Chronika apazycyi za 10-24 lipienia

10 lipienia

Za bardaŭski festyval — štraf

Arhanizataraŭ kancertu bardaŭskaj muzyki ŭ Homieli 23 červienia Łarysu Ščyrakovu i Źmitra Žaleźničenku vyklikali ŭ abłasnuju inspekcyju Ministerstva pa padatkach i zborach. Pa versii padatkavikoŭ, niechta z hledačoŭ kancertu nibyta bačyŭ na miescy skrynku, u jakuju pakłaŭ piać tysiačaŭ rubloŭ, a voś ček hetamu čałavieku nia vydali. Ščyrakovu i Žaleźničenku abvinavačvajuć u niezakonnaj pradprymalnickaj dziejnaści. Materyjały pieradadzienyja ŭ sud. Arhanizataram imprezy pahražaje štraf da 50 bazavych vieličyń.

Fłeš‑mob u abaronu Horadni

Akcyja adbyłasia na piešachodnaj vulicy Savieckaj. Čaćviora maładzionaŭ trymali arkušy papiery sa słovami «Viarnicie našu historyju». Dvoje ŭdzielnikaŭ akcyi kapali piasok dziciačymi šuflikami, jany mieli prymacavanyja da hałavy partrety staršyni harvykankamu Alaksandra Antonienki i kiraŭnika abłvykankamu Ŭładzimiera Saŭčanki.

Chaj ludzi ŭbačać vašymi vačyma
Dasyłajcie na [email protected] vašy fatazdymki. Źmiaščajcie narodnyja naviny. Paviedamlajcie pra pilnyja zdareńni na telefony
(029) 707-73-29,
(029) 613-32-32,
(017) 284-73-29
Chaj ludzi vas pačujuć!

Sudziać Łukašova

10 lipienia padčas sudovaha razhladu paciarpieły pa spravie Kastusia Łukašova, supracoŭnik milicyi Anatol Suščenia, admoviŭsia ad svaich materyjalnych pretenzij da abvinavačanaha. Prakuror prasiŭ sud pakinuć u sile papiaredniaje rašeńnie sudu — dva hady ŭmoŭna, pry hetym ličačy, što niama nijakich padstaŭ nie daviarać paciarpiełamu A.Suščeniu.

«Maładomu frontu» admovili ŭ rehistracyi

Upraŭleńnie justycyi Mienharvykankamu čarhovy raz admoviła ŭ rehistracyi mienskaj haradzkoj hramadzkaj arhanizacyi «Małady front». Heta ŭžo piataja takaja admova «MF».

Nie dajuć pikietavać za Kazulina

Bieraściejski harvykankam nie zadavoliŭ zajaŭku abłasnoj arhanizacyi Biełaruskaj sacyjał‑demakratyčnaj partyi na praviadzieńnie pikietu ŭ padtrymku Alaksandra Kazulina.

11 lipienia

Kalinoŭcaŭ ciahajuć u KDB

Moładzievy aktyvist Alaksandar Reźnikaŭ, jaki vučycca ŭ Krakavie pa prahramie Kalinoŭskaha, byŭ vyklikany ŭ Saviecki rajadździeł KDB Miensku. Pradstaŭnikoŭ specsłužbaŭ cikavili padrabiaznaści vučoby.

Na Fińkieviča cisnuć

Načalnik Mahiloŭskaj speckamendatury padpałkoŭnik Alaksandar Łamaza nahadaŭ Arturu Fińkieviču pra toje, što na jaho, jak złosnaha parušalnika režymu, mohuć zavieści kryminalnuju spravu i źmianić miesca adbyvańnia pakarańnia.

Hryščenia chadziŭ na ekspertyzu

Baranavicki aktyvist «Maładoha frontu», Jarasłaŭ Hryščenia prachodziŭ psychaneŭralahičnuju ekspertyzu ŭ miascovym dyspansery. Jarasłava pryviali ŭ asobny pakoj, dzie znachodzilisia dva psychijatary (tak jany adrekamendavalisia), a taksama śledčaja Julija Askaldovič, advakata nie puścili. Chłopca pasadzili na kresła pasiarod kabinetu i pačali zadavać pytańni, što tyčać jahonaj bijahrafii, baćkoŭ, apazycyjnaj dziejnaści. Pytalisia, ci nia ličyć jon svaju dziejnaść biessensoŭnaj, čaho dabiŭsia ŭ žyćci, kim jon jość ciapier.

12 lipienia

Ad palakaŭ adčapilisia

Biełaruskija ŭłady spynili kryminalnuju spravu suprać čatyroch čalcoŭ Sajuzu palakaŭ Biełarusi. Andžej Pačobut, Juzaf Pažecki, Viesłaŭ Kieŭlak i Andžej Pisalnik zmohuć ciapier źviarnucca ŭ haradzienskuju milicyju pa štamp u pašparcie, jaki dazvalaje vyjazdžać ź Biełarusi va ŭsie krainy śvietu.

Likvidoŭvajuć «Supolnaść»

Perspektyva zakryćcia navisła nad čarhovaj pakul jašče zarehistravanaj demakratyčnaj hramadzkaj arhanizacyjaj — Mienskim haradzkim hramadzkim abjadnańniem «Centar Supolnaść».

13 lipienia

Kazulin sustreŭsia ź siamjoj

Adbyłosia trochdzionnaje spatkańnie Alaksandra Kazulina, jaki adbyvaje turemnaje źniavoleńnie, ź siamjoj. Na spatkańnie ŭ viciebskuju kaloniju pajechali jaho dočki Volha i Julija. Dziaŭčaty prabuduć z baćkam da paniadziełku. Darečy, akurat u hety dzień spoŭniŭsia hod, jak byŭ vyniesieny prysud Alaksandru Kazulinu. U zajavie prezydyjumu BSDP havorycca, što hety praces byŭ biesprecedentnym: upieršyniu ŭ krainie asudzili byłoha kandydata na pasadu prezydenta Respubliki Biełaruś.

Śmiełaść Vałožyn uziała

Vierniki pratestanckaj supołki «Carkva Isusa Chrysta» adstajali svoj letnik u Vałožynskim rajonie, dzie adpačyvaje kala sotni čałaviek. Miascovyja ŭłady patrabavali zakryć letnik, kali nia buduć vykananyja ŭsie nieabchodnyja pracedury. Patrabavali padać śpis usich udzielnikaŭ arhanizavanaha adpačynku, zdabyć dazvoł abłasnoj administracyi i kamitetu ŭ spravie relihijaŭ na praviadzieńnie letnika.

16 lipienia

Dzień salidarnaści

Dziasiatki ludziej pryjšli da kaściołu Śviatoha Jazepa na vulicy Kiryły i Miafoda. Ludzi trymali u rukach partrety palitviaźniaŭ i malilisia. Pobač dziažuryli supracoŭniki AMAPu. Raniej niekalki dziasiatkaŭ čałaviek vyjšli na Kastryčnickuju płošču Miensku z partretami palitviaźniaŭ. Ludzi zdoleli prastajać na płoščy ŭsiaho niekalki chvilin. Jak tolki ŭdzielniki akcyi dastali partrety palitviaźniaŭ, da ich padyšli supracoŭniki AMAPu ŭ cyvilnym i zapatrabavali razyścisia. Ludziej vycisnuli z płoščy na praspekt Niezaležnaści ŭ bok HUMu.

Nie puścili žurnalista

Biełaruskija pamiežniki nie dazvolili prajechać z Varšavy ŭ Maskvu karespandentu «Gazety Wyborczej» Vacłavu Radzivinoviču.

Milinkievič źviarnuŭsia ŭ KDB

Lider ruchu «Za svabodu» Alaksandar Milinkievič nakiravaŭ zvarot kiraŭnictva KDB z patrabavańniem spynić pieraśled za inšadumstva studentaŭ, jakija navučajucca za miažoj pa prahramach dla respresavanaj moładzi. U hety samy dzień Milinkieviča zatrymlivali ŭ Astraŭcy za znachodžańnie ŭ pamiežnaj zonie.

Ściahi nad Viciebskam

U noč z 13 na 14 lipienia lehiendarny Miron vyviesiŭ nad festyvalnym Viciebskam dva bieł‑čyrvona‑biełyja ściahi: nad abłasnym sudom i kaviarniaj «Aŭrora».

19 lipienia

Zabaranili pikiety na Banhałory

Mienharvykankam admoviŭ u praviadzieńni ŭ parku «Družby narodaŭ» pikietaŭ salidarnaści z palitviaźniem Alaksandram Kazulinym. Planavałasia, što pikiety projduć z 21 da 31 lipienia.

Za majku

Aktyvist Ruchu «Za Svabodu» Jarasłaŭ Biernikovič z Hłybokaha (Viciebskaja vobłaść) aštrafavany na 10 bazavych vieličyniaŭ za toje, što byŭ apranuty ŭ majku z nadpisam «Ruch «Za Svabodu».

Zakryvajuć «zialonych»

Ministerstva justycyi nakiravała ŭ Viarchoŭny Sud iskavuju zajavu ab likvidacyi Biełaruskaj ekalahičnaj partyi zialonych «BEZ». Jak paviedamlaje pres‑słužba Minjustu, padstavaj dla hetaha pasłužyła nievykanańnie partyjaj normaŭ biełaruskaha zakanadaŭstva.

Na voli Kalita

Staršynia moładzievaj kamisii partyi BNF Aleś Kalita adsiedzieŭ 15 sutak aryštu ŭ turmie na vulicy Akreścina pavodle abvinavačańnia ŭ drobnym chulihanstvie.

23 lipienia

Na 10 sutak

Maładafrontaŭcy Kiryła Mackievič i Uładzimier Siarhiejeŭ asudžanyja na 10 sutak aryštu. 20 lipienia, u dzień narodzinaŭ źniavolenaha lidera moładzievaha ruchu Źmitra Daškieviča ŭ Miensku, na moście cieraź Niamihu, jany pasprabavali vyviesić vinšavalnuju raściažku «Z dniom narodzinaŭ, Źmicier Daškievič!»

Ź milicyi ŭ bolnicu

20 lipienia ŭ Miensku kala płoščy Jakuba Kołasa za našeńnie majki «Za Svabodu» byŭ zatrymany Maksim Sierhijec. Užyvańnie fizyčnaj siły z boku milicyjanta spravakavała ŭ zatrymanaha prystup chvaroby. Lekary rekamendavali špitalizacyju.

Pieratrus u Hareckaha

Adbyŭsia pieratrus na kvatery moładzievaha aktyvista Barysa Hareckaha. Pieratrus pravodzili supracoŭniki abłasnoha KDB. U vyniki kanfiskavanyja kamputarny systemny blok i padšyŭka «Našaj Nivy».

24 lipienia

Sieviaryniec na sutkach

Sud Frunzenskaha rajonu Miensku asudziŭ Paŭła Sieviarynca i Alaksieja Šeina na 15 sutak źniavoleńnia za raspaŭsiud ulotak z zaklikam pryniać udzieł u mierapryjemstvach apazycyi, prymierkavanych da Dnia niezaležnaści 27 lipienia.

Milinkieviču admovili ŭ rehistracyi ruchu

Ministerstva justycyi admoviła ŭ rehistracyi respublikanskaha pravaabarončaha hramadzkaha abjadnańnia «Ruch «Za Svabodu». Zasnavalniki abjadnańnia majuć namier ciaham miesiaca abskardzić rašeńnie Minjustu ŭ Viarchoŭnym sudzie RB, padrychtavać novy ŭstanoŭčy schod, a taksama patrabavać sustrečy ź ministram justycyi V.Hałavanavym i admieny rašeńnia Minjustu.

• 0
• 0
• 0
• 0
• 0
• 0
• 0
• 0