Chronika

Zvalniajuć Viktara Borysa

Kapitana milicyi Viktara Borysa źbirajucca zvolnić z Haradzienskaha RUUS, jak paviedamiła 4 kastryčnika jahonaja siastra Anžalika. Na jaje dumku, jamu pomściać za dziejnaść siastry i za podpis pad listom da Łukašenki ŭ abaronu Sajuzu palakaŭ.

Marynič abskardžvaje

Palitviazień Michaił Marynič 4 kastryčnika padaŭ skarhu na rašeńnie turemnaj kamisii, jakaja admoviła jamu ŭ daterminovym vyzvaleńni.

Štraf za karykatury

Sud Pieršamajskaha rajonu Miensku 23 vieraśnia aštrafavaŭ redaktara hazety «Zhoda» Alaksieja Karala j jaho namieśnika Alaksandra Źdźvižkova na 100 bazavych vieličyń (2,55 młn rub.) kožnaha «za raspaŭsiud u ŚMI zahadzia łžyvych źviestak». Padstavaj stali kalažy, nadrukavanyja ŭ hazecie.

Pieratrusy ŭ Viciebsku

24 vieraśnia milicyjanty praviali pieratrus u 24-hadovaha budaŭnika Ŭładzisłava Aniščanki: u rospytach jany cikavilisia dziejnaściu niezarehistravanaj arhanizacyi «Zubr». 26 vieraśnia na vulicy milicyjanty zatrymali aktyvistaŭ KCHP — BNF Uładzimiera Pleščanku j Alaksandra Sałaŭjana, praviali ich asabisty nadhlad. U Pleščanki znajšli ŭlotki. 29 vieraśnia praviali pieratrus u biespartyjnaha Jurja Kupryjanava.

Sudy ŭ Bieraści

Bieraściejski abłasny sud 26 vieraśnia nie zadavoliŭ skarhi prafsajuznaha aktyvista Valancina Łazarenkava j kiraŭnika bieraściejskaj filii RHA «Biełaruski Chelsynski kamitet» Ihara Masłoŭskaha na rašeńnie rajonnaha sudu: u žniŭni ich pakarali štrafami za arhanizacyju seminaru.

28 vieraśnia hety ž sud nie zadavoliŭ skarhu aktyvista PKB Anatola Novika: jaho aštrafavali na 40 b.v. (1 młn 20 tys.) za praviadzieńnie partyjnaha schodu, jaki byŭ kvalifikavany jak niesankcyjanavany schod.

Kaniec «Kuŕjera iz Borisova»

Kalehija haspadarčaha sudu Mienskaj vobłaści 27 vieraśnia adchiliła kasacyjnuju skarhu TDA «Pres-servis» — zasnavalnika niedziaržaŭnaj hazety «Kuŕjer iz Borisova». Pradpryjemstva abskardžvała sudovaje rašeńnie ad 24 žniŭnia nakont likvidacyi.

Sprava Skrabca

Palitviaźnia Siarhieja Skrabca 27 vieraśnia pieraviali ŭ turemny špital pa stanie zdaroŭja. 3 kastryčnika prakuratura zakončyła raśśledavańnie jahonaj kryminalnaj spravy: eks-deputata vinavaciać u niezakonnaj pradprymalnickaj dziejnaści, vymantačvańni kredytaŭ i padrychtoŭcy da davańnia chabaru ŭ bujnym pamiery.

Horadnia: frantavyja zvodki

Haradzienskaja filija BNF pry kancy vieraśnia atrymała paviedamleńnie, što da 30 vieraśnia pavinna zapłacić 1 młn 440 tys. rub. sudovych pošlin. Pošliny byli ŭskładzienyja paśla projhryšu sudu nakont vysialeńnia arhanizacyi z pamiaškańnia.

Sud nad Janam Romanam adbyŭsia 28 vieraśnia: jaho aštrafavali na 50 b.v. (1 młn 275 tys.) za dziejnaść ad imia niezarehistravanaj arhanizacyi. Takoj arhanizacyjaj sudździa Natalla Kozieł paličyła zarehistravany prafsajuz rabotnikaŭ radyjoelektronnaj pramysłovaści.

Namieśnik prakurora Leninskaha rajonu Horadni Alaksandar Abramovič 29 vieraśnia aficyjna papiaredziŭ Andžeja Pisalnika, što toj nia moža pradstaŭlacca hałoŭnym redaktaram štotydniovika Sajuzu palakaŭ Biełarusi «Głos znad Niemna».

15 vieraśnia Viarchoŭny sud admoviŭ nahladnaj skarzie aktyvista prafsajuzu REP Ju.Kurhanskaha. Haradzieniec abskardžvaŭ rašeńnie administracyjnaj kamisii nakont štrafu za raspaŭsiud drukavanaj pradukcyi biez vychodnych źviestak i «złoŭžyvańnie pracesualnymi pravami».

Haładoŭki

Pradprymalnicy ź Bieraścia Luboŭ Razanovič i Luboŭ Łaŭrukovič 28 vieraśnia spynili haładoŭku paśla kansultacyj ź inšymi pradprymalnikami. Čynoŭniki abłvykankamu abiacali vyrašyć sprečnyja momanty.

29 vieraśnia spyniŭ haładoŭku Mikałaj Aŭtuchovič u Vaŭkavysku: Prezydyjum Vyšejšaha haspadarčaha sudu skasavaŭ rašeńni ŭsich sudovych instancyj i nakiravaŭ jahonuju spravu na pierahlad.

Haładoŭščycy z Vaŭkavysku Natalli Niaborskaj 30 vieraśnia daktary prapanavali lehčy ŭ špital, bo ŭ jaje pahoršyŭsia stan zdaroŭja. Žančyna admoviłasia.

Pinskaja presa

Namieśnik staršyni Pinskaha harvykankamu Alaksandar Kanieŭski, pavodle źviestak HA «BAŽ», 29 vieraśnia na naradzie z supracoŭnikami harvykankamu zabaraniŭ davać infarmacyju supracoŭnikam miascovaj niedziaržaŭnaj hazety «Miascovy čas». Miascovaje adździaleńnie RUP «Biełsajuzdruk» admoviłasia padpisvać damovu na raspaŭsiud vydańnia.

Niahody «Narodnaj voli»

Hazeta «Narodnaja vola» 30 vieraśnia atrymała list ad «Mienabłsajuzdruku» z admovaj ad dalejšaha raspaŭsiudžvańnia. U dakumencie śćviardžajecca, što hazeta karystałasia panižanym popytam.

Zatrymańnie ŭ Barysavie

U Barysavie 25 vieraśnia zatrymali 19-hadovaha aktyvista hramadzkaj inicyjatyvy «Za čysty Barysaŭ!» Andreja Małasaja, jaki raspaŭsiudžvaŭ raskład biełaruskich pieradač telekanału «Euronews».

Štraf «BDH»

Sud Kastryčnickaha rajonu Miensku vypisaŭ «BDH. Diełovaja hazieta» 50 młn rub. štrafu i žurnalistu Siarhieju Sacuku — 5 młn na karyść byłoha supracoŭnika AMAPu Siarhieja Biadryckaha. Sprava tyčyłasia artykułu «Reklamnaja akcyja» ŭ №70 za 20 traŭnia 2003 h., dzie raskazvałasia pra kryminalnuju spravu, adnym ź fihurantaŭ jakoj byŭ pazoŭnik.

Štrafy ŭ Pinsku

29 vieraśnia Pinski sud aštrafavaŭ aktyvista BSDP («Hramada») Siarhieja Kaściukoviča na 20 b.v. (510 tys. rub.) Jašče čatyry aktyvisty partyi atrymali papiaredžańni. Padstava — zatrymańnie partyjcaŭ 7 žniŭnia ŭ ofisie firmy «Palašuk», što było kvalifikavana jak «niesankcyjanavany schod».

«Priessboł» u sudzie

Hałoŭnaja buchhaltarka Vučelni alimpijskaha rezervu Śviatłana Ramanovič padała pazoŭ suprać niedziaržaŭnaj hazety «Priessboł» na 14 młn 510 tys. rub. za artykuł, jaki napisała bijatlanistka Śviatłana Paramyhina. Uzimku «Priessboł» prajhraŭ pazoŭ ministru finansaŭ Mikałaju Korbutu, vypłaciŭšy 40 młn. rubloŭ kampensacyi.

AŠ

• 0
• 0
• 0
• 0
• 0
• 0
• 0
• 0