Hamialčanka raskazała prapahandystam pra drennaje žyćcio ŭ Hiermanii. Jaje vyśmiejali navat čytačy dziaržhaziety
Čarhovaha hieroja, jaki skardzicca na niehatyŭny dośvied žyćcia ŭ ES, pradstaviła dziaržaŭnaja presa Homielskaj vobłaści. Na hety raz prapahandysty sabrali ceły bryfinh, dzie ekanamist-buchhałtar «Homielenierha» Hanna Palejeva raskazała, jak ža kiepska biełarusam na Zachadzie, piša «Fłahštok».
Žančyna ŭ zmročnych tonach apisała paŭhoda svajho žyćcia ŭ Hiermanii — niahledziačy na toje, što ŭ ramkach śpiecyjalnaj prahramy
siamji biaspłatna dali trochpakajovuju kvateru i vydavali dapamohu, jakoj chapała na žyćcio.
Ale «ŭviečary, idučy pa vulicy, zaŭvažali, što ŭ voknach nie haryć śviatło — ludzi nie ŭklučajuć jaho ŭ metach ekanomii, tamu što za kamunalnyja pasłuhi treba šmat płacić», skardziłasia hamialčanka. A taksama — na toje, što treba paćviardžać dypłom, kab uładkavacca pa śpiecyjalnaści, i vučyć movu, a «kali niama strachoŭki, u miedustanovu niama sensu źviartacca».
Raźbirać śćviardžeńni Hanny nie pryjšłosia — heta zrabili sami čytačy abłasnoj haziety na staroncy ŭ instahramie, pakinuŭšy masu kamientaroŭ pad videa i vyśmiejaŭšy zajavy hamialčanki.
Voś niekatoryja vodhuki:
«A ŭ Biełarusi kim vas voźmuć biez adukacyi i bieź viedańnia movy?»
«Tak, sapraŭdy! Kab žyć biaschmarna ŭ Niamieččynie, treba viedać niamieckuju movu? Čamu b heta raptam? Dziaŭčyna, mabyć, u HDR jechała pa biaschmarnaje žyćcio, ale krychu spaźniłasia!»
«Što za tryźnieńnie. Pracy cełaja kuča i biez movy i biez adukacyi. Niezrazumieła, čaho čakać kursaŭ [moŭnych], kali možna i za svoj košt pajści dy vyvučyć. A za biaspłatna — viadoma, stojcie ŭ čarzie».
«A čakańnie było pryjechać u inšuju krainu i biez movy i adukacyi atrymać biaschmarnaje žyćcio? Heta jak uvohule? Kali zamiežnik u RB pryjedzie biez movy i adukacyi?»
«U Niamieččynie niemahčyma žyć bieź miedstrachoŭki, heta zabaroniena zakonam. Usie ludzi zastrachavany abo dziaržaŭnaj abo pryvatnaj strachoŭkaj. Prablema trapić da lekara jość, kali ŭ ciabie dziaržstrachoŭka. Ale tut luby čałaviek, niezaležna ad statusu i stanovišča, atrymlivaje mieddapamohu ŭ lepšych klinikach u vypadku nieabchodnaści.
Babuli majho muža było 86 hadoŭ. Joj u Šaryte zrabili najciažejšuju apieracyju na sercy. My ničoha nie dapłačvali. A maja mama ŭ RB pryjšła da lekara — joj było 58, z hałaŭnymi bolami, doktar skazała: nu što vy chočacie, uzrost, i adpraviła dadomu. Tak što viadoma miedycyna ŭ nas cudoŭnaja, što ni kažy».
«U voknach nie haryć viečaram śviatło, tamu što ludzi viačerać u restaran pajšli».
Nivodnaha kamientara ŭ padtrymku słoŭ Hanny pad pastom prapahandystaŭ nie było — pakul nie paśpieli ŭklučyć administracyjny resurs.
Chto taki Michaił Miachovič — siłavik, jaki viadzie kanał HUBAZiKa i adkazvaje za prabiŭ ludziej20
Kamientary