Дызайнерка патлумачыла, чаму беларускія брэнды шыюць мала адзення плюс-сайз
«Ну дзе вы бачылі ў Zara шырокую размерную лінейку?»
Дызайнерка беларускага брэнду Ezhevika Вольга Дэйка расказала «Смартпрэс», што год таму брэнд пачаў адшываць хадавыя мадэлі да 52 памеру. Праўда, у меншых аб'ёмах, чым эскі-эмкі. Але плюс-сайз — балючая тэма.
«Карпулентныя дзяўчаты, як правіла, не ўпэўненыя ў сабе. І калі такая дзяўчына прымярае ў краме рэч, яна сабе не падабаецца: на малюнку ж рэч была на худой мадэлі. Усе на гэтых худых мадэляў глядзяць і хочуць выглядаць гэтак жа. Таму плюс-сайз дрэнна прадаецца, а гэта — невысокі абарот, таварныя рэшткі.
А заробак плаціць трэба, за арэнду — трэба. Брэнд жа — гэта ў першую чаргу матэматыка», — тлумачыць дызайнерка.
Акрамя таго, на вялікі памер цяжка пасадзіць выраб.
«Фігуры 42-44 памеру прыкладна аднолькавыя. Пачынаючы з 48-га, у кагосьці больш ягадзіцы, у кагосьці — жывот, у кагосьці — плечы. Адну сукенку не пасадзіць на ўсе тыпы фігур, і ў ідэале для плюс-сайз трэба рабіць вялікую асартыментную матрыцу. Камерцыйна гэта дзіка нявыгадна. Чаму цяпер так шмат аверсайзу? Не трэба затлумляцца з пасадкай!»
Вольга прызнаецца, што іх рэчы вялікіх памераў — гэта прыкладна 20% ад продажаў усіх рэчаў брэнду. І лічыць, што ў цэлым гэта не занадта перспектыўная гісторыя.
«Ёсць два сусветныя брэнды, якія дыктуюць правілы ў фэшн: Zara і H&M — і люкс яшчэ. Ну дзе вы бачылі ў Zara шырокую размерную лінейку? І вы ж ведаеце, што адбылося з Victoria's Secret пасля эксперыментаў з інклюзіўнасцю і плюс-сайз… На жаль, так уладкаваны свет».
Цяпер чытаюць
Шрайбман з калегамі прапанавалі пакрокавы план дээскалацыі адносін Беларусі і ЕС39
Каментары