Na Youtube źjaviŭsia treci film Viktara Traciakova z šerahu «Šeść arhumentaŭ suprać śmiarotnaha pakarańnia» — relihijny: «Čałaviek nia maje prava zabirać Žyćcio inšaha čałavieka, jakoje daŭ Boh».
Pra śmiarotnaje pakarańnie s punktu hledžańnia chryścijanskaj etyki razvažajuć pravasłaŭny śviatar Alaksandr Šramko, ksiondz Mikałaj Cichanovič i relihijaznaŭca, siabra Chielsinskaha Kamitetu Viktar Adzinočanka.
U filmie skarystanyja kadry ź 5-ha Suśvietanaha Kanhresu suprać śmiarotnaha pakarańnia ŭ Madrydzie (červień 2013 hoda), kadry z Muzeju hienacydu (Vilnia), a taksama z kamery śmiarotnikaŭ u mienskim SIZA na vulicy Vaładarskaha.
Taksama cytujecca pasłańnie Papy Rymskaha Franciška da 5-ha Suśvietnaha Kanhresu suprać śmiarotnaha pakarańnia: «Pakarańnie śmierciu pavinna być zamienienaje na inšaje, jakoje by praduhledžvała šaniec dla złačyncy zadumacca nad svaimi pravinami i vypravicca, a niavinnamu padaravała by nadzieju na spraviadlivaść».
Hety film byŭ prezentavany na 3-m Biełaruskim pravaabarončym forumie, jaki prachodzić zaraz u Vilni na paneli suprać śmiarotnaha pakarańnia i byŭ ź cikavaściu sustrety jaho ŭdzielnikami.
Jak adznačaje sajt Viasny, Režyser filma Viktar Traciakoŭ paviedamiŭ, što «Šeść arhumentaŭ suprać śmiarotnaha pakarańnia», — heta vynik supolnaj pracy dakumentalistaŭ i pravaabaroncaŭ, jakaja pačałasia ŭ 2010 hodzie ź filmu «Pryčyna śmierci — pročyrk», pryśviečanaha temie niavydačy ciełaŭ pakaranych śmierciu».
Kamientary