Źbiŭ naśmierć čałavieka, šmat hadoŭ pracavaŭ ź Jakabsonam: piać faktaŭ pra ministra Patupčyka

Admianiŭ lhoty

U 55-hadovaha Patupčyka heta ŭžo nie pieršaja praca na pasadzie ministra. Ad 2006 da 2009 jon uznačalvaŭ Ministrerstva pracy i sacyjalnaj abarony. Mienavita ŭ toj čas byli admienienyja bolšaść ilhot (dla studentaŭ, čarnobylcaŭ, inšych katehoryj hramadzian). Patupčyku davodziłasia być na piarednim krai tych niepapularnych rašeńniaŭ. «Lhoty — najbolš nieefiektyŭnaja i zatratnaja forma sacyjalnaj padtrymki hramadzian», — kazaŭ tady Patupčyk. Suprać prahałasavaŭ usiaho adzin deputat pałaty. A ŭ saviecie respubłki pryniaćcie taho zakona zaniało čatyry chviliny.

Staŭ vice-premjeram

Paśla Patupčyka pavysili až da vice-premjera, adkaznaha za sacyjalnuju śfieru. Na hetaj pasadzie Patupčyk nie nadta aktyŭničaŭ. Adznačyć možna jahony biełaruskamoŭny vystup na Dniach piśmiennaści ŭ Smarhoni. Praŭda, pramaŭlaŭ jon ź vialikaj ciažkaściu. Prabyŭ na hetaj pasadzie Patupčyk trošku bolš za hod, a zamianiŭ jaho viernuty z kitajskaj vysyłki Anatol Tozik.

Šmat hadoŭ pracavaŭ ź Jakabsonam

Jašče z kanca 1980-ch idzie supracoŭnictva siońniašniaha ministra enerhietyki z staršynioj Kamiteta dziaržkantrolu. Tady Patupčyk pracavaŭ zahadčykam arhanizacyjnaha adździeła Śvietłahorskaha harkama partyi, a Jakabson — uznačalvaŭ Śvietłahorski saviet deputataŭ. Ad 1993 da 1997 Patupčyk byŭ namieśnikam Jakabsona ŭ Śvietłahorskim harvykankamie. Varta zaŭvažyć, što mienavita ŭ hety čas horad u Homielskaj vobłaści zasłužyŭ słavu «stalicy ŚNIDa i narkamanaŭ» u Biełarusi. Paźniej hety tandem pracavaŭ u Homielskim abłvykankamie. Jakabson — staršynia, a Patupčyk — namieśnik. Až pakul apošniaha nie zaŭvažyli ŭ Minsku.

Źbiŭ na mašynie čałavieka

U 2007 ministr pracy Patupčyk, kirujučy asabistym aŭto «Aŭdzi-100», źbiŭ na vulicy Prytyckaha ŭ Minsku čałavieka. Paciarpiełaha dastavili ŭ bolnicu, dzie toj chutka pamior. Patupčyk sam vyklikaŭ chutkuju dapamohu. Pad koły, darečy, trapiŭ 27-hadovy asudžany ź Ivianca. Jon samavolna pakinuŭ «chimiju» i ličyŭsia va ŭciokach. Pravodziłasia rasśledavańnie, ale viny Patupčyka ŭ tym epizodzie nie znajšli.

Siniekura i lohkaja atletyka

Apošnija hady Patupčyk zajmaŭ ścipłuju pasadu namieśnika śpikiera savieta respubliki. Praca nie samaja «pylnaja». Taksama da minułaha hoda ŭznačalvaŭ fiederacyju lohkaj atletyki, adnak paśla pravału na Alimpijadzie ŭ Łondanie (paśla dyskalifikacyi Astapčuk — nivodnaha miedala) byŭ źniaty z pasady. Mienavita ŭ čas pracy Patupčyka ŭ fiederacyi razharnuŭsia skandał z trenieram Badujevym, jaki niejki čas byŭ pad śledstvam. Mienavita Patupčyk łabiravaŭ pryznačeńnie Badujeva. Niejkaja dola viny, što vyniki ŭ lohkaj atletycy rezka pajšli ŭniz, taksama lažyć i na Patupčyku.

• 0
• 0
• 0
• 0
• 0
• 0
• 0
• 0