Мінабароны спыніла будоўлю новай вайсковай часці на мяжы з Украінай. Яе першыя аб’екты павінны былі здаць у сакавіку
У студзені 2024 году «Свабода» паведамляла, што пад Гомелем будуецца новы вайсковы гарадок. Цяпер выданню стала вядома, што будоўля спыненая.
Пляны збудаваць новы вайсковы гарадок і палігон у Гомельскай вобласьці, недалёка ад мяжы з Украінай, былі прапісаныя ў дзяржаўнай інвэстыцыйнай праграме і зьявіліся ўпершыню ў мінулым годзе. Месца будоўлі тады не называлася, аднак, як стала вядома «Свабодзе» ў студзені 2024 году, новы вайсковы аб’ект павінен быў зьявіцца на месцы былога піянэрскага лягеру «Чайка» непадалёк ад Гомля. Пра гэта паведамлялі мясцовыя жыхары, у рэдакцыі ёсьць фотаздымкі пашпарта аб’екта і месца, дзе разгарнулася тады будоўля.
У сакавіку 2024 году першая чарга мелася быць скончаная, такія тэрміны прапісваліся ў пашпарце аб’екта. Аднак зь невядомых пакуль прычын будоўля спынілася. Па стане на 23 кастрычніка на месцы былога лягера не зьявілася ніякіх новых будынкаў.
Крыніца «Свабоды» даслала ў рэдакцыю фатаздымкі, зробленыя на месцы новага аб’екта Мінабароны Беларусі. На іх відаць, што актыўнай дзейнасьці там не вядзецца. Пакуль што адзінае, што зрабілі будаўнікі, — гэта зьнесьлі будынкі былога піянэрскага лягеру. На аб’екце няма ні тэхнікі, ні працоўных, ні вартаўнікоў.
«Вісіць, як і раней, пашпарт аб’екта з тэрмінам заканчэньня першай чаргі будоўлі ў сакавіку. І ўсё на гэтым. Ціха, пуста. Можа, перадумалі будаваць», — кажа суразмоўца «Свабоды», які быў на месцы, дзе мае зьявіцца вайсковы аб’ект.
«Свабода» таксама атрымала спадарожнікавыя здымкі, якія пацьвярджаюць атрыманую ад крыніцы інфармацыю. На здымку са спадарожніка за 10 кастрычніка 2024 году відаць, што на тэрыторыі былога лягера не зьявілася аніякіх новых аб’ектаў. Аднак у параўнаньні са спадарожнікавым здымкам, зробленым 22 чэрвеня 2023 году, можна заўважыць высечкі лесу ў ваколіцах аб’екта.
Што за новы вайсковы гарадок і ў якім ён цяпер стане
Паводле агучанай у афіцыйных крыніцах інфармацыі, плянавалася, што на будоўлю новага вайсковага гарадка зь бюджэту ў 2023 годзе будзе выдзелена 500 тысяч рублёў, у 2024-м і 2025-м — 10 і 40 мільёнаў адпаведна. Праект меліся распачаць у 2023-м і скончыць у 2027-м.
З пашпарта аб’екта, разьмешчанага на плоце былога лягера, вынікае, што замоўнік — Упраўленьне капітальнага будаўніцтва Ўзброеных сілаў. Генэральны падрадчык — Гомельскі домабудаўнічы камбінат. Тэрміны будоўлі першай чаргі гарадка: кастрычнік 2023 — сакавік 2024 году.
«Ня выключана, што вайсковы гарадок будзе разбудаваны ня толькі на тэрыторыі былога лягера «Чайка», але і закінутых суседніх лягераў — «Галяктыка», «Лясная паляна», «Ліцейшчык». Там пакуль не вядзецца ніякай дзейнасьці, але «чужых» адтуль ужо выгналі. Напрыклад, зь піянэрскага лягера «Галяктыка» выгналі аматараў страйкболу, якія раней там стала займаліся», — сьцьвярджала раней крыніца «Свабоды».
Пашпарт будаўнічага аб’екта, здымак зроблены зімой 2024 году. Тая самая шыльда вісіць і дагэтуль.
Тэндэр на высечку лесу
Між тым 18 кастрычніка 2024 году на электроннай пляцоўцы дзяржаўных закупак зьявіўся пошук субпадраднай арганізацыі, якая магла б высекчы дрэвы і кусты, выкарчаваць пні, а таксама вывезьці адкіды на аб’екце «Будоўля вайсковага гарадка ў Гомельскай вобласьці, 3 чарга будаўніцтва, падрыхтоўчы пэрыяд».
Тэндэр абвясьціў генэральны падрадчык — Гомельскі домабудаўнічы камбінат. Субпадраднай арганізацыі за высечку лесу і ягоную прыборку абяцаюць каля 1,5 мільёна рублёў. Заяўкі прымаюцца ад 18 да 24 кастрычніка. Замову трэба выканаць у тэрмін ад лістапада 2024 году да сакавіка 2025-га.
Цяпер чытаюць
Шрайбман з калегамі прапанавалі пакрокавы план дээскалацыі адносін Беларусі і ЕС39
Каментары