Nadzvyčajnaje zdareńnie ŭ Vilni: 3000 palicejskich piać hadzin šukali narkamana z aŭtamatam — i złavili
19 listapada viečaram kala 6-ha kamisaryjata palicyi adbyŭsia nadzvyčajny incydent — razbušavaŭsia ŭzbrojeny mužčyna. Mužčyna zavałodaŭ aŭtamatam, niahledziačy na toje, što byŭ u kajdankach. Jaho šukajuć pa ŭsim horadzie.
Palicyja pryviezła mužčynu da 6-ha kamisaryjata (rajon Pašyłajčaj — zachodniaja častka horada). Jamu byŭ pryznačany administracyjny aryšt. Kali mašyna spyniłasia kala kamisaryjata, ale mužčyna schapiŭ aŭtamat «Kałašnikaŭ» i nie na žart razbušavaŭsia. Nieŭzabavie zatrymany źbieh ad palicejskich razam z aŭtamatam.
Palicyja paviedamiła, što mužčyna — Ihar Małatkoŭ (1991 h.n.) pakutuje na psichičnaje zachvorvańnie, sajt 15min.lt udakładniaje, što jon narkaman. Źbiehłaha spačatku šukali ŭ rajonie Pašyłajčaj, a potym pošuki pašyrylisia na ŭvieś horad.
Pa źviestkach BNS, usiaho jaho šukajuć 3000 vartavych paradku, a heta tracina ŭsioj litoŭskaj palicyi.
«Budziem šukać ŭsiu noč, pakul nie zatrymajem», - skazaŭ BNS namieśnik hienkamisara palicyi Edharas Šylerys.
Palicyja paprasiła spynić niekatoryja mierapryjemstvy, a ich udzielnikaŭ razyścisia (naprykład, paprasili razyścisia ludziej, jakija byli na mierapryjemstvie ŭ Pałacy kiraŭnikoŭ, a taksama naviedvalnikaŭ HC «Ozas»).
Ministr unutranych spraŭ Saŭlus Skviernialis nazvaŭ situacyju haniebnaj i poŭnym nieprafiesijanalizmam.
«Samu situacyju, kali zakuty ŭ kajdanki zatrymany zdoleŭ adabrać u palicyjanta zbroju, ministr ličyć haniebnaj», — skazaŭ pres-ataše ministra Tomas Biaržynskas. Na dumku kiraŭnika MUS, ciapier samaje hałoŭnaje — jak maha chutčej schapić niebiaśpiečnaha ŭciekača.
lrytas.lt
Pavodle nieaficyjnych dadzienych, palicyja, praviarajučy mašyny, šukaje kankretny aŭtamabil - bieły VW Golf. U čaćvier viečaram na pošuki padazravanaha padniali viertalot Słužby achovy dziaržmiažy Eurocopter, paviedamiŭ pres-sakratar SADM Hiedrus Mišucis.
«Kala 22:00 [pa Minsku] viertalot vylecieŭ z Pałuknisa i sieŭ kala Biełaha mosta ŭ centry horada.
«Na bort ŭziali palicejskaha. Viertalot buduć nakiroŭvać supracoŭniki palicyi. Viertalot budzie lotać nad Vilniaj, vakoł stalicy, jon abstalavany najnoŭšaj technikaj, ciepłavizaram», - skazaŭ BNS Mišucis.
Uciekača šukajuć na ŭsioj terytoryi Vilenskaj akruhi, pra heta BNS skazaŭ namieśnik načalnika Hałoŭnaha kamisaryjata palicyi Vilenskaj akruhi Antonij Mikulski.
U vykradzienym eciekačom aŭtamacie była adna abojma z patronami (30 patronaŭ), pra heta ŭ navinach na telekanale ŁNK raspavioŭ hienkamisar palicyi Linas Piarnavas.
«Jon źbieh razam z aŭtamatam «Kałašnikaŭ». Tam adna abojma z patronami», - skazaŭ Piarnavas. Pa słovach Piarnavasa, palicejskich apytvajuć, ź imi pracujuć psichołahi.
Palicyja papiaredžvaje: Nie ŭzdumajcie sami šukać złačyncu
Ludzi aktyŭna telefanujuć, paviedamlajučy pra toje, dzie bačyli mužčynu, padobnaha na padazravanaha. Na ŭsie paviedamleńni reahujuć vokamhnienna, adnak pakul uciekača znajści nie ŭdałosia. Palicyja naziraje nie tolki za horadam, ale i za sacyjalnymi sietkami.
Palicyja papiaredžvaje žycharoŭ: «Kali vy raźmiaščajecie infarmacyju pra toje, što ŭ fejsbuku źjaŭlajucca zakrytyja hrupy, u jakich moładź zaklikajuć abjadnoŭvacca i iści na pošuki ŭciekača - abšukvać zakinutyja budynki, ni ŭ jakim razie nie rabicie hetaha!».
A 23.30 pa litoŭskim časie (00:30 pa Minsku), 15min.lt paviedamiŭ, što palicejskija na vulicy Pelesos, zatrymali Ihara Małatkova.
00.35
Palicyja aficyjna paćvierdziła: Ihar Małatkoŭ zatrymany. Jaho pošuk doŭžyŭsia piać hadzin. Jaho aryštavali na Pelesos gatvė (rajon Naujininkaj).
«Jon aryštavany, zbroju znajšli» - skazaŭ BNS namieśnik kamisara palicyi, hienierał Edvardas Šyleras.
Praź dzieviać miesiacaŭ paśla vyzvaleńnia pamior palitviazień Valeryj Bohdan7
Kamientary