Biźnies-sajuzy prapanoŭvajuć novamu ŭradu abmiežavać umiašańnie dziaržavy ŭ dziejnaść subjektaŭ haspadarańnia pryvatnaj formy ŭłasnaści. List z prapanovami ŭ prajekt prahramy dziejnaści ŭrada padpisali i nakiravali ŭ Ministerstva ekanomiki kiraŭniki piaci pradprymalnickich sajuzaŭ.
U liście, u pryvatnaści, prapanoŭvajecca abmiežavać dziaržaŭnaje ŭmiašańnie ŭ dziejnaść pryvatnaha biźniesu šlacham admovy ad patrabavańniaŭ pa ŭzroŭni zarabotnaj płaty (za vyklučeńniem kantrolu minimalnaha ŭzroŭniu apłaty pracy).
Akramia taho, ličać pradstaŭniki biźnies-abjadnańniaŭ, treba admovicca ad daviadzieńnia prahnoznych pakazčykaŭ, žorstkaha rehulavańnia ŭzroŭniu cen na pradukcyju. «Luboje rehulavańnie cenaŭtvareńnia pavinna zabiaśpiečvać subjektu haspadarańnia rentabielnaść nie mienš čym 10%», — havorycca ŭ liście.
«U metach adnaŭleńnia davieru biźniesu da ŭłady» treba pravodzić «abaviazkovaje publičnaje abmierkavańnie prablem sacyjalna-ekanamičnaha raźvićcia i narmatyŭnych pravavych aktaŭ, jakija tyčacca viadzieńnia pradprymalnickaj dziejnaści».
Taksama biźnies-supolnaść Biełarusi prosić urad krainy admianić maratoryj na rost cen.
Na dumku biźnies-asacyjacyj, u siońniašniaj ekanamičnaj situacyi abmiežavańni na pavyšeńnie cen navat z ulikam ustanoŭlenych vyklučeńniaŭ paciahnuć samyja surjoznyja niehatyŭnyja nastupstvy dla subjektaŭ haspadarańnia, ekanomiki krainy ŭ cełym i dla jaje spažyvieckaha rynku. Pradstaŭniki biźniesu nazyvajuć niekalki pryčyn.
Pa-pieršaje, adznačajuć jany, ekanomika krainy ciesna ŭzajemaźviazana z ekanomikaj Rasijskaj Fiederacyi, adsutničajuć mytnyja punkty na miažy.
«Analiz situacyi pakazvaje, što štučnaje strymlivańnie cen na ŭnutranym rynku ŭžo pryviało da značnaha pierakosu cen na mnohija pradukty charčavańnia, u pryvatnaści ŭ Rasijskaj Fiederacyi jany značna daražejšyja. Jak vynik, u krainie imkliva skaračajecca rynak tradycyjnych dla biełarusaŭ praduktaŭ charčavańnia. Naprykład, užo adčuvajecca vostry niedachop u handli kapusty biełakačannaj, inšaj aharodniny i fruktaŭ biełaruskaj vytvorčaści. Aptymalnym dla našaj krainy źjaŭlajecca padtrymańnie cen na spažyvieckim rynku prykładna na ŭzroŭni RF abo niaznačna nižej», — adznačajuć pradstaŭniki biźniesu.
Pa-druhoje, havorycca ŭ liście, pry strymlivańni cen na impartnyja tavary raście spažyviecki popyt na ich, ajčynnyja vytvorcy pazbaŭlajucca mahčymaści aktyvizavać impartazamiaščeńnie, raście admoŭnaje salda źniešniaha handlu.
Jak pakazvajuć apytańni pradprymalnikaŭ, adznačajuć pradstaŭniki biźnies-asacyjacyj, značnaja kolkaść imparcioraŭ u ciapierašniaj abstanoŭcy pryniała rašeńnie prypynić svaju dziejnaść, što ŭžo ŭ najbližejšyja tydni moža pryvieści da abvastreńnia situacyi jak na spažyvieckim rynku, tak i ŭ śfiery vytvorčaści. «Da asabliva niehatyŭnych nastupstvaŭ pryviadzie spynieńnie pastavak važnych dla hramadzian miedykamientaŭ», — miarkujuć padpisanty zvarotu.
Pa-treciaje, adznačajuć jany, analiz dziejnaści vytvorčych pradpryjemstvaŭ pakazvaje, što hranična dapuščalny płanavy ŭzrovień rentabielnaści ŭ 3%, ustanoŭleny na tavary ajčynnaj vytvorčaści, jaŭna niedastatkovy dla zabieśpiačeńnia biasstratnaj pracy pradpryjemstvaŭ, bo nie pakryvaje ich zatraty, u tym liku jakija ažyćciaŭlajucca z prybytku.
«Zaviedama stratnaja dziejnaść bolšaj častki sbujektaŭ haspadarańnia pry adsutnaści dastupnych kredytaŭ zdolnaja pryvieści da łavinapadobnaha rostu niepłaciažoŭ i, jak vynik, da finansavaha kryzisu ŭ krainie; da źnižeńnia zarabotnych płat supracoŭnikaŭ, jakija pracujuć jak u vytvorčaści, tak i ŭ śfiery pasłuh; da skaračeńnia asartymientu tavaraŭ na palicach, źjaŭleńnia deficytu, źjaŭleńnia nieabchodnaści nabyvać tavary ŭ pradstaŭnikoŭ cieniavoha siektara ekanomiki, nieabchodnaści vyjezdu za miažu pa pakupki», — adznačajecca ŭ liście.
Z ulikam vykładzienaha biźnies-sajuzy ličać «vielmi niebiaśpiečnaj i škodnaj dla ekanomiki krainy i dla spažyvieckaha rynku palityku abmiežavańnia svabodnaha cenaŭtvareńnia i prapanoŭvajuć admianić maratoryj na rost nie paźniej za 15 lutaha 2015 hoda».
Nahadajem, biesterminovy maratoryj na rost cen byŭ ustanoŭleny pastanovaj urada № 1207 ad 19 śniežnia 2014 hoda. U toj ža dzień u krainie rezka padaražeła valuta. Z-za hetaha impartnyja pastaŭki ŭ Biełaruś stali stratnymi, što pryviało da deficytu niekatorych tavaraŭ.
Ciapier čytajuć
Što ŭjaŭlaje saboj baza danych, jakuju siłaviki nazyvajuć «uzłomam «Novaj Biełarusi»9
Kamientary