 частка
- Салат — 3-4 лісты
- Маянэз — 1,5 стал. лыжкі
- Шэйкі ракаў — 3 часткі
- Ланспік (выпараны да стану жэле булён з мяса) — 0,25 кубкі
- Каперсы — 1 чайная лыжка
- Аліўкі — 3-5 штук
Нарэзаць бланкетамі (брусочкамі) філе рабчыка і змяшаць з бланкетамі адварной, не рассыпістай бульбы і лустачкамі свежых агуркоў. Дадаць каперсаў і алівак і заліць вялікай колькасцю маянэзу. Астудзіўшы, перакласці ў талерку, упрыгожыць ракавымі шыйкамі, лісцікамі салата-латука і ланспікам. Падаваць халодным.
Свежыя агуркі можна замяніць буйнымі карнішонамі. Замест рабчыкаў, можна браць цяляціну, курапатку і курыцу, але сапраўдны «Аліўе» гатуецца абавязкова з рабчыкаў.
Савецкі варыянт
Інгрэдыенты:
- Бульба вараная (пажадана не маладая, а старая) — 4 шт. сярэдніх
- Морква — 1 шт.
- Яйкі звараныя ўкрутую — 4 шт.
- Каўбаса вараная «Доктарская» — 300 г
- Агуркі марынаваныя (можна свежыя) — 4 шт. сярэдніх
- Гарошак зялёны кансерваваны — 1 слоік вагай 200 г
- Маянэз — 3-4 ст. л.
- Лісце пятрушкі і кропу па жаданні
- Соль
Зварыць моркву і бульбу, яйкі ўкрутую. Наразаць роўнымі па памеры дробнымі кубікамі яйкі, бульбу, каўбасу, моркву. Агуркі нарэзаць і крыху адціснуць, каб не было шмат вадкасці ў салаце. У нарэзаныя інгрэдыенты ўсыпаць гарошак (зліўшы ваду з яго), нарэзаць зеляніну, змяшаць з маянэзам. Пасаліць. Прыбраць у халадзільнік на 1 гадзіну.
Нестандартны рэцэпт
Інгрэдыенты:
- 1/2 сярэдняй вэнджанай скумбрыі
- 2 бульбіны
- 1 сярэдняя морква
- 1 свежы агурок
- 1 салёны агурок
- 3 яйкі
- 1 слоік зялёнага гарошку
- Маянэз
Адварыце, ачысціце і нарэжце сярэднімі кубікамі бульбу, моркву і яйкі.
Нарэжце сярэднімі кубікамі скумбрыю. Адкіньце на друшляк і прамыйце вадой зялёны гарошак. Нарэжце кубікамі агуркі. Змяшайце салат у глыбокай ёмістасці і запраўце маянэзам па смаку.
Незвычайны рэцэпт
Інгрэдыенты:
- 5 авакада
- 4 бульбіны
- 1 морква
- 1 цыбуліна
- 2 вараных яйкі
- 200 г крэветак
- зеляніна
- соль
- маянэз
- лісце зялёнага салата для ўпрыгожвання
Бульбу і моркву вымыць, адварыць, астудзіць, ачысціць і нарэзаць невялікімі кубікамі. Цыбулю дробна нарэзаць і абліць кіпенем. Яйкі ачысціць і гэтак жа дробна наразаць. Крэветкі адварыць і ачысціць. Зеляніну вымыць, пасекчы.
Авакада разрэзаць напалову, выдаліць костачку. Вострым нажом акуратна выразаць мякаць, пакідаючы сценкі, і наразаць яе невялікімі кавалачкамі.
Бульбу, моркву, цыбулю, яйкі, крэветкі, зеляніну і авакада змяшаць. Пасаліць, злёгку заправіць маянэзам і яшчэ раз змяшаць. Напоўніць салатам палоўкі авакада, выкласці іх на тарэлку і падаць на стол.
Чытайце таксама: Колькі каштуе накрыць навагодні стол? Лічым мінімальны бюджэт
Нежывым знойдзены ў Варшаве Зміцер Каспяровіч — 43-гадовы былы палітвязень, завербаваны КДБ6
Каментары