Гамяльчук пашкадаваў заплаціць 3,5 рубля, а цяпер можа сесці ў турму
Пра незвычайны выпадак расказалі гомельскаму анлайн-часопісу «Белка» супрацоўнікі органаў прымусовага выканання.
У 2022 годзе мужчына атрымаў штраф памерам у 0,1 базавай велічыні за з'яўленне ў грамадскім месцы ў стане ап'янення. На той час гэта была сума ў 3,5 рубля. Аплаціць штраф трэба было цягам 30 сутак, але парушальнік пра гэта зусім не дбаў.
Час ішоў, на штраф нарастала пеня, а сам мужчына паехаў на заробкі ў Расію і пра сваю запазычанасць забыўся.
Месяц таму сілавікі атрымалі інфармацыю, што даўжнік вярнуўся на пару дзён у Гомель. Да яго адразу завіталі дзве супрацоўніцы прымусовага выканання і запатрабавалі заплаціць штраф, які да гэтага часу вырас да 24 рублёў. Аднак мужчына адмовіўся гэта зрабіць, сказаўшы, што ў яго няма грошай.
Судовыя выканаўцы вырашылі накласці арышт на мікрахвалёвую печку, у адказ на што мужчына пачаў іх выганяць з кватэры, стукнуўшы пры гэтым адну з іх мыліцай сваёй сужыцелькі.
Скончылася гэта выклікам нараду міліцыі і змяшчэннем мужчыны ў ізалятар часовага ўтрымання. Супраць яго завялі крымінальную справу за гвалт або пагрозу прымянення гвалту ў дачыненні да супрацоўніка органаў унутраных спраў.
Каментары