Што рабіць, калі вы знайшлі параненую дзікую жывёлу? У Беларусі іх лепш не чапаць — за гэта можа чакаць пакаранне

Агульныя парады — што рабіць і што не рабіць з жывёлай?

Падыходзьце да жывёлы асцярожна, каб не напалохаць яе і не пагоршыць яе стан. Памятайце, што нават параненыя і аслабленыя жывёлы могуць паводзіць сябе непрадказальна. Таксама можа быць небяспечна кранаць параненую ці хворую жывёлу голымі рукамі.

Лепш увогуле не кранаць і не карміць дзікіх жывёл — гэта можа толькі пашкодзіць. Варта звярнуцца па кваліфікаваную дапамогу, калі ў вас няма спецыялізаваных ведаў.

Калі спецыялісты рэкамендуюць даставіць жывёлу ў рэабілітацыйны цэнтр або клініку, зрабіце гэта асцярожна. Выкарыстоўвайце тоўстыя пальчаткі і коўдру або ручнік, каб ахінуць жывёлу, змясціўшы яе ў скрынку (ці іншую прыдатную ёмістасць) з вентыляцыйнымі адтулінамі. Захоўвайце цішыню і мінімізуйце кантакт, каб знізіць стрэс для жывёлы.

Што рабіць, калі вы знайшлі параненую дзікую жывёлу ў Беларусі?

Калі вы знайшлі параненую, траўмаваную ці хворую жывёлу, то вы мусіце паведаміць пра гэта або наўпрост ў мясцовае лясніцтва, або ў МУС (па нумары 102), або ў службу МНС (па нумары 101), а яны перададуць інфармацыю ў адпаведныя органы.

Пасля гэтага прадстаўнік органа выедзе на месца і вырашыць, што рабіць з жывёлай. Тэарэтычна вам могуць перадаць параненую жывёлу, але ў вас мусяць быць умовы для гэтага прапісаныя ў пастанове Міністэрства прыродных рэсурсаў і аховы навакольнага асяроддзя №16 ад 27 лютага 2007 года. Напрыклад, для казулі патрэбны вальер вышынёй не менш за 2,5 метра і плошчай ад 15 метраў, для дробных грызуноў — плошчай 0,05 метра і вышынёй ад 0,2 метра, для лася ці аленя — плошчай 50 метраў і вышынёй ад 2,5 метра.

Ёсць спіс жывёлаў (старонкі 12-18), якіх можна забраць дадому без дазволу, але іх няшмат — гэта насякомыя, некалькі відаў птушак, жаб і рапух, а таксама мышы і пацукі.

Калі вы парушыце правілы і возьмецеся лячыць жывёлу самастойна ў сябе дома, вам пагражае штраф. Згодна з артыкулам 15.32 Кодэкса пра адміністрацыйных парушэннях можна атрымаць да 20 базавых, калі вы фізічная асоба, да 50 базавых — калі прадпрымальнік і да 500 базавых, калі юрыдычная асоба.

Што рабіць, калі вы знайшлі параненую дзікую жывёлу ў іншых краінах, дзе жывуць беларусы?

У любой краіне, у якой вы знаходзіцеся, вам дапамогуць экстранныя службы, даступная па тэлефоне 112 або 911 (у залежнасці ад краіны). Але мы пашукалі рэкамендацыі для краінаў Еўропы і Паўночнай Амерыкі, у якіх ёсць вялікая беларуская дыяспара.

Мясцовыя ўлады Польшчы рэкамендуюць звяртацца ў Эка Патруль муніцыпальнай паліцыі па нумары 986, які працуе кругласутачна. Там вам параяць, што рабіць у канкрэтным месцы.

Таксама вы можаце звярнуцца ў офіс гміны (у працоўны час). Справа будзе перададзена ў прытулaк для жывёл або да ветэрынара, з якім гміна мае заключаную дамову.

У Літве варта звярнуцца ў службу 112, калі вы ўпэўненыя, што жывёле трэба дапамога ці па нумары Цэнтра ратавання дзікіх жывёл +37060572837. Абедзве службы працуюць кругласутачна.

У Латвіі, калі жывёла ў небяспецы, варта пазваніць па нумары 112 і спытацца, што рабіць. Там няма адзінай службы, якая б дапамагала жывёлам — у некаторых выпадках гэта адказнасць муніцыпалітэта, у іншых — дарожнага дэпартамента. Па нумары 112 вам падкажуць, што лепш зрабіць у вашай канкрэтнай сітуацыі.

У Грузіі няма асобнай службы менавіта для такіх выпадкаў. Вы можаце звярнуцца па нумары 112, дзе вам паспрабуюць дапамагчы, або ў муніцыпальную паліцыю (у буйных гарадах). Таксама існуе Агенцтва па ахове навакольнага асяроддзя, кантактны нумар якога — 153, але яно спецыялізуецца на дзікіх жывёлах па-за гарадамі. На гарадскіх сабаках у патрэбе спецыялізуецца буйная арганізацыя D.O.G., якая можа дапамагчы менавіта па «сабачых» пытаннях.

А Арменіі можна звярнуцца ў Міністэрства аховы прыроды па нумары +37411818559. У любым выпадку можна патэлефанаваць па нумары 911, які перанакіруе зварот у адпаведнае ведамства.

У Германіі вы можаце звязацца з муніцыпальнай паліцыяй па нумары 110. Калі выпадак тэрміновы, то звярніцеся на нумар ратавальнікаў па тэлефоне 112. Таксама ў кожным горадзе і рэгіёне дзейнічаюць службы неадкладнай ветэрынарнай дапамогі, але іх тэлефоны адрозніваюцца, а называюцца яны Tiernotruf. У любым выпадку вас на іх перанакіруюць адпаведныя службы.

У Чэхіі ёсць служба для ўсіх такіх выпадкаў — zvirevnouzi.cz. Тут ёсць тэлефон «ахоўных станцый» па ўсёй краіне. Існуе і гарачая лінія — +420774155155, якая працуе з 7:00 да 22:00.

У іншых краінах Еўрасаюза заўжды можна пазваніць 112 і запытацца, што рабіць. Асабліва адзначым Нідэрланды, дзе дзейнічае служба дапамогі дзікім жывёлам, даступная па нумары 144.

Ва Украіне можна звярнуцца адразу па тэлефонах экстраннай службы — 101 або 112. У Кіеве ёсць цэнтр рэабілітацыі дзікіх жывёлаў, які кругласуткава працуе па нумары +380988447937.

У Вялікабрытаніі дзейнічае Каралеўскае таварыства па абароне жывёл (RSPCA), даступнае па нумары 0300 1234 999 (іншыя кантакты — на сайце па спасылцы). У выпадках, небяспечных для жыцця, варта званіць па нумары 999 або па нумары 111 у выпадку, калі вы гатовыя троху пачакаць і атрымаць кансультацыю.

У Ізраілі дзейнічае служба прыроды і паркаў, даступная па нумары *3639. Таксама вам падкажуць у мясцовых ветэрынарных клініках, якія можна адшукаць у інтэрнэце. У экстранных выпадках званіце ў паліцыю па нумары 100 і пытайцеся, што рабіць.

У ЗША, калі вы знайшлі параненую дзікую жывёлу, звярніцеся ў мясцовую службу выратавання дзікіх жывёл (Wildlife Rescue or Rehabilitation Center). Можна таксама патэлефанаваць у мясцовы Animal Control або Department of Fish and Wildlife (назвы могуць адрознівацца па штатах). У выпадках, калі жывёла ўяўляе небяспеку або патрабуецца тэрміновая дапамога, можна патэлефанаваць у 911.

У большасці правінцыяў Канады дзейнічаюць Wildlife Rehabilitation Centres. Вы таксама можаце звязацца з Ministry of Natural Resources або мясцовымі ветэрынарнымі клінікамі. А ў экстраных выпадках — тэлефануйце 911 або ў мясцовы Animal Services.

У любой сітуацыі самае важнае — не нашкодзіць, як мага хутчэй звярнуцца да спецыялістаў і не кідаць жывёлу ў патрэбе. 

• 3
• 0
• 0
• 0
• 0
• 0
• 0
• 0