Paśla pierazapusku sajta «Kinapošuk» rejtynh filma «My, braty» uźlacieŭ u niekalki razoŭ
8 kastryčnika viadomy rasijski sajt «Kinapošuk» byŭ prezientavany ŭ abnoŭlenym farmacie. Ale nie abyjšłosia i bieź dzivosaŭ.
Uvohule, sam fakt redyzajnu vyklikaŭ chvalu krytyki ŭ karystalnikaŭ. Ludzi skardziacca na niazručnaść, niezrazumiełaść i prosta na niaŭdały vyhlad novaha sajtu. Da taho ž, ciapier, kab pakidać kamientary ci adznaki, treba mieć jandeks-akaŭnt. Tłumačycca heta tym, što mienavita kampanija «Jandeks» i vykupiła «Kinapošuk». Novaja funkcyja, mahčymaść hladzieć kino anłajn naŭprost na sajcie, prajšła amal niezaŭvažanym na tle krytyki.
Da taho ž, šerah filmaŭ źmianili svaje adznaki, jakija im vystaŭlali karystalniki. Cikava, što pakul naviedvalniki adznačyli niečakany rost rejtynhu niekalkich rasiejskich stužak.
«Pieršy biełaruski błokbaster» taksama raptam nabyŭ papularnaść. U filma «My, braty» jašče tydzień tamu rejtynh składaŭ prykładna 2 bały z 10. A siońnia «Kinapošuk» upeŭniena pakazvaje adznaku ŭ 7,7 bałaŭ.
Dla paraŭnańnia: heta ŭsiaho tolki na 0,3 bały mienš, čym u znakamitaj stužki «Zornyja vojny», ci kłasičnych šedeŭraŭ Fiederyka Fielini. Voś jon, pośpiech?
Paviedamlajecca, što stužku acanili bolš za 1600 čałaviek, ale prahladzieć dynamiku hałasavańnia niemahčyma, va ŭsiakim vypadku pakul što. Pryčym, u «Jandeksie» zajavili, što pierajšli na novy ałharytm padliku rejtynhu, paśla čaho acenki niekatorych filmaŭ byli pieraličanyja.
«Ciapier na značeńnie acenki filma ŭpłyvajuć hałasy bolšaj kolkaści karystalnikaŭ. Novy ałharytm ŭzmocnić abaronu rejtynhu ad źniešnich nakrutak», śćviardžajuć u «Jandeksie».
Kamientary