Гамяльчанка расказала прапагандыстам пра дрэннае жыццё ў Германіі. Яе высмеялі нават чытачы дзяржгазеты
Чарговага героя, які скардзіцца на негатыўны досвед жыцця ў ЕС, прадставіла дзяржаўная прэса Гомельскай вобласці. На гэты раз прапагандысты сабралі цэлы брыфінг, дзе эканаміст-бухгалтар «Гомельэнерга» Ганна Палеева расказала, як жа кепска беларусам на Захадзе, піша «Флагшток».
Жанчына ў змрочных тонах апісала паўгода свайго жыцця ў Германіі — нягледзячы на тое, што ў рамках спецыяльнай праграмы
сям'і бясплатна далі трохпакаёвую кватэру і выдавалі дапамогу, якой хапала на жыццё.
Але «ўвечары, ідучы па вуліцы, заўважалі, што ў вокнах не гарыць святло — людзі не ўключаюць яго ў мэтах эканоміі, таму што за камунальныя паслугі трэба шмат плаціць», скардзілася гамяльчанка. А таксама — на тое, што трэба пацвярджаць дыплом, каб уладкавацца па спецыяльнасці, і вучыць мову, а «калі няма страхоўкі, у медустанову няма сэнсу звяртацца».
Разбіраць сцвярджэнні Ганны не прыйшлося — гэта зрабілі самі чытачы абласной газеты на старонцы ў інстаграме, пакінуўшы масу каментароў пад відэа і высмеяўшы заявы гамяльчанкі.
Вось некаторыя водгукі:
«А ў Беларусі кім вас возьмуць без адукацыі і без ведання мовы?»
«Так, сапраўды! Каб жыць бясхмарна ў Нямеччыне, трэба ведаць нямецкую мову? Чаму б гэта раптам? Дзяўчына, мабыць, у ГДР ехала па бясхмарнае жыццё, але крыху спазнілася!»
«Што за трызненне. Працы цэлая куча і без мовы і без адукацыі. Незразумела, чаго чакаць курсаў [моўных], калі можна і за свой кошт пайсці ды вывучыць. А за бясплатна — вядома, стойце ў чарзе».
«А чаканне было прыехаць у іншую краіну і без мовы і адукацыі атрымаць бясхмарнае жыццё? Гэта як увогуле? Калі замежнік у РБ прыедзе без мовы і адукацыі?»
«У Нямеччыне немагчыма жыць без медстрахоўкі, гэта забаронена законам. Усе людзі застрахаваны або дзяржаўнай або прыватнай страхоўкай. Праблема трапіць да лекара ёсць, калі ў цябе дзяржстрахоўка. Але тут любы чалавек, незалежна ад статусу і становішча, атрымлівае меддапамогу ў лепшых клініках у выпадку неабходнасці.
Бабулі майго мужа было 86 гадоў. Ёй у Шарытэ зрабілі найцяжэйшую аперацыю на сэрцы. Мы нічога не даплачвалі. А мая мама ў РБ прыйшла да лекара — ёй было 58, з галаўнымі болямі, доктар сказала: ну што вы хочаце, узрост, і адправіла дадому. Так што вядома медыцына ў нас цудоўная, што ні кажы».
«У вокнах не гарыць вечарам святло, таму што людзі вячэраць у рэстаран пайшлі».
Ніводнага каментара ў падтрымку слоў Ганны пад пастом прапагандыстаў не было — пакуль не паспелі ўключыць адміністрацыйны рэсурс.
Цяпер чытаюць
Ціханоўскі — беларусам: «Калі вы чакалі знак, то вось ён». Праходзіць прэс-канферэнцыя з вызваленымі палітвязнямі2
Каментары