Starykaŭ u Minsku: «A vy pryjedźcie ŭ Danieck»

U «Domie Maskvy ŭ Minsku» prajšła sustreča z rasijskim prapahandystam Mikałajem Starykavym. 

Pačałasia jana z bojki pamiž achovaj budynka i niekalkimi aktyvistami, jakija pačali kryčać na adras śpikiera «Čamadan—vakzał—Rasija», jak tolki toj uziaŭ u ruki mikrafon. 

Kab vyvieści chłopcaŭ, achovie spatrebiłasia niekalki chvilin, paśla čaho Starykaŭ praciahnuŭ vystup. 

Pra što jon kazaŭ? 

Zachad — kiepski, Rasija — spraviadlivaja. Voś sutnaść jahonaj pramovy: «Krainy Zachadu stracili areoł mučanikaŭ za svabodu», «krainy Zachadu raźviazali hramadzianskuju vajnu va Ukrainie», «krainy Zachadu padtrymlivajuć ID». 

Pavodle Starykava, la miežaŭ Rasii chodziać hałodnyja zachodnija vaŭki i kłacajuć zubami na jaje paśpiachovaść, stvarajučy vakoł Rasii «pojas niestabilnaści», bo im heta vyhadna, bo jany ŭžo nie takija mocnyja, jak raniej. 

I mienavita dla taho, kab supraćstajać ekspansii anhłasaksaŭ, tre' było stvaryć Jeŭrazijski sajuz.

Starykaŭ vinavaciŭ Zachad u infarmacyjnaj vajnie i kazaŭ, što z chłuślivymi miedyjami Amieryki i Jeŭropy možna zmahacca tolki praŭdaj. 

«Praŭdu kazać lohka i pryjemna», — adznačyŭ Starykaŭ i skazaŭ, što kamientary ŭ jaho padtrymku na «Našaj Nivie» pisali prostyja biełarusy, a ich abazvali «trolami».

Starykaŭ lohki na padman. Siońnia jon sam chvaliŭsia ŭ svajoj supołcy «UKantakcie», što bajcy jahonaha «internet-apałčeńnia» zavalili «Našu Nivu» kamientarami.

Voś skrynšot:

Pavialičyć

Uvohule, u pramovie Starykava było šmat chłuśni, ale łajalnaja aŭdytoryja ŭsio heta «chavała». 

«Skažycie dla tych zmaharoŭ, jakija nazyvali vas biełarusafobam, jak vy staviciesia da našaj krainy i našaj identyčnaści», — prasiŭ chtości ŭ zale. 

«Ja vielmi lublu Biełoruśsiju, — rasčuliŭsia Starykaŭ, adkazvajučy na pytańnie pra identyčnaść, — uvohule nie baču roźnicy pamiž biełarusami, ukraincami i ruskimi. My ŭsie adziny ruski narod».

Pra paciapleńnie adnosinaŭ pamiž Biełaruśsiu i ZŠA Starykaŭ skazaŭ tak: «Nie treba vieryć ich uśmieškam. Hetak Baba-Jaha (ZŠA) choča zaciahnuć chłopca (Biełaruś) u svaju chatu, kab jaho źjeści ci zrabić jašče čaho nieprystojnaha». 

Pytańni z aŭdytoryi byli pieravažna «scenarnyja». 

Tut tabie i niejkaja studentka hadoŭ 20—25 škadavała pra toje, što razvaliŭsia Saviecki Sajuz, tut i babula aburana pytałasia, čamu rasijskaj avijabazy ŭsio jašče niama ŭ Biełarusi. 

Pieršaje pytańnie nasupierak scenaru zadaŭ niejki školnik, jak jon sam siabie nazvaŭ.

Ale ŭ słovach chłopca było bolš emocyjaŭ, čym pytańnia. Jon nahadaŭ, što ŭsie siabry Rasii — biednyja, u toj čas jak stypiendyja ŭ Hiermanii — 1500 jeŭra. 

Jašče adnoje pytańnie nasupierak scenaru pramoŭcu zadaŭ žurnalist «Našaj Nivy». Vyprošvać hetuju mahčymaść pryjšłosia bolš za hadzinu. Našaje pytańnie akazałasia finalnym. Hučała jano tak: «Rasijskaja impieryja raspałasia, Saviecki Sajuz raspaŭsia. Navošta Biełarusi jašče adzin Jeŭrazijski sajuz z Rasijaj, kali hrošy i technałohii na Zachadzie? I navošta heta samoj Rasii, zamiest naładžvańnia ekanamičnych adnosin z Zachadam?».

U adkaz Starykaŭ apielavaŭ da Danbasa: «A vy pryjedźcie ŭ Danieck i spytajcie, ci chočuć tam ludzi na Zachad?»

Paśla zaŭvahi, što havorka idzie pra Biełaruś, Starykaŭ skazaŭ voś što: «Kali b vy naradzilisia hadoŭ na 25 raniej, vy b usio razumieli i nastalhavali pa Savieckim Sajuzie».

Na hetym sustreča skončyłasia. 

A potym u mianie na vačach student padyšoŭ da maderatara razmovy i zapytaŭ, chto moža dać jamu daviedku dla ŭniviersiteta, jakaja b paćviardžała jahonaje znachodžańnie na vystupie Starykava.

• 0
• 0
• 0
• 0
• 0
• 0
• 0
• 0