Baćka z synam paspračalisia na 15 miljonaŭ, chto lepš zdaść CT. Baćka prajhraje
49-hadovy žychar Brahina Uładzimir Cieramiecki paspračaŭsia z synam, što zdaść CT lepš. Umovy sprečki — pa 5 miljonaŭ za kožnaje CT.
«Sam ja vypuskaŭsia sa škoły ŭ 1983 hodzie. Vučyŭsia dobra, na 4 i 5. Syn u minułym hodzie skončyŭ škołu, zdavaŭ CT, sprabavaŭ pastupić u miedycynski ŭniviersitet, ale nie chapiła bałaŭ, pajšoŭ u kaledž na ekanamista. U hetym hodzie i ja zdaju CT, i syn. Prosta kab pravieryć svaje viedy. Nu i mnie jak baćku stała cikava daviedacca, jak usio heta ŭładkavana, nakolki testavańnie adroźnivajecca ad ekzamienaŭ, jakija my zdavali jašče ŭ Savieckim Sajuzie», — raspavioŭ Uładzimir.
14 červienia jon zdaŭ CT pa ruskaj movie. Praz 10 dzion staŭ viadomy vynik. Mužčyna nabraŭ usiaho 7 bałaŭ. A jaho syn — 37.
«Prosta nie viedaŭ, što tam treba niekalki varyjantaŭ vybirać, staviŭ pa adnoj hałačcy nasuprać kožnaha adkazu», — patłumačyŭ pryčynu svajoj niaŭdačy Cieramiecki-starejšy.
Na hetym tydni stanuć viadomyja vyniki CT pa bijałohii i chimii, jakija Uładzimir zdavaŭ 18 i 23 červienia. Darečy, za ŭsie try vyprabavańni razam z pajezdkami ŭ Homiel jon vydatkavaŭ kala adnaho miljona rubloŭ.
Pa słovach mužčyny, za hetyja dni jon zrazumieŭ hałoŭnaje, što CT - surjoznaje vyprabavańnie i stres dla dziciaci.
«Ciapier ja ŭsio ŭbačyŭ znutry i zrazumieŭ, nakolki heta ciažka. Nia treba kryčać na dzicia, jakoje nabrała mała bałaŭ na CT, tamu što heta i na samaj spravie nialohka. U naš čas ekzamieny zdać było našmat praściej», — pryznaŭsia Uładzimir.
Taksama na siamiejnaj radzie vyrašyli, što nie ŭ zaležnaści ad vynikaŭ sprečki, usie hrošy pojduć na siamiejny adpačynak.
Ciapier čytajuć
Jak vypadkovaje znajomstva ŭ hiej-kłubie skončyłasia hučnym zabojstvam. Novyja detali pa spravie biełarusa, jaki 25 hadoŭ tamu zarezaŭ pradziusara ŭ Maskvie44
Kamientary