Гандбольны клуб «Віцязь», які ў 2020 годзе застаўся з народам, вяртаецца ў гульню
Гандбольны клуб «Віцязь», які ў 2020 годзе фактычна вымушаны быў спыніць існаванне з-за таго, што ягоныя кіраўнікі і гульцы сталі на бок народа падчас масавых пратэстаў супраць рэжыму, заявіў «аб вяртанні на гандбольную пляцоўку пасля часовага перапынку».
Клуб паведаміў: «На гэты момант мы вядзём перамовы з афіцыйнымі прадстаўнікамі Федэрацыі гандбола Літвы і Літоўскай гандбольнай лігай аб тым, каб наш клуб дапусцілі да ўдзелу ў чэмпіянаце Літвы па гандболе».
А таксама запэўнівае: «Падчас паўзы мы нястомна працавалі над тым, каб ГК «Віцязь» вярнуўся на пляцоўку больш моцным і канкурэнтаздольным».
Таксама «Віцязь» выказаў шчырую падзяку верным заўзятарам, якія падтрымлівалі клуб падчас яго часовай адсутнасці, а таксама падзякаваў усім спонсарам і партнёрам, з якімі ён супрацоўнічаў у мінулым, і выказаў зацікаўленасць ва ўваемавыгадным супрацоўніцтве з новымі. «Разам мы будзем здольныя пабудаваць моцны клуб, які стане аб’яднальнай адзінкай беларусаў», — упэўненыя гандбалісты.
«Запрашаем усіх аматараў гандбола, аматараў спорту і прадстаўнікоў медыя стаць сведкамі нашага захапляльнага вяртання. Сачыце за абнаўленнямі нашага раскладу, аб'явамі камандаў і іншымі цікавымі навінамі — падпішыцеся на нас у сацыяльных сетках», — запрашае «Віцязь», пакідаючы свае каардынаты ў тэлеграме, інстаграме і фэйсбуку.
Клуб «Віцязь» быў заснаваны ў 2012 годзе ў Мінску. У 2020 годзе яго кіраўніцтва і спартсмены падтрымалі народныя пратэсты, а 30 верасня адмовіліся выходзіць на матч супраць магілёўскага «Машэкі», пратэстуючы супраць затрымання баскетбалісткі Алены Леўчанкі. Тады камандзе было залічана тэхнічнае паражэнне, а пазней яна ўвогуле была знятая з турніру.
«Можа, баяўся заставацца ў шлюбе са мной, бо працуе на БТ». Настаўніца, якая з'ехала праз даносы Бондаравай, распавяла пра развод і жыццё ў эміграцыі1414
Каментары