19—25 vieraśnia — Tydzień biełaruskaha myśleńnia

Ad 19 da 25 vieraśnia dziasiatki raznastajnych mierapryjemstvaŭ pa ŭsioj krainie štodnia buduć abjadnoŭvać biełarusaŭ, dla jakich myśleńnie źjaŭlajecca biezumoŭnaj kaštoŭnaściu. A heta nie tolki fiłosafy i myślary! Arhanizatary padkreślivajuć, što kažučy «myśleńnie» razumiejuć nie prafiesijnuju prynaležnaść, ale pieradusim zdolnaść vykazvacca svabodna, śviadoma dy abhruntavana.

Šerah instytucyj hramadzianskaj supolnaści dy adukacyjnych ustanoŭ abjadnalisia idejaj biełaruskaha myśleńnia jak častki našaj identyčnaści, samarazumieńnia nacyi, šlachoŭ asensavańnia jaje sutnaści dy pryznačeńnia. U kancy traŭnia 2015 hodu imi byŭ raspačaty supolny kulturnicki prajekt «Cytuj svajo!», jaki pasłužyŭ startam «Hodu biełaruskaha myśleńnia». Jaskravyja padziei Hodu šyroka i publična pradstaŭlali intelektualnyja zdabytki Biełarusi i prasoŭvali ich ŭ sučasnuju kulturu.

Inicyjatyva «Cytuj svajo» atrymała svoj praciah u vydańni zbornika i stvareńni aryhinalnych dyzajnierskich sakołak, była vydadziena i prezientavana Antałohija biełaruskaha myśleńnia «Kod prysutnaści», adbyłasia sieryja publičnych lekcyj i dyskusij «Spadčyna Ihnata Abdzirałoviča», a taksama byŭ abvieščany konkurs ese, pryśviečany postaciam, idejam i kantekstam paŭstavańnia biełaruskaj intelektualnaj tradycyi. Padviadzieńnie vynikaŭ konkursu i ŭznaharodžańnie pieramožcaŭ adbudziecca 25 vieraśnia — na zaviaršalnaj imprezie «Tydnia».

Takim čynam «Tydzień biełaruskaha myśleńnia», jaki projdzie ŭ Biełarusi z 19 pa 25 vieraśnia, stavić na metu padvieści vyniki Hodu i pradstavić usiu raznastajnaść formaŭ i prajavaŭ biełaruskaha myśleńnia ŭ sučasnym biełaruskim hramadstvie. Manałahičnyja razvahi na adviečnyja i supieraktualnyja temy, dyjałohi i dyskusii, vystavy i majstar-kłasy, prezientacyi i navat mieładekłamacyi — arhanizatary prapanujuć prahramu dla amataraŭ absalutna roznych formaŭ i movaŭ myśleńnia.

U śpis arhanizataraŭ «Tydnia biełaruskaha myśleńnia» ŭvachodziać: Mižnarodny kansorcyum «JeŭraBiełaruś», Latučy ŭniviersitet, hramadskaja kampanija «Budźma biełarusami!», Biełaruski Kalehium, «Mova Nanova», «Biełarusskij žurnał», kniharnia «Łohvinaŭ» i Instytut palityčnych daśledavańniaŭ «Palityčnaja śfiera«.

Raspačniecca «Tydzień biełaruskaha myśleńnia» adkryćciom vystavy «Cogito Albarutheniae. Panarama biełaruskaha myśleńnia», jakuju ładziać «JeŭraBiełaruś», Latučy ŭniviersitet, Biełaruski Kalehium. Adkryćcio adbudziecca 16 vieraśnia ŭ 19.00 u prastory Korpus 8 (pr. Mašerava, 9). Arhanitzatary akcentujuć uvahu na tym, što raspačynajecca vystava ŭ piatnicu — napiaredadni «Tydnia» — i spadziajucca, što dziakujučy joj udzielniki natchniacca atmaśfieraj, źbiarucca z dumkami, zaryjentujucca, vybudujuć svaju trajektoryju pa padziejach «Tydnia biełaruskaha myśleńnia» i akunucca ŭ jaho viry.

«Hetaja vystava dazvolić ubačyć, jak słovy «biełaruskaje myśleńnie» sa statusa aksiumarana pierajšli ŭ całkam «narmalnaje» paznačeńnie peŭnaj źjavy. Jaje možna vyvučać, razumieć ci ŭklučacca praz praciah tradycyi ci krytyku, asprečvańnie i inavacyi, — raspaviadaje kaardynatarka «Tydnia biełaruskaha myśleńnia» Taćciana Vadałažskaja, — My chacieli b, kab «Tydzień» staŭ pryhodaj dla ŭsich udzielnikaŭ, kali ŭ blizkim i znajomym ty znachodziš novaje i niečakanaje, u kancentravanym zhustku padziejaŭ razumieješ płyni, tendencyi, a moža navat peŭny styl i svaju movu. U vyniku ty znachodziš siabie ŭ prastory myśleńnia i źmianiaješsia razam ź im.»

Bolš za dziesiać arhanizacyj, supołak i inicyjatyvaŭ pa ŭsio Biełarusi dałučylisia da stvareńnia padziej «Tydnia biełaruskaha myśleńnia». Mierapryjemstvy buduć prachodzić na roznych placoŭkach nie tolki ŭ Minsku (Korpus8, Halereja Ŭ, CECH, Halereja TUT.BY, PUNKT, Press Club Belarus, Imaguru) ale i ŭ Astraŭcy, Babrujsku, Bieraści, Viciebsku, Homli, Hrodna i Mahilovie. Uvachod na ŭsie mierapryjemstvy «Tydnia» — volny!

Padrabiaznuju i aktualnuju prahramu «Tydnia biełaruskaha myśleńnia» možna znajści (i spamavać) TUT, a taksama na sajcie www.fly-uni.org.

Sačycie za abviestkami ŭ supołcy padziei ŭ Facebook.

Pa dadatkovuju ci bolš dakładnuju infarmacyju źviartajciesia na adras [email protected]. Arhanizatary z radaściu i impetam adkažuć na ŭsie vašyja pytańni!

Da sustrečy na mierapriemstvach «Tydnia biełaruskaha myśleńnia»!

• 0
• 0
• 0
• 0
• 0
• 0
• 0
• 0