Бомбу УПАБ-1500В у Расіі ўпершыню прадэманстравалі толькі ў 2019 годзе, яна прызначана для ўдараў па высокаабароненых аб'ектах на адлегласці да 40 км.
Першае ўжыванне гэтага віда боепрыпасаў зафіксавалі некалькі тыдняў таму супраць аднаго з аб'ектаў у Чарнігаўскай вобласці на поўначы Украіны, піша ўкраінскі рэсурс Defense Express. Пра гэта яму стала вядома з уласных крыніц — на адным з абломкаў былі рэшткі маркіроўкі, якая адпавядае менавіта УПАБ-1500В.
Важыць такая кіраваная бомба 1500 кг.
Гэты боепрыпас упершыню быў прадэманстраваны ў экспартнай версіі з індэксам К029БЭ ў 2019 годзе распрацоўшчыкам «ГНПП «Рэгіён», якое ўваходзіць у карпарацыю «Тактычнае ракетнае ўзбраенне» на выставе МАКС.
Тады ж было паведамлена, што гэтая бомба ўжо прайшла выпрабаванні, пастаўлена на ўзбраенне Паветрана-касмічных сіл Расіі і атрымала першыя экспартныя замовы.
Высокая небяспечнасць УПАБ-1500В — у тым, што яна планіруючая, абсталяваная інерцыяльнай і спадарожнікавай сістэмай навігацыі і мае баявую частку вагой 1010 кг, прызначаную для знішчэння высокаабароненых аб'ектаў. Дэкларуецца, што бомбу можна скідаць за 40 км ад цэлі, для чаго самалёт-носьбіт мае падняцца на вышыню 14 км.
Адзначым, што таксама «ГНПП «Рэгіён» прадэманстравала і меншага калібру боепрыпас УПАБ-500В (індэкс К08Б), паменшаную копію УПАБ-1500В вагой 505 кг, з якіх 390 кг прыпадаюць на баявую частку пры захаванні іншых асаблівасцяў.
Выкарыстанне планіруючых бомбаў Расіяй застаецца адзінкавай з'явай. Прычым забеспячэнне высокай далёкасці палёту патрабуе ад авіяцыі палёту на значнай вышыні, што спрашчае выяўленне цэлі і яе збіццё. Магчыма, што збіты днямі ў раёне Янакіева франтавы бамбардзіроўшчык Су-34 якраз і выконваў палёт з такімі боепрыпасамі.
Цяпер чытаюць
Бульба-фітнэс: беларусы паказваюць у сацыяльных сетках, колькі бульбы выкапалі сёлета1
Каментары