¡Viva la Libertad!

Na fonie kiepskich navinaŭ, jakija apošnim časam pieravažajuć u śviecie, sapraŭdy dobraja navina pryjšła z Kalumbii.

U vyniku vajskovaj specaperacyi z ruk paŭstancaŭ FARC (Revalucyjnyja ŭzbrojenyja siły Kalumbii) vyzvalena eks‑kandydat u prezydenty hetaj krainy Inhryd Betankur i jašče 14 zakładnikaŭ.

Hety siužet varty taho, kab na jaho padstavie źniać halivudzki błokbaster. Apieracyja pad nazvaj «Šach» była raspracavanaja vajskovaj vyviedkaj, jakoj udałosia ukaranić svaich ahientaŭ u sakrataryjat (aperatyŭnaje kiraŭnictva) FARC i ŭ atrad, jaki achoŭvaŭ častku zakładnikaŭ.

Ahienty znajšli dva hielikoptery, piłoty jakich za hrošy pahadzilisia dastavić zakładnikaŭ u vyznačanaje miesca, ale pryziamlilisia na avijabazie… ŭradavych vojskaŭ. Pavodle inšaj versii, atrad uradoŭcaŭ sam prybyŭ u lahier paŭstancaŭ pad vyhladam farkaŭcaŭ. Cikava, što ŭ pieršych paviedamleńniach rasiejskich ŚMI havorka jšła pra vyzvaleńnie zakładnikaŭ… paŭstancami.

Jak by to ni było, siońnia radaść pieražyvajuć sama Inhryd Betankur, jaje dzieci, jakija apošnim časam žyli ŭ Francyi (jana maje padvojnaje hramadzianstva), prezydent Kalumbii Alvara Urybe i ministar abarony Manuel Santas, jakija admaŭlaŭsia vieści pieramovy z terarystami, prezydent Francyi Nikala Sarkazi, jaki vykazvaŭ asabistaje zacikaŭleńnie ŭ vyzvaleńni ŭsich kalumbijskich zakładnikaŭ. Ich zastajecca ŭ džunhlach Kalumbii jašče kala 2,5 tys.

Cikava adznačyć i toj fakt, što napiaredadni Alvara Ŭrybie sustreŭsia ŭ Bahacie z kandydatam na prezydenty ZŠA respublikancam Džonam Makkejnam, jaki robić adzin z akcentaŭ u svajoj vybarčaj prahramie na baraćbie z kalumbijskaj narkamafijaj, ščylna źviazanaj z paŭstancami. Asnoŭnaj temaj hutarki dvuch palitykaŭ byli vyzvaleńnie zakładnikaŭ i datrymańnie pravoŭ čałavieka na kantynencie dy va ŭsim śviecie.

U kožnaj značnaj padziei, viadoma, jość dva baki. Chto prajhraŭ u hetaj historyi? Prajhrali kalumbijskija paŭstancy, jakim prezydent ciapier prapanuje mir na ŭmovach pieramožcy.

Prajhraŭ prezydent susiedniaj Venesueły Uha Čaves, jaki vystupaŭ za pieramovy z terarystami i navat ledź nie raźviazaŭ vajnu z Kalumbijaj paśla taho, jak jaje vojski praviali aperacyju suprać kalumbijskich paŭstancaŭ na terytoryi Ekvadoru. Jamu, praŭda, udałosia damahčysia vyzvaleńnia niekalkich zakładnikaŭ. Ale ž ćviordaja pazycyja Ŭrybe, baćka jakoha byŭ zabity niekali terarystami, vyjaviłasia bolš efektyŭnaj.

I narešcie, paciarpieŭ mižnarodny imidž kiraŭnictva RB. Jak viadoma, u noŭtbuku zabitaha padčas specaperacyi ŭ Ekvadory Raŭla Rejesa, adnaho ź lideraŭ paŭstancaŭ, była znojdzienaja pierapiska z Uha Čavesam, dzie toj kazaŭ, što biełaruski bok moža pradać vialikuju partyju zbroi FARC. Taja aperacyja, vyhladaje, była pačatkam paśpiachovych dziejańniaŭ uradu Kalumbii ŭ baraćbie z paŭstancami, kulminacyjaj jakich stała vyzvaleńnie Betankur i inšych zakładnikaŭ.

A Čaves i Łukašenka paciarpieli vidavočnuju imidžavuju parazu ŭ svaim paranaidalnym procistajanini amerykanskamu imperyjalizmu.

Vital Taras

Hladzi jašče:
U bajevikoŭ FARK adbili Inhryd Betankur

• 0
• 0
• 0
• 0
• 0
• 0
• 0
• 0