Літоўскія датацыі сем'ям на ацяпленне амаль роўныя беларускім пенсіям
У 2022 годзе кампенсацыі атрымлівалі 17 працэнтаў хатніх гаспадарак.
У 2022 годзе ў Літве кампенсацыі выдаткаў на ацяпленне і ваду атрымлівалі 17 працэнтаў усіх хатніх гаспадарак краіны, паведамляе літоўскае агенцтва ELTA са спасылкай на міністра сацыяльнай абароны і працы Літвы Моніку Навіцкене.
На кампенсацыю маюць права ўсе людзі з невысокімі даходамі. Невысокімі — па мерках Літвы, вядома. Калі чалавек жыве адзін, то права на датацыю ён мае, калі яго даход меншы за 357 еўра на месяц. Калі не адзін — то пры даходах ад 258 еўра на чалавека.
Для разумення: сярэдняя пенсія ў Літве на сёння складае 542 еўра, гэта каля 1560 рублёў (у Беларусі — 670 рублёў).
У 2022 годзе сярэдні памер кампенсацыі выдаткаў на ацяпленне жылля на аднаго чалавека на месяц у Літве складаў 152 еўра (каля 440 рублёў), калі чалавек жыве ў сваім доме або ў доме без цэнтральнага ацяплення і 42 еўра — калі ў доме з цэнтральным ацяпленнем.
Такім чынам, малазабяспечаныя людзі аказваюцца дадаткова абароненымі.
Прадукты і адзенне ў Літве каштуюць прыкладна столькі ж, як у Беларусі, а вось камунальныя паслугі істотна даражэйшыя. Гэта звязана як з тым, што Літва купляе нафту і газ па сусветных цэнах, а Беларусь атрымлівае ад Расіі па зніжаных, узамен за русіфікацыю і вайскова-палітычны альянс. Большыя цэны на паслугі, у тым ліку і ЖКГ, звязаныя таксама з тым, што заробкі работнікаў там у некалькі разоў вышэйшыя, чым у Беларусі.
Цяпер чытаюць
Стаў героем Магілёўскага ўнівера, збіраў фальклор, працаваў на беларусізацыю садкоў — расказваем пра Яўгена Бойку, асуджанага за салідарнасць з палітвязнямі77
Каментары