Sud adabraŭ u ministra sportu kvateru, nabytuju pa zanižanaj canie. Alaksandr Šamko straciŭ jak minimum $38 tysiač

«Ministr sportu kupiŭ čatyrochpakajoŭku pa canie, nižejšaj za rynkavuju» — artykuł pad takim zahałoŭkam byŭ apublikavany ŭ «Našaj Nivie» ŭ mai 2015 hoda. Były pažarnik Alaksandr Šamko ŭ apošni momant uskočyŭ u budoŭlu na vulicy Jankoŭskaha ŭ Minsku.

Prablemny dom «Manalithrada»

Dziaržaŭny zabudoŭščyk «Budtech» (paśla rearhanizavany ŭ «Manalithrad») uzvodziŭ adzin z samych prablemnych abjektaŭ horada. Kampanija davoli chutka nabrała dolščykaŭ, adnak budavać nie śpiašałasia. Praces časta spyniaŭsia, a suprać kiraŭnictva «Manalithrada» zavodzilisia kryminalnyja spravy.

Siarod dolščykaŭ była siamja finansista Alaksieja R. Na jaho žonku była zaklučana damova ab budaŭnictvie čatyrochpakajoŭki płoščaj 92 m². Siamja zapłaciła patrebnyja hrošy, tym samym całkam vykanaŭšy svaje abaviazalnictvy, i prosta čakała klučoŭ.

Adnak čakać daviałosia doŭha. Pavodle damovy, zabudoŭščyk abiacaŭ zdać dom u ekspłuatacyju ŭ červieni 2011 hoda. Kali b «Manalithrad» prytrymlivaŭsia hrafika, devalvacyja niamocna ŭdaryła b pa budoŭli. Ale heta byŭ inšy vypadak. Tamu dolščykaŭ paprasili dapłacić. Cana padskočyła istotna, za samyja vialikija kvatery dapłata składała da $10 tysiač. Ludzi, naturalna, aburylisia. Bolšaść usio ž zapłaciła, raźličvajučy paskoryć budoŭlu.

Spadzieŭ byŭ marnym, «Manalithrad» pa-raniejšamu marudziŭ, dom z horam napałam zdali ŭ ekspłuatacyju tolki ŭ 2013 hodzie, i toje nie całkam.

Pavialičyć

Dva haspadary adnoj kvatery

Byli i tyja, chto nie staŭ dapłačvać, bo paličyŭ patrabavańni zabudoŭščyka niezakonnymi. Siarod ich i siamja zhadanaha vyšej Alaksieja R. Tady «Manalithrad» u adnabakovym režymie razarvaŭ damovy z takimi dolščykami, paabiacaŭšy addać raniej spłačanyja hrošy.

Viarnuć musili praindeksavanyja sumy, adnak dla dolščykaŭ heta ŭsio adno było niavyhadna. Za svaje kvatery jany ŭžo zapłacili pa «starym» kursie, a atrymali b kampiensacyju pa «novym».

«Manalithrad» nie prydumaŭ ničoha lepšaha, čym adrazu ž pierapradać čatyrochpakajoŭki, vyzvalenyja ad niesastuplivych dolščykaŭ.

Mienavita tady, viasnoj 2014 hoda, pakupnikom kvatery, damovu na jakuju mieła žonka finansista R., staŭ ministr sportu i turyzmu Alaksandr Šamko. Žyllo jon braŭ užo ŭ hatovym budynku — nijakich ryzykaŭ niedabudavanaha doma. Kvadratny mietr kaštavaŭ ministru $1134 u ekvivalencie, i heta była vyhadnaja ŭhoda.

Nahadajem, na toj momant u Minsku nie było nivodnaj novabudoŭli, tańniejšaj za $1250 za kvadratny mietr, i heta ŭ damach, u jakija možna zasialacca tolki praz hod-dva! A na druhasnym rynku siaredniaja cana składała $1650 za mietr.

Šamko tady admoviŭsia kamientavać «Našaj Nivie» abstaviny ŭhody, paraiŭšy źviartacca da svajho advakata.

Pakupnicaj druhoj «vyzvalenaj» kvatery była minčanka Marharyta Kryvickaja. U intervju Onliner.by jana patłumačyła, što mieła dvuchpakajoŭku ŭ tym ža rajonie Sucharava. Daviedaŭšysia, što pradajecca nadzvyčaj tannaja čatyrochpakajoŭka, jana chutka pradała staruju kvateru i nabyła novuju, u domie na Jankoŭskaha. Uličvajučy ceny na rynku, dapłacić joj daviałosia niašmat.

Pavialičyć

Supraćlehłyja rašeńni suda

Pieršasnyja dolščyki taksama nie spali ŭ šapku. Praŭda, pieršy sud u kastryčniku 2014 hoda Vital Hurynovič — heta «jaho» kvatera dastałasia Kryvickaj — prajhraŭ. U čym byŭ sens sprečki pamiž im z adnaho boku i «Manalithradam» z Kryvickaj ź inšaha?

Zabudoŭščyk vysyłaŭ dolščyku zakaznyja listy z patrabavańniem albo padpisać dadatkovaje pahadnieńnie (a značycca, dapłacić kala $10 tysiač), albo admovicca ad padpisańnia (i faktyčna pahadzicca na razryvańnie damovy i viartańnie hrošaj sa stratami). Hurynovič ža znajšoŭ ščylinu ŭ zakanadaŭstvie. Jon prosta nie atrymlivaŭ hetyja listy ad zabudoŭščyka, a značycca, nie mieŭ i dadatkovaha pahadnieńnia i nie musiŭ dapłačvać hrošy.

Adnak sudździa Partyzanskaha rajona traktavała zakon pa-svojmu. Jana zajaviła, što Hurynovič «nie pradastaviŭ dokazaŭ taho, što karespandencyja nie była im atrymana». I pastanaviła pakinuć kvateru Kryvickaj. Dolščyk abskardziŭ rašeńnie, i Minski haradski sud adpraviŭ spravu na pierahlad.

Praz hod, u vieraśni 2015 hoda, situacyja pieraviarnułasia. Toj samy sud Partyzanskaha rajona pryniaŭ supraćlehłaje rašeńnie: pakolki Hurynovič nie atrymlivaŭ prapanovaŭ ab dapłacie, razryvać jahonuju damovu było nielha. A značycca, kvateru treba addać jamu, a Kryvickaj vypłacić kampiensacyju. U takim vypadku ŭ vidavočnym minusie zastajecca ŭžo jana, tamu rychtuje apielacyju. Kvatera tym časam znachodzicca pad zabaronaj na adčužeńnie.

Pavialičyć

Ministr źmiryŭsia

Padobnym čynam situacyja razhortavałasia i ŭ situacyi z kvateraj Šamko, pieršasnym dolščykam jakoj była žonka R.

U pačatkovym rašeńni suda paznačana, što mienavita ministr zastajecca pravaŭłaśnikam kvatery. Adnak u vyniku abskardžvańnia haradski sud viarnuŭ žyllo siamji R.

Pryčym kali ŭ Hurynoviča i Kryvickaj sprečki praciahvajucca, to Šamko źmiryŭsia sa strataj kvatery. Rašeńnie nakont žylla siamji R. ustupiła ŭ siłu, u žniŭni 2015 hoda jaho žonka stała paŭnavartasnaj haspadyniaj kvatery.

Praŭda, siamji R. usio ž daviałosia dapłacić «Manalithradu» tyja hrošy, nakont jakich viałasia sprečka niekalki hadoŭ tamu, — kala $10 tysiač.

Kolki viernuć Šamko?

Marharycie Kryvickaj «Manalithrad» pavinien viarnuć 1,2 miljarda rubloŭ (kala $64,5 tysiačy ŭ ekvivalencie). Nahadajem, u svoj čas jana zapłaciła za kvateru kala 1 miljarda rubloŭ (tady heta było kala $100 tysiač). To bok faktyčnych strataŭ — kala $35 tysiač.

U Šamko situacyja padobnaja. Praŭda, jahonaja kvatera na 4 m² bolšaja (i znachodzicca raŭniutka nad kvateraj Kryvickaj — pytańnie pra jakaść budaŭnictva). Tamu i sumy ŭ jaho krychu bolšyja. Takim čynam, ministr atrymaŭ strataŭ pryblizna na $38 tysiač.

Pavialičyć

Z rostam kursa dalara suma strataŭ budzie pavialičvacca. Kamu viernuć hrošy i ŭ jakija terminy — zahadka.

«Manalithrad» faktyčna zbankrutavaŭ i maje $2 miljony doŭhu. Byłym klijentam treba čakać, pakul raspradaduć majomaść kampanii. Z hetych hrošaj i buduć vydavać kampiensacyi.

* * *

Alaksandr Šamko

Naradziŭsia ŭ 1968 u Minsku. Skončyŭ Minski politechničny technikum (1987), Kamandna-inžynierny instytut MNS (2000), Akademiju kiravańnia (2009).

Słužyŭ u vojsku (1987—1989), u orhanach i padraździaleńniach pa nadzvyčajnych situacyjach (1989—2012). Načalnik respublikanskaha atrada śpiecyjalnaha pryznačeńnia MNS (2007—2008), namieśnik ministra pa nadzvyčajnych situacyjach (2008—2012).

Ministr sportu i turyzmu (z 2012).

• 0
• 0
• 0
• 0
• 0
• 0
• 0
• 0