Cikavostka miesiaca

Ranicaj 23 vieraśnia na mienski Hałoŭpaštamt zavitała niamała šachmatystaŭ. Na prezentacyi pieršych u krainie marak z šachmatnym źmiestam byli zaŭvažany eks-čempijony Biełarusi Viačasłaŭ Dydyška i Andrej Maluš, trener nacyjanalnaj zbornaj Hieorhi Buhrym.

Vypusk šachmatnych marak (ahulny nakład — bolš za 70 tys.) upisvajecca ŭ kancepcyju dziaržaŭnaj prapahandy biełaruskaha sportu. «Było kryŭdna, što na markach aśviatlalisia inšyja vidy, a šachmat nie było», — zaznačyŭ A.Maluš. Zahadčyca vydavieckaha centru «Marka» paabiacała, što nieŭzabavie vyjduć i znaki paštovaj apłaty, pryśviečanyja šaškam. Adsutnaść na prezentacyi niepasrednaha vykanaŭcy — Šamila Chajrulina, aŭtara viadomaj ciarod filatelistaŭ «čarnobylskaj seryi») — tłumačyłasia tym, što mastak — nie publičny čałaviek.

Blok ź siami marak naminałam pa 500 rub. azdobleny nadpisami na tuzinie movaŭ. Krychu eklektyčnyja hraviury — sumieś baroka i hotyki — vyjaŭlajuć abstraktnych mužčynu i kabietu ŭ siaredniaviečnych kaściumach, jakija pierasoŭvajuć fihurki. Akurat ilustracyi da paemy «Šachmaty» paeta XVI st. Jana Kachanoŭskaha.

Leŭ Kołasaŭ, staršynia Sajuzu filatelistaŭ, zadavoleny zadumkaj mastaka: «Praca išła prykładna hod, było šmat varyjantaŭ, i vyrašyli pakazać staražytnaść».

Zvažajučy na košt, marki patrapiać u «dalokaje zamiežža». Mahčyma, zamiežnikam było b cikaviej ubačyć biełaruskich «hrosaŭ»? Ł.Kołasaŭ udakładniŭ, što žyvych ludziej — kali heta nie karali i nie prezydenty — malujuć na markach duža redka. «Siarod šachmatystaŭ vyniatkami byli Karpaŭ, Kasparaŭ, adnak u Biełarusi niama takich vialikich metraŭ. Ich nia viedajuć u śviecie».

Filatelisty prahnazujuć, što nakład chutka razydziecca, choć rarytetnymi vykštałconyja buklety i nia stanuć — «mo hadoŭ praź piaćdziasiat». Darečy, u Biełarusi niama ludziej, jakija źbirali b vyklučna marki na temu šachmat. Byŭ adzin entuzijast, Anatol Parnas, adnak jon emihravaŭ u ZŠA. U śviecie ž šachmatnaje kalekcyjanavańnie duža papularnaje — dziejničaje navat suśvietnaja asacyjacyja amataraŭ šachmatnych artefaktaŭ. Znanym filatelistam źjaŭlajecca čempijon śvietu 1975—1985 h. Anatol Karpaŭ — kažuć, navat padaryŭ niekalki redkich asobnikaŭ Łukašenku.

Dziaŭčyna z Centru alimpijskaj padrychtoŭki pa šachmatach i šaškach na prezentacyi vykazała spadziavańnie, što źjaŭleńnie marak dapamoža zavabić vučniaŭ u jaje centar. Dazvolim i my sabie trochi naiŭnaści: u hod Karatkieviča suviazistam varta było b adlustravać šachmatnyja pajadynki z «Ładździ Rospačy»…

• 0
• 0
• 0
• 0
• 0
• 0
• 0
• 0