Varonin: Rasieja nia złomić Małdovy
Prezydent Małdovy abvinavaciŭ ułady Rasiei ŭ praviadzieńni ekanamičnaj blakady. «Kraina hatova pražyć i biaz ekspartu vina ŭ Rasieju. Budzie składana, adnak my hatovy žyć u choładzie, zamiarzać biez rasiejskaha hazu, ale nie zdamosia», — zajaviŭ Uładzimier Varonin u interviju rumynskaj słužbie BBC. Rasiejskija ŭłady blakujuć ekspart vinaŭ, adzin z hałoŭnych krynic dachodaŭ Małdovy.
Vankuver najlepšy
Eksperty brytanskaha vydańnia Economist Intelligence Unit pryznali Vankuver (Kanada) najlepšym pa jakaści žyćcia horadam śvietu. Druhoje miesca ŭ aŭstralijskaha Melburnu, treciaje — u Vieny (Aŭstryja). U dziasiatku najlepšych haradoŭ uvachodziać taksama aŭstralijskija Pert, Adełaida i Sydnej, kanadzkija Taronta i Kałhary, švajcarskija Ženeva i Ciurych. Cikava, što ŭ Taronta, Adełaidzie, Melburnie j Sydnei žyvie najbolš aktyŭnyja biełaruskija dyjaspary ŭ volnym śviecie, a Vankuver apošnim časam stanovicca novym asiarodkam biełaruskaj emihracyi ŭ Kanadzie. Darečy, najlepšym horadam u ZŠA pryznany «samy biełaruski horad» — Kliŭłend.
Dziasiatku najhoršych haradoŭ składajuć Tehieran, Duała (Kamerun), Charare (Zymbabve), Abidžan (Kot dJIvuar), Pnampeń, Lahas (Nihieryja), Karačy (Pakistan), Daka (Banhladeš), Alžyr i Port-Morśbi (Papua-Novaja Hvineja).
Šroder piša reziume
Eks-kancler Niamieččyny Hierchard Šroder moža stać daradcam u kancernie «Hazprom». Pavodle čutak, hetaje pytańnie navat abmiarkoŭvałasia na niadaŭniaj sustrečy ŭ Sankt-Pieciarburhu na najvyšejšym uzroŭni. Paśla taho jak kancleram FRH stała lider CHDS/CHSS Anhieła Merkiel, Šroder pryniaŭ rašeńnie syści z palityki. Biełarusy buduć škadavać pra takuju źmienu najmienš.
«Bukiera» ŭziali irlandcy
Favarytam «Bukiera» ličyŭsia Džulijan Barnz z ramanam «Artur i Džordž». Ale laŭreatam Bukieraŭskaj premii staŭ irlandzki piśmieńnik Džon Benvił, hanaravany za raman «Mora». Prestyžnaja premija pamieram 50 tys. funtaŭ sterlinhaŭ (kala 190 młn rubloŭ) prysudžana Benviłu za knihu pra čałavieka, što sutyknuŭsia sa svaim minułym u haradku, u jakim baviŭ vakacyi.
Vybar siarod pravych
Polščy spatrebicca druhi tur prezydenckich vybaraŭ. U pieršym tury liberał Donald Tusk sabraŭ 36,3% hałasoŭ, a kanservatar Lech Kačyński — 33,1%, a ŭ vybarach uziali ŭdzieł 49,74% hramadzian. Polski Žyrynoŭski, lubimy palityk biełaruskich dziaržaŭnych ŚMI Andžej Leper, zaniaŭ treciaje miesca — 15,11%. Na ŭčastku ŭ Miensku pieramoh Tusk, u Bieraści i Horadni — Kačyński.
Aŭtamabil Musalini
Na aŭkcyjonie ŭ ZŠA za 140 tys. dalaraŭ pradali aŭtamabil, na jakim jeździŭ duče. Vykštałconaja «Lanča», zroblenaja pavodle speczakazu ŭ 1939 h., była zachoplena amerykanskimi vajskoŭcami i apošnija hady zachoŭvałasia ŭ muzei aŭtamabilaŭ. I pradaviec, i pakupnik paličyli za lepšaje zastacca ananimnymi. Vyručanyja hrošy buduć achviaravanyja kanadzkaj dabračynnaj arhanizacyi, što dapamahaje ciažkachvorym dzieciam.
AR
Kamientary