Pavieł Cieraškovič: Novyja vybary rektara EHU buduć kalkaj papiarednich, kali tolki nie ŭmiašajecca Ahulny schod uładalnikaŭ

«Z-za prablem, jakija ŭźnikli ŭ vyniku niedachopu kanfidencyjnaści ŭ papiarednim pracesie adboru rektara, kali niekatoryja členy Rady apublikavali infarmacyju pra kandydataŭ u presie i h.d., SIDA nastajała (i Jeŭrapiejskaja kamisija pahadziłasia), što praces adboru nastupnaha rektara budzie ažyćciaŭlacca imi pasrodkam inšaj standartnaj pracedury: budzie pryciahnuta firma pa pošuku piersanału («chedchantary»). Mienavita takim sposabam moj univiersitet (Kiembrydž) šukaje novaha kiraŭnika, takuju ž praceduru my vykarystoŭvajem u Kazachstanie, a taksama ŭ inšych zachodnich krainach i ŭ ZŠA.

Pošukavaja firma pačynaje pracu z univiersitetam nad śpisam słužbovych abaviazkaŭ patrebnaha kandydata i nad kantekstam samoha ŭniviersiteta. Zatym kampanija biare na siabie zadaču pošuku adpaviednych kandydataŭ, a taksama rekłamu vakansii. Jana vyvučaje znojdzienyja kandydatury i składaje šort-list, i na hetym etapie dałučajucca Kiroŭnaja Rada i SIDA dla kančatkovaha vybaru. Paśla taho jak Rada abiare rektara, pošukavaja firma i SIDA dapracujuć pytańni zarabotnaj płaty. Takim čynam, mnohija ciažkija rašeńni buduć pieradaručyć orhanu, jaki niasie adkaznaść pierad ludźmi, jakija pieradajuć nam srodki, i budzie panižana ryzyka adsievu kandydataŭ pa pryčynie parušeńnia pryvatnaści Kiroŭnaj Radaj».

En Łansdejł

U EHU pavinna pačacca kampanija pa vybarach rektara. Kali mierkavać pa vykazvańniach En Łansdejł, jana nie budzie vielmi istotna adroźnivacca ad papiaredniaj. Schiema nie praduhledžvaje ŭdziełu akademičnaj supolnaści i hramadskich stejkchołdaraŭ. Prosta papiaredni adbor kandydataŭ budzie pravodzić kadravaje ahienctva, a nie kiraŭnictva EHU. Šort-list budzie razhladacca Kiroŭnaj Radaj i šviedskim ahienctvam SIDA. A prava kančatkovaha vybaru, zhodna z Łansdejł, naležyć Kiroŭnaj Radzie («paśla taho jak Kiroŭnaja Rada abiare rektara…»).

Taki padychod jość hrubym parušeńniem Statutu: Kiroŭnaja Rada maje prava tolki rabić prapanovy adnosna kandydatury rektara, jakija majuć nie abaviazkovy charaktar (art.6.2.8). Prava pryznačać rektara naležyć vyklučna Ahulnamu schodu ŭładalnikaŭ (art.5.2.4), pra jaki spn. Łansdejł navat nie zhadvaje (!). Mienavita jon, jak vyšejšaja ułada instytucyi, i pavinien vyznačać praceduru pošuku kandydataŭ i samoha abrańnia. U Kiroŭnaj Rady takoha prava niama, jak niama prava kiravać pracesam adboru. Ale minuły raz heta adbyłosia javačnym paradkam. Hrubaje ŭmiašalnictva Kiroŭnaj Rady ŭ praceduru vybaraŭ u 2015 h. robić ich jurydyčna nielehitymnymi. 

Nie dumaju, što hetym razam budzie inakš. Kiraŭnictva EHU tak i nie navučyłasia pavažać zakon. Nie ŭpeŭnieny, što SIDA tut budzie zdolnaja što-niebudź źmianić. Tym bolš što jurydyčnych padstaŭ dla takoha ŭmiašalnictva niama.

Adziny sposab vyratavać situacyju ŭ EHU i, u tym liku, pravieści sapraŭdnyja vybary rektara — heta pazbavić ułady tych, chto davieŭ jaho da krytyčnaha stanu. Jurydyčnaja pracedura dla hetaha jość — Ahulny schod uładalnikaŭ zhodna z art. 6.10 moža adpravić u adstaŭku luboha siabra Kiroŭnaj Rady.

• 0
• 0
• 0
• 0
• 0
• 0
• 0
• 0